《西班牙人其實工時好長，仲要做足五日》

西班牙人其實工時好長，仲要做足五日

雖然我哋成日以為西班牙人好懶，左翼又多，但係「四天工作」其實發展遲緩。截至2022年6月，全國只有廿幾間公司申報實行「四天工作糧照出」制度。大公司如電訊商Telefónica同時裝品牌Desigual，員工如果要求返少日工，出糧就會相應打折。

工業部2022年推展試行計劃，為150間企業提供資助，睇下喺人工不變、工作日數減少嘅情況下，公司（尤其中小企）生產力同利潤維唔維持到。呢個千萬歐羅計劃幕後推手係左翼政黨Más País（粵音近「媽s罷依s」），作為支持國家財政預算嘅條件。攞到數據之後，下一步就係研究呢個模式係咪不論員工人數、老闆態度等等，適用於多數公司，成為新標準。

事實上，西班牙人平均每年工時係1,577個鐘，比德國同英國都多200幾個鐘，但生產力反而落後。呢個情況固然可以歸咎西班牙仍然有相當大嘅勞動力密集產業，而且好多中小企喺人手方面嘅彈性唔大；不過據報導，好多人自從試過四天工作之後，就發現以前只係將啲工作拖長嚟做，要爽手啲四日內搞掂，其實唔難。

西班牙《國家報》訪問咗一啲四天工作嘅打工仔，佢哋不約而同話返唔到轉頭，甚至話如果有其他公司挖角，就要雙倍人工先彌補到返多嗰一日，似乎呢個政策喺挽留員工方面非常成功。亦都有人表示，最初覺得自己已經有好大自由度管理時間，安排一個禮拜五日邊日做多邊日做少，特登放多日假係多此一舉，後來先明白到，唯有進入「禮拜五我真係正經放假」嘅思維，先會令同事、客戶習慣呢個工作安排，自己真正享受自由嘅時刻。四日嘅工作更加密集緊湊，連飯鐘都短咗（講緊由個半鐘縮短到一個鐘），但係大部份人都覺得完全值得；其中一間公司嘅配合同推動方法，就係將開會時間限制至廿分鐘，相信好多人會覺得唔止係「德政」，直頭係「福音」。唔知大家又點睇？

圖：2022年5月底，「四天工作週國際峰會」喺西班牙華倫西亞舉行
Francesc Fort, CC BY-SA 4.0, via Wikimedia Commons

文中外語為西班牙文
逢星期三、日刊登新文章