《撐廣東話都要講道理》

廣東話，係香港人引以為傲嘅語言（好似係）。好多大話廣東話用字古雅，而言發音暗合唐宋古音，用嚟吟誦詩詞就最啱。有更甚者，有所謂學術泰斗（當然熟廣東話嘅我哋都知道佢只係一件撚人）仲因為「廣東話暗合唐宋古音」而直接用宋代韻書去「考證」廣東話正音；何賊文匯雖仆街，但至少佢作都作到理由出嚟用《廣韻》去同廣東話正音──即係搵本千幾年前嘅洛陽話定建康音再溝啲開封話攪埋一碟嘅官訂韻書去話你知二十一世紀個「打」字應該讀「頂」。然而，坊間更多係流傳一啲廣東話嘅奇異傳說，例如以下呢個：

（為免張圖周圍傳又變奇異傳說，我決定加工下先放上嚟）

香港人梗係要撐廣東話，要千秋萬代都仲講緊廣東話；但要撐起廣東話，係唔係就要製造好似上面呢啲咁嘅廣東話異聞出嚟呢？

現時網上流傳嘅廣東話異聞，不外乎以下幾種：

1. 廣東話就係古代人嘅語言；
2. 普通話唔係中文；
3. 各式各樣嘅廣東話正字表。

當然，要好似上圖咁講到連閩南話都係粵語嘅一種都幾罕見，不過亂講嘢真係因住畀人撲你阿母草枝擺啦……

都簡單解釋下。首先，點解話廣東話「唔係」古代人嘅語言呢？我唔講音韻變化嗰啲高深嘢先，我哋就睇下一啲古代人留低嘅口語紀錄。

「當日晌午時分，走得肚中飢渴，望見前面有一個酒店，挑著一面招旗在門前，上頭寫著五個字道：『三碗不過岡。』武松入到裏面坐下，把哨棒倚了，叫道：『主人家，快把酒來喫。』只見店主人把三隻碗，一雙箸，一碟熟菜，放在武松面前，滿滿篩一碗酒來。武松拿起碗一飲而盡，叫道：『這酒好生有氣力！主人家，有飽肚的，買些喫酒。』酒家道：『只有熟牛肉。』武松道：『好的切二三斤來喫酒。』店家去裏面切出二斤熟牛肉，做一大盤子，將來放在武松面前。」──《水滸傳·第二十二回》

章回小說出自話本，話本即榕樹頭講故手上嗰份講稿，為方便講故，自然用口語寫成。如果廣東話真係古人口語，點解《水滸傳》係用官話寫成嘅呢？如果嫌明朝作品太近，不如又退到宋朝：

「先看大學，次語孟，次中庸。果然下工夫，句句字字，涵泳切己，看得透徹，一生受用不盡。只怕人不下工，雖多讀古人書，無益。書只是明得道理，卻要人做出書中所說聖賢工夫來。若果看此數書，他書可一見而決矣。」──《朱子語類·卷十四·大學一》

何賊好用宋人書說今人音，但睇《朱子語類》一書，記朱熹同門人對答，當然就係以口語寫成。但宋人口語，就以上面選段睇，最多講係有「若果」一詞係廣東話依家會用，但選文用「看」唔用「睇」、用「不」唔用「唔」，斷估都唔會係宋朝廷要推普通話推到朱熹都唔識講「睇」字卦？

咁睇，廣東話又點會係古人語言呢？相比之下，可能今日普通話，抽走共產黨污染嘅黨八股同怪詞，都仲比較似古人口語。至於講發音，廣東話自唐宋出現亦都歷經音變，大體上嚟簡單對比，廣東話保留中古音系輔音比較完整（聲母以四聲分陰陽嘅形式保留、韻尾保持中古音六個輔音韻尾），而官話就保留元音比較完整。例如話，廣東話 oe 同 eo 兩個元音，其實係消失咗嘅介音演變而成。

再者，廣東話係唔係古人語言，同我哋今人要唔要支持住廣東話、傳承廣東話，係冇關係。我哋今日要撐廣東話嘅原因好簡單，就係因為我哋自出娘胎就係講廣東話嘅香港人，就算係要認自己係中國人，唔好意思，過咗南嶺五座山嘅人都覺得你只不過係帶有馬來血統嘅雜種中國人──廣東人。廣東人講咩話？廣東話囉。

要撐廣東話，我哋要做嘅唔係去發明咩言論去抬高自己、貶低其他人，而係正正經經去面對廣東話，唔好話咩請菲傭湊仔學英文；男嘅唔好娶個又要嫁你又唔學廣東話嘅女人；女嘅唔好用「BB你drink唔drink milk milk」嚟教仔，就已經功德無量；未生仔嘅，學啲廣東話知識再聯絡粵典睇下幫唔幫到手；勇氣夠嘅，身體力行加入反對普教中行列。其實我哋講廣東話嘅人口，全球不下千萬，只要我哋一齊出力救亡，廣東話一定能夠生存落嚟。既然如此，我哋亂咁傳廣東話奇聞根本就冇意義，因為對傳承廣東話一啲幫助都冇，反而招人口實，令廣東話淪為笑柄。

講到呢度，依然要傳播廣東話奇聞嘅人，屢勸不改，兼夾惡言相向嘅話，我都只能送四隻字畀佢哋啦：騎馬過海。