《白色鄉鎮遊》

白色鄉鎮遊：石中村Setenil de las Bodegas

西班牙南部有好多「白色鄉鎮」(pueblos blancos)，揸車旅行嘅遊客可以沿山路逐個探訪。點解會有呢啲山頭城鎮？就係貪佢高囉！呢啲地方最高點一定有個阿拉伯城堡，以前係軍事瞭望用途，今時今日成為登高望遠嘅最佳位置；民居一路依山勢向外擴展，街道蜿蜒起伏。

其中一個比較有特色嘅pueblo blanco係卡迪斯省嘅Setenil de las Bodegas，人口不足三千，但就因為特殊嘅建築結構而吸引到好多遊客。呢個鎮仔沿「車河」河 (Río Trejo) 建造，座落峽谷兩邊，建築物直接起喺岩石之間，或者由山窿擴大而成，以山體為天然嘅天花；河兩邊嘅主要街道，亦都由山岩遮蔭。

大街名為Calle Cuevas del Sol（左圖），直譯為「太陽山窿街」，背山向南，日照較多；窄小河道對面平行嘅嗰條街，以「陰影山窿」Cueva de la Sombra為名，長期被岩石遮擋，只係一街之隔，日照就少好多。正因為巨大山體嘅影響，兩邊街道同建築物有特別嘅微氣候差異同變化，夏天相對清涼、冬天又冇咁凍。

區內其他白色鄉鎮包括Olvera、Torre Alháquime、Algodonales等等，各自距離大概十零廿分鐘車程，至於Zahara de la Sierra，雖然相對遠少少，但係就有個水塘（右圖），算係另一番風景。附近比較大、有火車站嘅城鎮係Ronda，成為旅遊樞紐當然有原因，下次同大家介紹。

文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)

=================

白色鄉鎮遊：巨型峽谷Ronda

Ronda市座落馬勒加 (Málaga) 市以西105公里，由懸崖峽谷一分為二。1793年落成嘅「新橋」係全市三條橋之中最高嘅，同谷底垂直距離120米（390呎），遊人絡繹不絕，希望將兩邊河谷嘅壯觀景色盡收眼底。官方旅店 (Parador, [1]) 一如以往霸住靚景，旅費充裕嘅可以選擇留宿，確保24小時心曠神怡。橋附近、峽谷邊沿路可以去到各個觀景台，唔畏高可以行出少少環顧270度遠近景緻（左圖）；向谷底方向行落啲會置身兩邊懸崖之間，望返上嚟又係另一番風景。

愛好文藝嘅朋友嚟到Ronda，其實係追隨緊諾貝爾文學獎得主海明威、美國電影家奧遜威爾斯 (Orson Welles)、德文詩人Rainer Maria Rilke等大人物嘅足跡。Rilke曾經旅居城內Reina Victoria酒店，住過嘅208號房仍然保留。陡峭懸崖相傳係海明威（右圖右）以西班牙內戰為背景嘅《戰地鐘聲》裡面，共和軍殘殺國民派嘅地方；佢同威爾斯兩位，都係鬥牛家族傳人Antonio Ordóñez（右圖左）嘅好友，威爾斯嘅骨灰，正正安葬喺Ordóñez屋企一口井裡面。

講起鬥牛，Ronda其實係現代西班牙鬥牛嘅發源地。18至19世紀，Romero（粵音近「糯咩羅」）家族一門三代，喺鬥牛工具、團隊規格等方面貢獻良多，孫輩Pedro Romero將鬥牛以藝術形式表現，成為鬥牛界傳奇人物。可以同「Romero王朝」媲美嘅，係先輩同樣嚟自Ronda、啱啱提過嘅Ordóñez（粵音近「餓當耶s」）家族，20世紀初至今仍然活躍。Ronda嘅鬥牛場 (Plaza de Toros) 1785年落成，係國內最歷史悠久同最靚嘅鬥牛場之一，依家除咗仍然舉辦鬥牛活動，亦開放遊客買飛參觀場地同博物館。