《文字印鈔機倪匡》

好多人成日比較金庸倪匡黃霑蔡瀾，究竟邊個文采更好，成就更高。依家此等話題，又旋即炸開左各大討論區。情況同間唔中就有人開 Post 問究竟孫悟空打唔打得贏一拳超人，或者會長其實有無機會贏到蟻王一樣。

極多人話倪匡寫野濫竽充數，虎頭蛇尾，有啲甚至完全違反基本現實，覺得佢同坐擁十數部武林經典環環相扣配合埋中國歷史改朝換代既金庸，難以相提並論。第一，熟悉倪匡既都知道，早係評金庸小說時，佢已經斷八字真言話金庸小說「古今中外，空前絕後」，所以佢自己一早已經認左「低威」，根本無必要同昔日前「九流」老闆爭一日長短。當然背後有幾多係擦鞋，有幾多係真心，我地旁人亦無法深究。

第二，金庸其餘數人，都有家底甚至屋企係望族，本來就同走難南下本身一無所有千山萬水偷渡黎既倪匡，無法比較。倪匡笑嘻嘻，一開始賣得文字討生活果刻起，得閒理鬼你甚麼文學價值。大家鍾意，即管留供後世繼續拗個你死我活就好。就等於有人當年前質問佢：

你寫既根本唔係科幻小說，背後毫無科學根據！佢老人家答：「我寫既科幻，科學幻想，著重既係幻想，天馬行空就得。」慘得過紙紙風行，個個睇到廢寢忘餐。小說只分好睇唔好睇兩種。佢只寫好睇果一種。我自己滿身銅臭，所以相比咩文學價值咁看不見摸不著，不如講番啲真實量度得到既：

例如，佢好大機會係當代寫中文字最多以謀取生活既人，甚至係靠爬格搵最多錢既人。佢一直都強調自己除左寫野，一無所識，要不斷寫就係為醫肚，就係咁簡單。

金庸除左寫武俠小說取得巨匠地位，佢做生意了得，搞到明報有聲有色，亦從政追求和而不同（呢樣亦係後世對佢最撻伐既地方）；霑叔以度橋廣告創作致富，一直係演藝界，尤其是填詞作曲、現在流行樂混合中樂取得非常驕人成就；蔡瀾一直花花宇宙，電影製片推廣到日本以至東南亞，佢談食談旅遊談風月，亦受到廣大市民所歡迎，甚至早係日本泡沫爆破既經濟極盛期，以香港食家身份擔任料理鐵人既評判，以語言辛辣見稱。其他人都係各方面各收勝場，唯獨倪匡——

多年黎獨沽一味，但佢曾經話佢寫劇本同專欄小說，版稅連稿費當年年入過百萬，以當時既物價黎講，係極為驚人既數字。呢樣野我亦都幾肯定，香港文壇亦後無來者（迴響唔會執笠再講）。

倪匡寫字之快，係未有電腦既時代，係要有專人辯認佢龍飛鳳舞既筆跡。當年，佢既電影劇本，就係信心保證，可以賣埠。金庸經常醉心將自己既作品改完又改，盡善盡美；倪匡就大開大合，寫左就算，就算故事再荒誕，再不合常規，但就係受歡迎，就係有人睇，所以佢一字不改，亦都唔鍾意人改劇本，否則必然，破口大罵不歡而散。

印象中記得有文章講過，倪匡甚至先收錢，後交貨，但絕對準時，永不拖稿！此人不單文字生成器，甚至係文字印鈔機。我地呢啲後輩，叫做寫下垃圾文，但談唔起咩流行，商業價值，即係老套講一句：挽鞋都唔配啦。蝦兵蟹將，竟敢係黃藥師周伯通面前指手劃腳，華山論劍？真搞笑。

除左搵錢，文人最後都係講態度，即係所謂既風骨。正如討論區既人講，反政府既人世界各地不少，但係出左名搵到錢，係咪都仲可以堅持到自己既立場？定還是繼續見駛盡𢃇，續為五斗米而折腰？倪匡好彩成名之時，身邊充滿住自由既空氣。佢話佢多年來既創作，當時一直不受任何制約同埋干擾。佢自己一早已經生活無憂，當然不用再追名逐利而自貶身價。另外，佢不怕死，二千年返得黎香港，更加應該一早已經看破生死，呢個同佢當年被通緝東躲西藏，大概已經同死過一次無分別既經歷有關。

好多人都話佢睇得透，咁梗係。刀都已經曾經離自己條頸不過分丈開外，邊個仲會睇得唔夠透？話佢係薄有文名已經不足以形容之，衞斯理同倪匡一早係等號，聲名遠播，家傳戶曉，正所謂人怕出名，仍然可以堅持自己既立場咁多年，由八十年代，講到九十年代，再由千禧年代，講到臨死仍然都無變。呢一樣野真係當代香港文壇所罕見。

依家倪匡歸天，甚至有人言語尖酸話，尚在人世既蔡瀾根本胸無實學，難與其餘幾位才子齊名。所謂香江四大才子，大概都係傳媒果陣安插穿鑿以引為美談，寫起上亦方便夠有噱頭。我斷估佢地幾位都唔好對呢啲虛名，有乜野咁有興趣。如果幾位老人他日在泉下碰杯，同古龍等昔人好友暢聚，必然哈哈大笑，覺得此等論爭，實在無謂之極：

金庸會笑而不語；黃霑會照樣一輪粗口哈哈哈哈哈；蔡瀾可能會嗯哼哼哼飲佢既白蘭地，一臉懶洋洋；倪匡可能會繼續機關槍講一大堆野然後根本無人聽得明仍講乜。。。

一切俱往矣。