《無趣嘅遊戲之中，woke就係唯一嘅特點》

呢排fb睇到啲post，見到大家對ubisoft落井下石，我係相當之心涼。我由Far Cry Primal開始俾佢伏到依家，一路望住個系列越玩越爛，程度比起assassin creed系列係有過之而無不及。之不過，睇到面書啲人屌得咁盡興，原來就係反芻啲白鬼嗰句「go woke go broke」，多少都會低b到有啲尷尬。

我覺得ubisoft又好，sony又好，呢兩間大廠連連蝕上億嘅程度，呢件事本身係好難單純以「左膠被市場反噬」一言蔽之。背後其實同10年前mmo崩盤一樣，係一件遊戲大廠集體錯判市場預期而過渡失敗嘅事故，之不過有人炒車炒到車毀人亡，有啲就人冇事就當冇發生過噉解。

商業製作，講到尾都係個錢字。3A級製作，每隻大作郁啲就要幾千萬美仔，去到對上ubisoft隻skull and bones聲稱自己二億美元budget，遊戲公司首要考量就係點回水，亦即係點賣出最多隻game又或者，對服務型遊戲嘅話，點樣唔惹眾怒之下，壓榨出最多課金。

2010年後，遊戲玩家年齡層拉長，唔再開始九十年代咁，清一色學生黨，意味住購買同遊玩習慣開始多樣化。就以二十五至三十歲呢個消費群組為例，佢哋有正職，有消費能力但空餘時間有限而分散，莫講話好似啲後生噉日煲夜煲，安安靜靜坐低三四個鍾其實都好奢侈。除此之外，對玩家嘅技術要求都唔可以好似街機時代咁苛刻，一係教程做得好，一係就對技術嚴格，但對失敗寬容，而ubisoft同sony，就選擇拉低遊戲複雜性，以最簡單，最直觀嘅玩法同系統，去吸納最多玩家。

教程做得好係最難，就好似ux design噉，你要當所有用家都係白痴，都會令到個系統炒粉，所以個方向就係要做一個「盡量令人唔好撳錯制」嘅誘導。遊戲教程其實都差唔多，不過加多兩個限制：一，盡可能潛移默化，等玩家有一種自己破解謎題嘅感覺，而唔係設計者刻意引導；二，盡量要有回頭路，就算玩家失敗都好，可以有挫敗感，但失敗嘅成本要盡量壓低，噉先鼓勵到佢哋嘗試。呢方面，portal頭十五關堪稱業界典範。

dark souls系列大家都覺得好難玩好要求技術，但事實上，從demon souls去到dark souls 3，又或者隻狼法環之類，每次死亡（亦即玩家失敗）嘅代價越來越細之餘，個代價嘅逆轉性亦都越來越高，甚少會好似真女神轉生舊作噉，一配錯點用錯角，輕則要再磨十幾廿個鐘，重則要砍掉重煉。玩家要自我催眠自己死係因為技術差或者唔夠level而屢戰屢敗，唔係話因為玩家自己夠毅力鐵柱磨成針，而係響製作層面，判定顯得公平，再而對「挫敗感」同「征服嘅快感」兩者取得平衡。

好喇，講咁耐，屌，噉點解ubi同soft電腦大爆炸呀？我覺得係佢哋為咗受眾最大化，而刻意無視上述嗰兩項，強制將遊戲系統變成佢哋眼中「啱最多人玩」嘅形狀。成件事唔單只係爛game，其實連啲備受推崇嘅「名作」中有跡可尋。

2018年god of war，大家津津樂道，個故事好正，啲畫質好好，戰鬥好爽etc，但基本上每次解謎，停一兩分鐘，你個仔或者條腰上個人頭，就會開始不停提示。所有有丁點難度嘅boss都係隱藏boss，一般玩家唔特登去打，都無礙佢哋爆機。好聽啲講，要辣要唔辣，任君選擇。難聽啲講，你對成個系統只需要有五六成掌握，就可以同最終boss磨到佢跪低為止。

far cry 4，ubisoft開放世界沙盒開始成形，打據點，整武器，狩獵搶車，「個世界就係你既遊樂場」嘅系統，響呢集開始固化成形，往後亦只係越來越簡單。第二集嘅火災系統，第三集嘅打獵升級，往後亦買少見少。前者太混亂複雜，玩家難以控制，後者太消耗時間，拉長咗個gameplay loop 。

以上兩者都只係鳳毛麟角，「大作成本越來越高，所以cap水越來越難」，呢個係成個業界面對嘅課題嚟。呢五六年亦唔止ubi同 sony屢屢碰壁：cuyberpunk一出廠又多bug，個開放世界一開頭話車戰，又話自由選項，結果全部空頭支票，靠嘅係劇情補救同往後兩年cd projekt員工每晚加班；Fallout 系列，new vegas玩家望住bethesda由3，4，到76逐漸墮落，無不痛心疾首；就連red dead redemption 2，rockstar 名作，大家以為必屬佳品，去到online mode同gta 5根本係冇得比。

臆想出一個原本唔存在嘅「大眾口味」，然後刻意迎合，背後係成本同顧客考量下，呢兩間大廠某啲高管嘅答案，結果就係遊戲玩起上嚟無乜深度，感覺唔到設計者嘅心思，空有美術細節，但就好似去迪士尼冇得坐過山車噉嘅扁平體驗。如是者，啲人屌「政治正確」、「sweet baby摧毀文化」、「左膠亂政」其實亦都唔係冇道理，因為響無趣嘅遊戲之中，woke就係唯一嘅特點。

ps：我係預訂界燈神，留意開/預訂嘅，十有六七會伏到喊。vampire bloodlines 2轉咗製作組之後電腦大爆炸，啱啱出early access嘅forever winter表現平平，真係懷疑自己係咪中咗降頭。