《粵語點講 「No wonder」？》

【唔怪得之／唔怪之得／怪唔得之／怪唔之得】

喺香港粵語，表示「No wonder」、「難怪」、「無怪乎」呢個意思嘅轉折詞，有好多個好接近嘅講法：

【四字】唔怪得之／唔怪之得／怪唔得之／怪唔之得
【三字】唔怪得／唔怪之／怪唔之／怪唔得／怪之得

最近有人問起，四字版嗰四個講法，邊個先至啱。我要強調呢啲嘢唔會有一個係「絕對正確」。語言隨時間演變，常用嘅詞有幾個講法一啲都唔奇。不過我哋都可以睇下邊個講法早啲出現，邊個講法遲啲出現嘅～。 （如果心急想知答案，可以一嘢掃落最底。）

【假設】

（一）唔怪 vs. 怪唔
首先上面嘅詞可以分做兩大類：「唔怪」行先／「怪唔」行先。前者係否定詞「唔」行先，後者係否定詞行後。香港粵語入面，動詞＋後綴呢種結構，否定嘅形態有啲不規則嘅（或者係受到各地語言同書面中文（官話中文）影響嘅緣故）：有時同述補結構（述語＋補語，好似做好、食飽、辦妥等等）一樣，會插喺動詞後面，好似 (1)；有時會放喺動詞前面，好似 (2) 噉。

(1)　做完：做唔完　做晒：做唔晒　做好：做唔好　做到：做唔到
(2)　做到：唔做到　做得：唔做得　做過：冇做過　做咗：冇做到

其中「做到 dou2」係兩個形式都得，今時今日少咗人講「唔」＋動詞＋「到」。不過呢個用法喺電影語料都出現過，例如：「點解唔見到嘅…… 你哋見嘛？」（千方百計搶財神 梁醒波 ），而唔一定要係「見唔到」。

至於雖然「V ＋ 不得」 嘅結構喺古文有出現（好似「求之不得」），現代粵語亦有「巴不得」「恨不得」「而不得」呢啲用法。不過將「不」變做「唔」似乎唔常見。所以我會假設，「唔怪＿＿」呢種將否定詞放動詞前面嘅用法，係舊啲嘅講法，「怪唔＿＿」係受普通話／書面語語法影響嘅講法。

（二）得之 vs. 之得
粵語有將「之」字或者其他虛詞插入詞中、加喺詞尾嘅用法 (3)。

(3)　固然：固之然　忽然間：忽然之間　然後：然之後　非常：非常之　十分：十分之　不過：之不過

可以想像假如本身係 「唔怪得」，可能係好似「忽然間」「固然」噉，加咗個「之」字喺尾二，變咗做「唔怪之得」。由於「之」喺度可有可無，而且出現嘅位置變化幾大，所以我會假設一開始冇「之」，後尾有人講嗰陣加個「之」喺度。

網上有啲討論會問究竟隻字係寫「之」定「知」。我相信係因為「～之得」實在太奇怪，所以大家「再分析」，將佢變做「唔怪得」＋「知」呢個結構，所以理解咗做「知」，好似「話」字噉，可能係一個標句詞，用嚟帶出後面嘅訊息。

總結以上嘅猜測，就係「唔怪得」出現先，之後出現加插「之」嘅講法，變成「唔怪得之」同「唔怪之得」，之後有啲人受到普通話／書面中文影響，將「唔」後移，變成「怪唔得之」或者「怪唔之得」。

「～之得」同「～得之」出現嘅先後，就要睇詞典同語料庫去確認。

【資料】
字典類：
除咗網上字典 CantoDict (2009年錄入）之外，完全冇字典收錄過「怪唔⋯⋯」。其餘字典嘅收錄見下表：

唔怪得／唔怪得之／唔怪之得／怪之得

Meyer & Wempe (1935) x / x / x / x
Sydney Lau (1970) o / x / x / x
Parker Huang (1970) o / x / x / x
白宛如 (1998) o / o / x / x
Hutton & Bolton (2005) o / x / x / x
千島英一 (2005) o / o / o / o
饒秉才等 (2009) o / x / o / o

單憑字典只可以確認「唔怪得之」最遲 1998年已經有。所以我哋嘗試搵埋語料庫，睇下有冇實際語料。

語料庫類：
二十世紀有啲早期嘅粵語資料，主要係傳教士寫俾人學中文或者廣東話用。其中 1841 年嘅《Chinese Chrestomathy in the Canton Dialect》就有呢句：
「噯呀唔怪得佢歸隱咯好話亦係因身體有的唔爽故此畨去嘅」

新啲嘅語料已經去到五十年代，有「唔怪得」，亦都有「唔怪之得」

錯燒龍鳳燭 (1954) directed by 龍圖 執導
梁醒波 ：喔 ～ 唔怪得 喇 ， 成日 有人 認錯 我 係 你 呀 ！ 成日 追 我 攞 租 喎 ！ 重有 添呀 ！ 搞到 我 娶 老婆 都 ……

標準丈夫 (1965) directed by 盧雨岐 執導
張英才：哦 ～ 唔怪之得 咁 厲害 喇 ！

千方百計搶財神 (1962) directed by 張帆 執導
譚蘭卿：唔怪之得 會 眨眼 喇 ！

九十年代嘅口語資料入面，呢個大概二十萬字嘅口語語料庫有五個呢類嘅表現。
唔怪得（1次）「唔怪得啦。」
唔怪知（2次）「唔怪知你噉大逆不道講啲噉嘅嘢嘅。」「唔怪知咁憎佢。」
唔怪得知（2次）「噉唔怪得知啦。」「唔怪得知我哋電視唔係好成功。」

睇落九十年代好似冇咗「唔怪之得」，不過資料太少，唔可以確認係年代嘅轉變。

【簡單分析】
結合上面嘅資料，我相信大概嘅輪廓係：

① 本身有「唔怪得」；
② 開始有人加插「之」，變成「唔怪之得」；
③ 有人省略「唔」，變成「怪之得」 （喺舊啲嘅詞典見到）；
④ 九十年代有人講 「唔怪得之」，可能係 因為「～之得」太古怪，所以再分析咗做「唔怪得」＋「知」，亦有人將「得」字省略變成「唔怪之／知」；
⑤ 有人仿照「～不得」又或者普通話「V 不得」嘅語法，將「唔」字褪後，變成「怪唔～」嘅順序。

按照推論，出現次序依次應該係「唔怪得」＞「唔怪之得」＞「怪之得」＞「唔怪得之」＞「怪唔得」「怪唔之得」「怪唔得之」。

即係四個入面，「唔怪之得」應該係最早出現嘅。

至於用邊個好，大家鍾意就得。

－－－－
參考資料

語料庫
早期廣東話口語材料 http://pvs0001.ust.hk/Candbase/intro/intro1.html
香港二十世紀中期粵語語料庫 http://corpus.ied.edu.hk/hkcc/corpus
香港粵語語料庫 compling.hss.ntu.edu.sg/hkcancor/

字典

Huang, P. (1970). Cantonese Dictionary: Cantonese-English, English-Cantonese.
Hutton, C., & Bolton, K. (2005). A dictionary of Cantonese slang: the language of Hong Kong movies, street gangs and city life.
Meyer, B., & Wempe, T. (1935). The student’s Cantonese-English dictionary.
Lau, S. (1977). A practical Cantonese-English dictionary.
千島英一. (2005). 東方広東語辞典. 東方書店.
饒秉才、歐陽覺亞、周無忌 (2009) 廣州話方言詞典（修訂版）. 商務印書館.
白宛如 (1998). 廣州方言詞典. 江蘇教育出版社.

CantoDict
唔怪之得 ／ var. 唔怪得之 http://www.cantonese.sheik.co.uk/dictionary/words/1375/ (added 2004)
怪唔之得 http://www.cantonese.sheik.co.uk/dictionary/words/50990/ (added 2009)