(beta 公測版本)
< 返回

《關於寫字》

作者:擇言
日期:2015年8月4日

細個嗰陣大部份時間我都淨係同啲幻想出嚟嘅朋友傾計,冇乜機會接觸一般人,所以我嘅表達能力一直係處於落後水平,係啲溝通有障礙到會俾人恥笑嘅地埗。雖然小學開始我睇好多好多好多書(因為真係好多所以要打三次好多),但係似乎彌補唔到因為缺乏真人交流而導致嘅語文障礙。

直到初中,我每次寫文都要用一個好古怪嘅方法:我會將文章嘅上限分做好多等份。例如四百字嘅文我會分佢做40句,每句10隻字嘅句子,之後我會開始分配啲句子嘅排列,例如每段8句,Intro,Body 1段、2段、3段,結論。分配完之後我會諗point-我真係要諗好多好多point,因為每個point可能只係得一句。之後我再諗辦法用盡每句嗰10隻字。中學生涯可能我寫得二十篇文唔夠,差唔多篇篇都係噉「堆砌」出嚟。

呢個問題我去到好近期先開始正視。嗰陣我發現,無論自己想做啲乜,唔識寫文基本上就等於封咗自己條career path。於是我諗住的起心肝,拎住部laptop去M記寫。我記得當時只係開住個 OneNote ,搵咗一堆我想試寫嘅題目,試寫咗一段,跟住覺得寫得廢,第一段都改嚟改去,最後我撳一個delete掣,飲完杯latte (講講下想去飲杯香蕉奶添...),就返咗屋企。個OneNote 直到我format機都冇再開過出嚟。

有時要開始一樣嘢,往往只係在於一下鳩衝。2014年1月1號,我就真係試下衝咗一嘢,發現當你要寫一啲熟悉嘅題材,用自己最流暢嘅語言,喺最舒服嘅環境,再加少少timing,噉樣衝咗幾個鐘,真係衝咗第一篇唔係用嚟交功課或者寫報告,純粹係為咗表達自己諗法嘅文出嚟。

我相信嗰下係我嘅tipping point,過咗嗰嘢之後我就開始覺得自己可以寫下嘢表達自己諗法。當然我嘅文筆依然係屎,講嘢繼續係1999,但係我由完全寫唔到文,變咗做可以寫到status,都算係一大進步。

我覺得每個人總會有啲目標,講咗想做,但係一直都冇誘因去開始,又或者因為時機唔啱,又或者覺得自己有其他責任未完成唔可以分心,總之種種原因,抽唔到時間出嚟就放埋一邊。其實呢個「乜都未開頭」嘅狀態幾好,因為噉意味住你有一大堆「潛力股」。時間一到,起勢衝幾下,或者呢啲潛力股就會變成自己嘅必殺技。冇發展到嘅,或者你真係同嗰樣嘢冇緣囉。

Keep住有嘢想做,有數未找,先至有生存動力𠺢嘛。

全文 743 字 (唔計英文、空格、標點)