《查案的意外發現：山區文物》

查案的意外發現：山區文物

1936年7月，西班牙內戰爆發，右翼以佛朗哥為首嘅國民軍同長槍黨佔領西部同北部地區，左翼共和政府則以首都馬德里為據點，控制範圍向東南延伸。今次嘅故事發生喺北部薩拉戈薩Longás鄉鎮（左上圖）嘅山區，Malón家兩姊妹分別23同18歲，因為製作共和旗幟而被長槍黨人追殺，翻山越嶺匿埋喺個山窿裡面，但最終難逃一劫。當地嘅「恢復歷史記憶」志願組織喺2013至2020年間，利用透地雷達同金屬探測技術，確認15個測量地點，經歷五次考古考察，2017年搵返家姐Rosario遺骸，阿妹Lourdes至今仍然不知所終。

女搵唔到，但就搵到一副年輕男性遺骨（左下圖），身高1.57米，估計年齡喺20到30歲之間，放射性碳鑑定死亡年份界乎公元475至620年之間，即係西哥特王國時期。同一個遺址仲搵到燒焦嘅動物骨頭，同埋確定嚟自六至七世紀嘅陶瓷，另有玻璃、金屬碎片，大大小小總計261塊。

調查期間同時喺Peñas de Santo Domingo山頭發現庭院以及週邊半米厚嘅圍牆痕跡，向北亦似乎有直線結構同兩道倒塌嘅石牆，可能係大型嘅主建築。無論如何，遺址規模顯示呢座建築一定非常重要，應該就係11世紀嘅San Esteban de Oraste修道院遺址 —— 學者以往只係知道佢嘅存在，依家終於確定到確實位置。

金屬探測器搵到嘅文物有11至13世紀左右嘅一套錢幣、鐵製箭頭、鑲透明藍色石頭同雕飾幾何圖案嘅銅耳環，以及12至15世紀間製成嘅橢圓鐵製皮帶扣。出土嘅一塊金屬鐘碎片上面，刻有僧人着禮服拎住搖鐘嘅圖像（右圖），相信以1095年成立嘅聖安東尼騎士團成員為藍本。專家相信呢個聚居地一直活躍，直到1836年國家將教會財產沒收先至消失，又喺整整100年後，見證另一段歷史：戰爭暴行。

左上圖：Google Maps截圖
左下及右圖：El País新聞圖片

文中外語為西班牙文
逢星期三、日刊登新文章