(beta 公測版本)
< 返回

《擴闊對粵語填詞嘅想像》

作者:牛刀
日期:2015年8月21日

睇到題目,各位可能會諗:吓?噏乜呀?不嬲都有粵語流行曲㗎啦。之不過,諗深一層,一直以嚟,我哋大多數嘅廣東歌,都只係粵音合樂入文,行文依循官話白話文詞彙同語法,最多間中夾雜下啲粵語詞彙呀噉,並非名符其實嘅粵語流行曲。借用HUMA2031 - The Cantonese Language姚玉敏教授嘅例子,即係《愛得比你深》(張學友嘅歌)而唔係《愛得深過你》。

曾幾何時,粵語白話合樂填詞(合樂即係啱音,所以齋rap唔計,唔好話區區做乜唔提LMF),喺主流樂壇都幾活躍下㗎。許冠傑、黎彼得呢對黃金拍檔大大話話寫咗唔少經典名曲,渾然天成;嗰陣時都有徐小明《青春痘》等曲,再唔係,尹光啲口水歌、李秋霞啲鹹歌,你估呢咋流㗎?黃霑手詞巴閉就唔使講添啦,區區自問就填唔到《道》呢篇咁絕核嘅詞喇。區區幾歲人仔嗰陣重有錄音帶(卡式帶),嗰陣時重聽緊餅帶啲兒歌,而家都重記得首《小飛俠》都係粵語詞㗎。

可惜「世事多變,豈可盡如人意」(《要爭取快樂》),全口語唔係個個都buy,黃霑本人都曾經有諗過推動粵語流行曲全口語化,奈何聽眾反應極差[1]。去到零二年,黃偉文同伍樂城發起「新廣東歌運動」[2],搞全口語實驗,至少有五項成品,李彩樺首《你唔愛我啦》係當中嘅代表作,亦係最為人所識,出到嚟反應又係麻麻,評價好壞參半,認真慘情。之後粵語填詞作品數量至少喺主流明顯大減,冇幾耐都重有Twins嘅《你講你愛我》,再之後有林海峰同佢成班老友嘅《男子組》,一零年鬼才林敏驄一貫無厘頭風格,同溫拿(係咪樂壇瘀血就見血見智啦)填咗首《樂壇風雲》,零零丁丁小貓三四雙噉囉。非主流、地下嗰邊都算好過主流嘅,近年嚟有ToNick、神奇膠,Heyo有首《喜愛射毛》串爆蒲精,就連「少開你阿爸」嘅尹光都出嚟唱《你老闆》。形勢係就係悲咗啲,但都未至於要學肥媽大歎一聲「嘥氣」(《要爭取快樂》)。

其實,有咩好排拒啫?大老啊,母語嚟㗎,嫌棄佢庸俗低俗,噉你講開廣東話係咪就會俗埋一份先?妖孽六八九份人再賤都好,喺立法會呢個公開、正式嘅場合,都係用廣東話宣讀施政報告㗎。堂堂粵語出得廳堂,又點會失禮呀?場合如是,題材亦如是。君不見《制水歌》《半斤八兩》《鬼馬雙星》《賣身契》《加價熱潮》《最佳拍檔》《尖沙咀Susie》《日本娃娃》《打雀英雄傳》《財神到》,題材多樣,包羅萬有,莊諧兼備,雅俗共賞?許冠傑嘅傑作固然係香江傳奇,而家亦都有唔少歌證明畀我哋睇:廣東話一樣有資格,一樣有本事!

再者,「新廣東歌運動」未竟全功,亦都未必關粵語填詞事。譬如《你唔愛我啦》猛咁啦啦啦,有人話用字貧乏,我就話係副口吻太傳神,港女格累事。無可否認,呢首歌正如Wyman所講,係「港女始祖」。照噉講,淨係識得「嗎」到落尾,正一傻的嗎,都好唔得幾多㗎咋,噉樣何嘗唔係膚淺呢?由此可見,所謂乞人憎之處唔係在於廣東話入文。

每當諗起台灣閩南歌、客家歌受當地人擁戴愛護之時,粵語填詞就重未得到主流大眾認同甚至歡迎,區區都不免唏噓。講真吖,又唔係要全盤否定或者排斥粵音入文,同埋以前常見嘅通俗文言[3],以至蔚然成風嘅三及第,優秀作品一樣照讚照欣賞不誤。「原諒我這一生不羈放縱愛自由」、「滄海一聲笑,滔滔兩岸潮」都係「香江不朽名句」,「條條大道條條係路」(《道》),區區同好多同路人、知心友都係想「守護我的獨家村」,用最自然嘅母語暢所欲言、抒我胸臆,流露真切嘅情感,唱出心聲噉啫,何罪之有?有幾荒誕可笑、不切實際、癡人說夢?「我自求我道」(《道》)!咁多位,係時候擴闊對粵語填詞嘅想像,諗下復興粵語填詞嘅可能,延續「新廣東歌運動」嘅精神,深耕細作,令到佢超越運動嘅層次,遍地開花!

[1] 黃霑〈粵語流行曲的歌詞創作〉頁11,http://www.library.ln.edu.hk/eresources/etext/clt/clos/clos_0002_a01.pdf

[2] 評論可見 http://cantonpopblog.blogspot.hk/2012/04/blog-post_4598.html

[3] 《光明頂》有一集談論過:https://www.youtube.com/watch?v=MJdmZBcp69w

道 https://www.youtube.com/watch?v=SGgpFnf5a_Y

小飛俠 https://www.youtube.com/watch?v=pC0sY5BzPXo

跳飛機 https://www.youtube.com/watch?v=aR9CVDNZcWA

水滾茶靚 https://www.youtube.com/watch?v=_Cadb18eMu4

Last Christmas https://www.youtube.com/watch?v=w2TKf1U5ZEo

關心菊英 https://www.youtube.com/watch?v=F2jhvk4HKVY

喜愛射毛 https://www.youtube.com/watch?v=zijOzpues4o

起勢維穩 https://www.youtube.com/watch?v=bYDfu-TKG14

其實毒撚一個過平安夜更開心 https://www.youtube.com/watch?v=c1oxzIMwxDA

膠是香港 https://www.youtube.com/watch?v=VVeUUvAgUW0

我的師姐李慧琼 https://www.youtube.com/watch?v=XbUwOfYdsGE

你老闆 https://www.youtube.com/watch?v=poiu-DaTbb0

(原載於《WINGS 22.4》。事後醒起冇加到周國賢《覺醒字幕組》做例子,之後亦都接觸到其他例子,等一次過補返晒,直接加喺後面。)

覺醒字幕組 https://www.youtube.com/watch?v=1N8M5WeipVM

Allegro, Opus 3.3 am https://www.youtube.com/watch?v=z5cQh2gxF5M

愛人女神(獨唱版) https://www.youtube.com/watch?v=x_lI5naO53w (合唱版) https://www.youtube.com/watch?v=G8n3wDUpEfU

小生怕怕(片段一) https://www.youtube.com/watch?v=PfPlzAA9Jnw (片段二) https://www.youtube.com/watch?v=u3t5Fo3Cmyo (歌詞) http://mojim.com/twy100183x4x15.htm

我阿媽話 https://www.youtube.com/watch?v=4TKuiCRwR7o
喪婆 http://youtu.be/YJ1HFFyqIy4
關老三 http://youtu.be/G9nuY6QPQmM
您大晒 http://youtu.be/VkucblqhKvA
#粵語 #粵文 #粵語書寫 #唔難就唔使做啦 #Cantonese #written_cantonese

全文 1366 字 (唔計英文、空格、標點)