(beta 公測版本)
< 返回

《【作文練習】熱鬧過後,我卻感到失落》

作者:擇言
日期:2016年4月5日

人類靠「對比」去感知身邊事物,興奮過後會感到空虛,悲傷之後會睇見希望;一場鬧熱,滿足咗掌管正面情緒嘅神經元,隨之而嚟自然係神經疲勞引起嘅失落,正常不過。不過今日嘅熱鬧相當平淡,同呢刻嘅失落唔成比例。或者只係天氣翳焗會引起抑鬱啦。

---*---*---

街燈漸黃,市中心嘅公園比起平時格外平靜。本身愛嚟踢波、打波嘅球場,今晚通通封晒嚟做紀念活動。出面條大路都唔俾車行。公園周圍嘅行人路同馬路,一眼望過去,都係人。我城嘅夏天,又焗又濕,同舒服兩隻字扯唔上咩關係。路上面嘅人方向一致,都係行緊去呢個大公園。朝早落過雨嚟,公園地下仲係有好多水氹,不過似乎不減大家入場嘅決心。

天未黑齊,濕濕𣲷𣲷嘅公園已經企滿晒人,冇人大叫、冇人傾偈、冇人笑、冇人喊,大家只係靜靜哋睇住電話,手指公由下而上噉碌,好似得啲軀殻企咗喺球場入面噉。時間係夜晚七點半,球場最前方有個大台,大台上面企咗一班着住黑色衫嘅人。其中一個拎住咪,宣佈大會開始。雖然一年只得一次大型紀念日集會,但係大家就好似做過無數次演習一樣,有秩序噉打開指定app,一齊唱嗰首已經五十年歷史嘅歌。大家唱得難聽,亦冇咩感情,大概係唔知乜嘢會戰勝歸來之類,不過冇所謂,反正大台有喇叭,聲音會蓋過群眾。之後台上嘅人,似喊非喊噉噉講解紀念日嘅由來。原來紀念日本來唔係呢一日。似乎每次有大事,就會將紀念日改一次。始終一個人可以關心嘅嘢有限:人腦入面資訊爆炸,一早就冇留位俾太多情感。記住最新嘅事,已經係仁智義盡。唔通幾百年前嘅歷史事件我又紀念一餐咩?聽講呢個紀念日,最初三十年係紀念趙國嘅屠殺,大越屠殺之後,又改為紀念呢次貼身啲嘅事。上年我城出咗事,於是今年起,主題就變咗係「悼念我城‧永不忘記」。喺下次出事之前,我諗大家應該唔會忘記上年嘅事啩。

自從我城最後一間卡啦OK執咗笠之後,應該得返呢一日大家會成班人出嚟唱歌喇。悼念儀式嘅好處係,入面嘅歌都係經典老歌,大家都識唱,而且種類繁多。一首哀曲之後,就係一堆歌手藝人輪流發言、獻唱。入面有一堆咩民主,咩祖國之類,旋律好聽,我都懶得理啲歌詞內容喇。初時主持人唱埋一份,把聲不堪入耳,好在在場嘅人員喺第一首歌入副歌之前就熄咗佢支咪咋。之後一眾歌手又無伴奏合唱,又合唱和音,又團體大合唱,將紀念日嘅晚會帶到另一個高潮。為同一個理由,每年聚一聚,搞一個演唱會,呢種堅持,確係難得嘅。有人話我城個個都係功利嘅守財奴,我覺得形容得唔貼切。我覺得大家其實貫徹咗我哋祖先嘅傳統,慎終追遠。每年定時定候對先人表達思念,都算係盡孝嘅表現吖。不過講「孝」好似唔啱。因為去親紀念日嘅都係上咗年紀嘅人,但係紀念親嘅對象都係後生仔喎。我諗如果上年嘅行動有今日咁熱鬧,或者今年嘅紀念日都唔使換主題,仲係紀念緊上一次事件都未定呢。

沓正九點,大台宣佈晚會結束。台上嘅人嗌咪叫大家下年同一日要返嚟公園。台下嘅人慢慢向唔同方向散去,返返去自己所屬嘅地方。公園由熱鬧變返平靜。

---*---*---

熱鬧過後會回復平靜,而失落只會繼續累積。將紀念日化成單純係日曆上嘅紅字,化成一年一度嘅集會,呢種熱鬧,帶唔走失落。

全文 1120 字 (唔計英文、空格、標點)