《世界橄欖油首都Jaén》

世界橄欖油首都Jaén

安達盧斯自治區Jaén省（粵音近「夏N」）位於內陸，個名你可能未聽過，但佢其實出產世界超過兩成嘅橄欖油，勁過意大利全國加埋。數以千萬計嘅橄欖樹遍佈大小山頭，「由上至下、左至右整齊噉排列好」，延綿幾十公里，綠色嘅樹同啡色嘅土地涇渭分明，遠景就好似被一把疏齒梳梳過噉（右上圖）。有興趣研究橄欖油嘅朋友，可以參加各種品油活動；即使只係去酒吧食tapas配麪包，啲橄欖油淋上去好似唔使錢噉，齒頰留香到不得了。

Jaén唔似一個鐘車程以外嘅格拉納達、科多巴呢啲伊斯蘭重鎮咁多遊客，所以感覺比較輕鬆。同名省會必睇嘅景點當然又係宏偉嘅主教座堂（左圖），原址當然又本身係清真寺，1246年費蘭度三世 (Fernando III) 從摩爾人手中收復Jaén後，先開始起教堂，現有嘅建築係16世紀文藝復興時期嘅產物。另一個重要景點係1913年出土、西班牙其中一個最大嘅阿拉伯浴場遺址，特色係暖浴室特別大。菱形sebka花紋（右下圖，[1]）經過修復，最終重見天日，但當年佈滿全場牆身嘅風貌，就要大家自己畀啲想像力。浴場地面係一座貴族宮室，依家改建成博物館，展出民俗文物、農具等，例如橄欖去核同榨油工具，仲有男女傳統衣飾。天台風景唔錯，行到攰可以唞下，放眼Jaén遠近景色（咪又係橄欖樹～）。

欲窮千里目，更上一層樓。想再望遠啲（即係見多啲橄欖樹），我仲有個好介紹，下篇繼續。

[1] 見〈穆斯林治下的中世紀西班牙：#密集恐懼症 慎入、哥倫布墓〉
https://www.facebook.com/JudyLeeLinguist/posts/1303764540048038
及〈深度遊精讀：La Alhambra王宮及花園藝術〉（四）及（六）
https://www.facebook.com/JudyLeeLinguist/posts/1418431455248012
https://www.facebook.com/JudyLeeLinguist/posts/1422987374792420

文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)

===============

Jaén市內短遊：#Parador、千里目

大家如果旅費充裕，或者某一兩晚想住好啲，可以考慮西班牙各地嘅Parador酒店。顧名思義，Parador係停歇 (parar) 嘅地方，而喺西班牙就係一盤由政府擁有嘅豪華旅館生意，1928年由國王阿方索十三世成立，至今已經發展到超過90間。Parador通常佔據全城最靚景嘅地方，由大座嘅歷史建築活化而成，例如修道院、城堡、王宮等等，Granada嘅Parador更加直頭喺Alhambra宮城入面，改建自15世紀嘅聖方濟各修道院。

Jaén嘅Parador位於城內極高處，原先係阿拉伯人起嘅軍事堡壘，1246年由卡斯提亞國王費蘭度三世收復，改建兼易名為Santa Catalina城堡，1960年代再擴建成呢間四星級酒店，最近一次大裝修係2020年。內櫳華麗而古雅，裝飾品有中世紀地圖、費蘭度三世畫像掛氈、騎士盔甲、當地陶瓷出品等等，兼具歷史同文化氣息。

城堡雖然獨自屹立喺山上面，但景觀並唔係酒店住客獨享嘅。經過酒店外圍會到達城堡入口，遊客可以買飛入去參觀冇改建成酒店嘅部份，但過門不入一路行到最尾，會去到全城最高點嘅地標十字架（左圖），飽覽270度景觀，連當地人都會三五成羣買定啤酒零食上嚟霸位，坐正喺十字架下面、對準燈火通明嘅大教堂吹水睇夜景（右圖）。

上一篇文章出咗之後，有網友表示Jaén省Úbeda、Baeza、Carzola各鎮仲有好多其他靚風景名勝，同朋友、屋企人夾份揸車又鍾意睇風景嘅話，不妨考慮去得偏少少，靜靜地行下山；大城市揸車泊車麻煩，就留返火車旅行先玩。

文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)

===========

Jaén：貴族宮室與阿拉伯浴場

Jaén嘅Baños Árabes係歐洲同北非夾埋最大又保存得最好嘅11世紀浴場，原址始建於科多巴哈里發國 (Califato de Córdoba) 1031年滅亡之後、泰法 (taifa, [1]) 崛起之時，喺一個世紀後嘅摩哈德王朝時期 [2] 重新裝修，1246年基督教國王費蘭度三世收復Jaén後仍然沿用，至15世紀改為皮革廠。16世紀後期，Villardompardo伯爵、秘魯總督費蘭度托利斯Fernando Torres de Portugal y Mesía喺上面興建大宅，今時今日仍然屹立，是為「Palacio de Villardompardo」。浴場1913年喺考察歷史建築時被發現，隨住大宅1931年列為國家歷史遺跡，浴場亦得以由專家逐漸修復。

浴場佔地450平方米，舊時地面係白色大理石，依家只保存一部份。通道上方係滾筒式天花，開出星形天窗採光。如同上次所講，牆身本應佈滿紅色菱形sebka花紋，但暫時只係修復到一小片畀大家參考。場地分為凍、暖、熱三個部份，其中又以由圓柱同馬蹄形圓拱支撐嘅「暖廳」（Sala Templada，左下圖）最為寬敞，正方形空間邊長11.3米，中間有正方形水池。「熱廳」(Sala Caliente) 據考證設於煲水地方隔籬，地底中空、牆內有管道，方便熱空氣流通；今時今日遊客參觀，比較容易注意到矩形坐浴間同兩個固定喺石座嘅大圓陶罐。

大宅其他樓層，除咗上次提到嘅大眾藝術同風俗博物館 [3]，仲有西班牙第一間專以素人藝術 (arte naïf) 為主題嘅藝術館，展出世界各地藝術家一共超過600幅簡樸直白而色彩繽紛嘅畫作（右下圖）。同一座建築裡面有齊中世紀歷史、近世建築風格、大眾生活文物、當代藝術、城市風景（上圖），喺炎熱嘅晏晝，正好畀大家喺同一屋檐下共同乘涼，但又各取所需。

文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)

[1] 見〈穆斯林治下的中世紀西班牙：#戰國時代〉
https://www.facebook.com/JudyLeeLinguist/posts/1296434217447737
[2] 見〈穆斯林治下的中世紀西班牙：清真西維爾〉
https://www.facebook.com/JudyLeeLinguist/posts/1301473890277103
[3] 見〈世界橄欖油首都Jaén〉
https://www.facebook.com/JudyLeeLinguist/posts/1505907389833751