《續談El Cantar de mio Cid：情節解構》

續談El Cantar de mio Cid：情節解構（上）

第一部：流放之歌Cantar del Destierro

顧名思義，故事由主角阿薛 (El Cid) 被流放，離開卡斯提亞首都Burgos開始。現存文本裡面缺咗一頁，解釋流放原因嘅大概50行內容因而無從稽考，從書嘅其他地方亦都推斷唔返，但學者考據描述呢個作品嘅其他詩文，以及歷史事件，得出兩個可能。

第一個係阿薛指控國王阿方索六世 (Alfonso VI) 弒兄，連同其他武士迫阿方索對神明發誓以證清白，搞到好唔高興。呢度係有歷史背景嘅：阿方索原先繼承利翁 (León) 王國，但同原卡斯提亞國王、佢阿哥山鋤 (Sancho) 合作瓜分細細佬加西亞（García，粵音近「嫁斯牙」）嘅 #加利西亞 王國後，隨即被阿哥反轉豬肚入侵，被迫流亡；山鋤好快被暗殺，細佬即刻回朝，一舉成為兩個大國嘅國王。一直有人懷疑山鋤嘅死由阿方索策劃，但係證明唔到。歷史上嘅El Cid（本名Rodrigo Díaz de Vivar）係山鋤餘部，戥舊老細唔抵都頗合理，不過迫新國王發誓呢個情節，史料並無記載，似係傳說。

另一個理論比較接近歷史。Rodrigo Díaz de Vivar負責收取阿拉伯王國朝貢，被流放可能係因為政敵誣捏佢中飽私囊，促使國王判罰。無論如何，阿薛同部下驍勇善戰，為基督徒從阿拉伯人手中收復咗好多土地。帶罪之身仍然忠肝義膽，將檢獲嘅部份財富上繳中央。

第二部：婚禮之歌Cantar de las bodas de las hijas de Cid

El Cid東征收復華倫西亞，得到國王阿方索六世赦免。佢同家人、部屬坐擁豐富資源割據一方，引嚟王族兄弟提親，希望娶到佢兩個女。阿薛本身係低層貴族，可以成為王親國戚係莫大榮譽，雖然隱隱覺得有啲唔妥，但喺國王推波助瀾之下都接受咗安排。

（待續）

圖：Burgos省Quintanilla Vivar市Vivar del Cid村莊相傳為El Cid出生地，設有紀念碑
Vanbasten 23, CC BY-SA 3.0, via Wikimedia Commons

文中外語為 #西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)

=================

續談El Cantar de mio Cid：情節解構（下）

第三部：羞辱之歌Cantar de la afrenta de Corpes

兩個新女婿被岳父啲手下取笑佢哋怕老虎，同埋喺打摩爾人嘅時候臨陣退縮，心有不甘諗住報復。佢哋帶住老婆返鄉下Carrión，途中喺Corpes地區嘅林木之間落手，打到老婆奄奄一息，再剝光豬綁佢哋喺樹底等狼食。按考據，呢個地方其實並唔存在，虐待老婆單嘢呢，歷史書亦都冇記載。

阿薛請求國王主持公道，攞返兩把嫁妝劍，然後派肇事嘅下屬同女婿決鬥，由國王做裁判。兩個伯爵之子受傷失格之際，納花拿同阿拉貢兩國信使到埗，代自家王子向兩女求婚。El Cid欣然同意，故事就此大團圓結局（冇BBQ）。

作品除咗強調 #騎士精神 同個人榮譽，亦都隱約有教化、控制社會嘅目的：主角對國王毫不懷恨，一片忠誠，短短一次開會同比武，吻手禮行咗無數次，啲說話肉麻到極；透過國王之手，天地有正氣，世界有公義，其實係散播緊非常保守嘅權力觀念。

《我薛之歌》係卡斯提亞（後來嘅西班牙）民族文學之始，歷來學術討論甚豐，造就脫離純文史範疇嘅跨學科研究：有人研究劍器，有人分析錫手背等肢體儀式點樣控制人際關係，甚至有人對照當年決鬥法律去分析情節同人物。我嘅拉丁美洲文學老師話過，一個民族一日冇自己語言嘅文學，一日都唔會有自己嘅身份 —— 希望我哋大家都一齊出力，畀返個身份自己。

圖：El Cantar de mio Cid文本第一頁，現存於西班牙國家圖書館

文中外語為 #西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)