《羅曼式藝術》
羅曼式藝術：歷史背景
羅曼藝術 (arte románico) 亦都稱為羅馬式藝術，起源於11世紀晚期，12世紀最為鼎盛，係繼羅馬帝國建築之後，西歐各地第一個共通嘅藝術風格，最明顯見於教堂建築。噉樣嘅發展，得益於一連串嘅歷史趨勢。
宗教同文化方面，耶教成為歐洲主流，思想逐漸統一；尤其耶教世界跨過第一個千禧年、冇出現世界末日，有一種感恩還神嘅心理，對宗教更加熱衷。修會崛起，備受尊崇，捐獻源源不絕，修道院同教堂越起越多，入面嘅裝飾擺設越嚟越精緻。本篤會修士尤其精於研習文獻古籍，各地大學亦慢慢成形，學者重新發現古典希臘同羅馬文本，促成12世紀嘅知識同文藝復興。
社會同經濟方面，十字軍東征雖然多數失敗，但就引起歐洲人對東方物質文化嘅興趣，商貿往來令商人、工匠階級冒起，城市化加速，建築同工藝技術越嚟越好之餘，亦都有足夠嘅人口密度支持教堂營運。加上農業生產進步，無論城鄉，經濟條件有改善，自然有閒暇同餘錢鑽研藝術。
西班牙處於西歐邊陲，今次喺藝術上同歐洲大陸「接軌」，幾乎全靠一股「朝聖風」。除咗耶路撒冷同羅馬，伊比利亞半島西北角加利西亞 (Galicia) 嘅Santiago de Compostela都係基督教聖地。相傳聖雅各遺骨喺度落葬，城市亦因而以佢為名。嚟自歐陸嘅「聖雅各之路」（Camino de Santiago，上圖）朝聖者會經法國進入伊比利亞半島，由東至西橫越西班牙北部，嚟到Santiago嘅主教座堂（下圖）。頻繁嘅人客往來同知識嘅交流，令羅曼藝術得以喺基督教西班牙傳播 —— 特色下次研究。
文中外語為西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)
================
羅曼式建築：特色
宗教係中世紀歐洲生活嘅重心，宗教建築當然就係當時藝術嘅最高體現。教堂係精神世界嘅縮影，象徵意義非常大。最常見嘅平面規格係拉丁十字形（cruz latina，右圖），代表耶穌基督受難身死嘅地方；十字縱軸頭短尾長，主祭壇所在嘅「頭」(cabecera) 向東，信徒從西邊嘅十字「尾」進入教堂向祭壇東進，象徵走向陽光初現嘅地方，敬拜萬物之源嘅上帝。
伊比利亞半島上，聖雅各朝聖之路 [1] 早段嘅Jaca（粵音近「哈㗎」）主教座堂，係西班牙東北阿拉貢地區第一間羅曼式教堂，亦係伊比利亞半島最早嘅羅曼式教堂之一；一路向西，Palencia（粵音近「罷𡃁時牙」）、利翁 (León) 等地，都有11世紀始建嘅教堂，連終點嘅Santiago de Compostela主教座堂本身，亦都係呢個時期嘅產物。呢個風格嘅主要特色有：
- 用大石興建，牆身厚重緊密，外有方柱形扶壁 (contrafuertes) 加固（左上圖）；
- 以粗大嘅複合石柱同半圓拱支撐覆蓋教堂嘅拱頂同對應十字交叉點 (crucero) 嘅燈籠塔 (cimborrio)；前者可以分為半圓筒形拱頂 (bóveda de cañón)、交叉拱頂（bóveda de arista，左下圖）、半圓頂 (bóveda de cuarto de esfera) 等，後者係教堂樓底最高嘅地方，有採光嘅用途；
- 教堂通常劃分出三道中廊 (nave)，中間一道起得最闊、最高，方便採光，兩邊嘅相對窄、矮、暗，縱切面大致係等邊三角形，高度不及底邊闊度，呢個輪廓比例稱為ad triangulum。
各地嘅羅曼式教堂經過近一千年嘅修葺、加建，好多已經混合咗幾種風格，大家去到未必好清楚辨認到，但都可以考下眼力，搵下仲有冇咩蛛絲馬跡。
[1] 見上篇〈羅曼式藝術：歷史背景〉
https://www.facebook.com/JudyLeeLinguist/posts/1518384905252666
================
羅曼式教堂特例：人潮管制
相傳耶穌十二門徒之一嘅雅各將福音傳到伊比利亞半島，喺薩拉戈薩見到當時仍然在生嘅瑪利亞首次顯現後，毅然返到耶路撒冷殉道，遺骨由徒弟帶返故地落葬。陵墓隱沒八個世紀後先被發現，經歷原地修建同改建聖殿、小教堂、前羅曼式教堂 [1] 之後，公元997年因為科多巴哈里發國權相Almanzor [2] 入侵而付之一炬。
現有嘅Santiago de Compostela大教堂始建於1075年，年代上係羅曼時期，天花都仲係半圓、滾筒式，並以橫肋拱 (arco de fajón) 支撐，不過由於地位特殊，除咗規模巨大之外，仲發展咗一啲配合朝聖教堂功能嘅特色，甚至影響後來嘅教堂建築。首先，為咗顧及朝聖嘅大量人流，十字交叉以東、環繞主祭壇嘅部份開多咗一條通道，稱為girola或deambulatorio，沿路輻射式向外設置小教堂 (capilla) 同聖器室 (sacristía)，信眾可以順暢噉行勻教堂各處欣賞聖物同敬拜，而唔影響中間舉行彌撒或其他儀式。
第二個特色係從西側進入教堂之後，會見到左右兩邊走廊起咗上層拱廊，好似多咗個露台噉，又有啲似音樂廳嘅廂座。呢個結構叫做tribuna或者triforio，又係為咗容納多啲人而設嘅，甚至可以為朝聖者提供臨時棲身之所。喺度可以睇到，教堂向上發展嘅技術已經漸趨成熟，算係之後又高又尖嘅哥德式教堂嘅基礎，不過拱廊就慢慢縮水成為窄道甚至盲拱廊，唔能夠通行。無論如何，呢兩個新猷以後會成為哥德式教堂嘅必備配套。
右圖：Lansbricae, CC BY-SA 2.0, via Wikimedia Commons
[1] 見〈前羅曼式教堂San Miguel de Lillo〉
https://www.facebook.com/JudyLeeLinguist/posts/1218526375238522
[2] 見〈科多巴清真寺大教堂（四）：今日規模〉
https://www.facebook.com/JudyLeeLinguist/posts/1213858925705267
==================
羅曼式藝術：雕塑
羅曼雕塑通常附屬於建築，主要係宗教圖象，尤其係新舊約聖經嘅場景，有時亦都有世俗嘅表現，例如動植物、日常生活甚至情色內容。作品嘅主要功能係宗教教育 —— 以前識字嘅人好少，雕塑同繪畫就成為「窮人聖經」，向大眾傳道。
羅曼式雕塑有以下幾個特點，大家喺參觀教堂嘅時候可以特別注意：
- 構圖完全遷就建築空間，唔會突出劃好嘅範圍；
- 圖案完全填滿表面，恐懼留白（拉丁文稱horror vacui，[1]）；
- Hieratismo：人物面容嚴肅生硬，唔傳遞任何感情；
- 按ley de frontalidad及ley de simetría兩條法則，人像必以正面示人，簡單嘅輪廓沿中軸鎅開，左右兩邊大致對稱。
Santiago de Compostela嘅教堂外部，就係觀察羅曼式雕塑嘅最佳去處。南門（即十字形右臂）喺1103至1117年間建造，兩道門楣上方半圓形嘅位置稱為tímpano（中譯「龕楣」），左邊一組描繪耶穌基督受魔鬼誘惑，可以見到構圖最右、揸住骷髏頭嘅半裸女人（左上圖），半把頭髮同左膊因為貼近半圓界限而犧牲咗，冇雕到出嚟；右邊龕楣雕塑則呈現耶穌出世時，東方三博士來朝嘅景象，以及耶穌受難嘅幾個情節。
西側入口嘅「榮光柱廊」（Pórtico de Gloria，下圖）亦都佈滿門徒同聖人嘅雕像，由於落成時期較後（1188年），可以觀察到風格開始脫離舊有羅曼特色，某啲人面有少少微笑。呢啲細節都值得花時間細心欣賞，大家唔好參觀完教堂入面就走咗去。
[1] 另見〈文藝復興在西班牙： #密集恐懼症 慎入〉
https://www.facebook.com/JudyLeeLinguist/posts/1320548025036356
左上圖：Alma, CC BY-SA 3.0, via Wikimedia Commons
右上圖：Amadalvarez, CC BY-SA 3.0, via Wikimedia Commons
下圖：西班牙畫家Jenaro Pérez Villaamil 1849年作品
除另外註明，文中外語為西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)
相關文章
羅曼式藝術：歷史背景
https://www.facebook.com/JudyLeeLinguist/posts/1518384905252666
羅曼式建築：特色
https://www.facebook.com/JudyLeeLinguist/posts/1520519931705830
羅曼式教堂特例：人潮管制
https://www.facebook.com/JudyLeeLinguist/posts/1523298658094624
=============
羅曼式藝術：繪畫
羅曼畫作同雕塑一樣，充當「文盲聖經」，係教育嘅媒介，喺題材、構圖、人物描畫方面，特色基本上同雕塑大同小異，不贅 [1]。受知識同技術所限，畫作嘅用色同線條都比較簡單平淡，整體缺乏空間感、透視感、深淺光影同遠近比例，所有嘢堆喺同一個平面度，以單純、冇混雜嘅色調表現出嚟。呢類作品保存得最好嘅，係各地同時期建築物裡面嘅濕壁畫 (frescos)，製作時以水性顏料喺濕灰泥上面繪畫，灰泥乾咗之後，圖畫就隨之長久保存。
加泰隆尼亞國家藝術館 (MNAC) 藏有接壤法國嘅山區San Clemente de Tahull（加泰語稱Sant Climent de Taüll）教堂嘅半圓壁龕畫（左圖），係歐洲羅曼藝術嘅傑作。作品命名Pantocrátor，得自畫中「全能者耶穌」嘅形象：右手做出降福手勢，左手揸住福音書，上面有EGO SUM LUX MUNDI「我係世界之光」字樣。圍繞耶穌嘅係四福音書作者連同佢哋嘅象徵動物，再下一層係幾位聖人嘅全身像。
10至12世紀利翁王國 (Reino de León) 嘅先王祠 (panteón) 位處利翁Real Colegiata Basílica de San Isidoro學院教堂地下室，係超過30位國王、王后、王子同宗室入土為安之所，天花拱頂就佈滿羅曼式畫作（右圖）。正如之前所及，作品內容不限於宗教，亦都有生活題材，下次會同大家介紹呢度嘅「農家月曆」。
[1] 見上篇〈羅曼式藝術：雕塑〉
https://www.facebook.com/JudyLeeLinguist/posts/1525289901228833
左圖：Kippelboy, CC BY-SA 3.0, via Wikimedia Commons
右圖：Megginede, CC BY-SA 4.0, via Wikimedia Commons
除另外註明，文中外語為西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)
===============
羅曼式藝術：León「農家月曆」（上）
利翁Real Colegiata Basílica de San Isidoro學院教堂地下室係先王祠堂，比起同時期嘅普通宗教建築感覺奢華得多，牆身、圓拱、穹頂都佈滿雕塑同畫作。今次同大家欣賞其中一套作品：1170年左右完成嘅El calendario agrícola中文直譯「農曆」，有時亦都稱為mensario（月曆），由12幅圓形圖畫組成，各代表每個月合時嘅活動，反映中世紀西班牙中北部鄉郊社會嘅生活。
（圖中由左至右、上至下）
一月以羅馬神祇雅努斯命名，佢嘅形象係前後兩塊面，喺圖畫裡面對應兩間屋，代表一年之初需要決定全年嘅方向。
二月非常寒冷，病弱老人將手腳靠近火種取暖。三月係時候修剪藤蔓，畫中人披住斗篷，用彎刀完成工作。四月係萬物滋長嘅春天，後生仔手中拎住兩棵發芽植物。
五月通常描繪成「騎士五月」，草木茂盛，馬匹不愁飲食，正係外出征戰嘅時機；畫中人為馬套上輓具準備打仗。有啲同類作品甚至畫出拳頭上嘅獵鷹，不過呢度就欠奉。
六月，畫中人用鐮刀收割第一造穀物。七月係收成高峰，畫裡面小麥嘅形狀同顏色都非常像真，鐮刀連鋸齒細節都畫咗出嚟，足證當時嘅人幾重視呢個時節。緊接嘅八月要打穀為穀物脫粒，揮動連枷 (mayal) 打爛穀穗，得出可以加工食用嘅部份。
（待續）
圖：kalendario.es
除另外註明，文中外語為西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)
=============
羅曼式藝術：León「農家月曆」（下）
（上接 https://www.facebook.com/JudyLeeLinguist/posts/1530065570751266）
九月係「葡萄成熟時」，農民用人手採摘提子，放入容器準備釀酒。十月要加緊將啲豬養肥，搖動橡樹令果實掉落，就可以餵出美味嘅伊比利亞豬；11月屠宰嘅時候捉住豬耳，用鐵鎬擊殺。
岔開少少同大家分享，西班牙文有一句諺語A todo cerdo le llega su San Martín，粵文可以譯成「隻隻豬都有『聖馬田』嘅一日」—— 講緊嘅係11月11號聖馬田日，或稱聖瑪爾定節（San Martín粵音近「傘罵癲」），係農業年度嘅終結，根據傳統智慧亦都係寒冬前最後一次好天，農民會劏豬醃製香腸、火腿，準備過冬，所以豬總係難逃一死，由此引申出「行惡嘅人終有惡報」嘅意思。最早記載呢個講法嘅文字要追溯到17世紀塞萬提斯嘅《唐吉訶德》同Francisco de Quevedo嘅El Buscón等文學黃金時期名著，但利翁先王祠呢度嘅壁畫係12世紀產物，時代早得多，反映呢個習俗由來已久。
最後，12月又係一個嚴寒嘅時節，畫中人喺一張擺好食物嘅枱前面，一路食嘢一路將腳伸向火旁邊取暖，希望盡可能捱過寒冷嘅日子。
講咗兩三個禮拜，同大家溫習一下，羅曼時期嘅雕塑同壁畫藝術，一律為建築服務，絕少有獨立嘅作品；佢哋嘅作用係教化大眾，說教嘅意味相當濃厚。介紹到呢度，羅曼時期大致完結，歐洲建築慢慢過渡到又高又尖嘅哥德風格 [1]。
[1] 見〈古城Toledo深度遊：聖母主教座堂〉
https://www.facebook.com/JudyLeeLinguist/posts/1238274723263687
圖：kalendario.es