《地緣販毒學：遊客忽略的西班牙風貌》

#地緣販毒學：遊客忽略的西班牙風貌（一）

之前幾篇專講 #大麻，搵到嘅資料不免涉獵到販毒同黑幫行為，既然係我本身有興趣嘅題目，當然亦都想藉機公諸同好，同大家一齊認識下淺層旅遊唔會見到嘅暗湧。

今次講嘅，係緊接 #直布羅陀 北面邊境嘅西班牙南部安達盧西亞自治區Cádiz省Campo de Gibraltar（直譯「直布羅陀郊外」）縣La Línea de Concepción市，佢連同直布羅陀灣對岸嘅Algeciras，係北非 #大麻樹脂 進入歐洲嘅大門。據警方估算，2018年投放資金加強執法之前，大約30個家族幫派總共為幾千個家庭提供生計：睇水每日一千、港口落貨三千、揸車送貨入倉一轉六千（歐羅）……喺一個四成人連小學都未畢業、失業率高達三成嘅地方，市內銀行、大小商店收到嘅錢，大部份嚟自已經深陷合法社會脈絡嘅毒品經濟。

幾十年前，#白粉 到咗西班牙南部呢啲小鎮，會留喺社區裏面毒害當地人，道友啲阿媽會去毒販屋企門口示威；但係依家呢啲地方作為走私 #轉口港，毒品只係產業生意，冇大幅影響公共衞生，冇令癮君子同家人身受其害，拉上補下權衡利害，當地人就算唔積極參與，好多都唔覺得有咩大問題；毒梟喺社區被視為英雄同偶像，甚至出現喺歌手嘅MV裏面，警方行動嘅時候，亦都會有街坊叫囂咒罵。咁多年以嚟，幫派已經發展出一套即使羣龍無首都可以各自為政嘅「封建制度」，加上高調、暴力嘅經營手法，令長期人手不足嘅警政部門頭痛不已。

如果鍾意呢篇文，請你CLS支持 🙂
逢星期三、星期日更新，敬請大大力追post :0)

===============

#地緣販毒學：遊客忽略的西班牙風貌（二）

研究販毒同 #跨國犯罪，越睇越似讀地理同 #地緣政治。正如先前所講，西班牙本土最南端嘅直布羅陀灣係 #北非 #大麻樹脂 以船運進入歐洲嘅第一個落腳點 [1]，而喺西班牙未完全合法化嘅 #大麻，就得益於農村人口流失、工業式微、市區貧窮現象而搵到本土生產嘅契機 [2]。事實上，大家淨係去旅行，都可能不知不覺貢獻咗呢個產業 —— 喺一個 #旅遊業 極發達嘅地方，仲有乜嘢比各國面孔混雜、無名人士來去匆匆嘅市容更好嘅掩護？

我哋成日講話西班牙係「#地中海」國家，冇錯係嘅，不過唔好忘記，西班牙係一個半島，西北邊就係 #大西洋 海岸，所以 #加利西亞 [3] 就成為南美哥倫比亞 #可卡因（臺譯「#古柯鹼」）嘅入口港，不過經營模式就比幾十年前改變咗好多。自從傳統嘅毒梟家族因為被捕、退休等原因而式微，東歐黑幫就攝位搶生意。佢哋志在搵錢，傾向避險而唔鍾意出名，擅長利用 #外圍賭博、#洗黑錢、偷渡、走私武器等其他業務建立嘅北非倉存貨運線路、荷蘭比利時分銷網絡，「順便」做埋可卡因。對 #哥倫比亞 嘅大集團供應商，#東歐黑幫 冇打算以競爭對手身份同佢哋分庭抗禮，反而係持合作態度，而加利西亞本地，就由專業販毒巨頭坐鎮嘅大本營，轉型成為收錢落貨嘅分支據點。

下篇會介紹毒販具體用咩方法、請咩人將可卡因帶入加利西亞。

==========

#地緣販毒學：遊客忽略的西班牙風貌（三）

上回講到大西洋東岸嘅 #加利西亞 #可卡因（臺譯「#古柯鹼」）生意已經化整為零，主理成盤生意嘅東歐黑幫雖然唔係專業毒販，但係策略優勢在於肯同人合作、善用其他業務嘅已有物流網絡，達到好大嘅規模同可觀嘅利潤。以往嘅金字塔層壓式網絡被打散之後，頑強嘅小隊取而代之，好似小型服務公司噉，提供各自嘅海上資源、知識同經驗幫助運毒。呢班「外判商」唔少係加利西亞海員，係專業運輸同收貨人，亦都有一部份識得自己造船。#漁船 運毒已經式微，#貨櫃 同其他商船就越嚟越受歡迎，當中又以後者最難對付。

2019年尾，國民警衞、國家警察同海關喺 #美國緝毒局 #情報 幫助之下，截獲歐洲海域第一艘「#毒潛艇」（圖）：半潛船船身長22米、估計造價兩百萬歐羅，帶同3,000公斤高質可卡因經由 #亞馬遜河 嚟到西班牙西北岸，相信最終目的地係英國。船被發現之前已經航行咗20日，另外花費一個禮拜左右停留喺唔同地點等人嚟攞貨。報館消息來源眾說紛紜，有指潛艇已經用咗好幾年，每年最少走兩轉；亦都有講法話隻船預咗即用即棄，可卡因 #黑市 價每公斤三萬歐羅，相比之下造船成本真係九牛一毛。無論如何，據執法部門觀察，雖然本地人脈變得零碎，但貨就越嚟越大批、純度越嚟越高；雖然行動次數少咗，但檢獲總量有增無減：2019年係7,642公斤（7.6噸），比之前一年上升八倍，而2020年就再升到10噸。總括而言，係航海同運輸技術，令加利西亞成為跨國販毒新秩序嘅重要據點。

圖：La Voz de Galicia新聞圖片

如果鍾意呢篇文，請你CLS支持 🙂
逢星期三、星期日更新，敬請大大力追post :0)

=============

地緣販毒學：遊客忽略的西班牙風貌（四）

西班牙南岸販毒猖獗，當然引起「#加強執法」，不過財雄勢大嘅 #犯罪集團 又點會冇變通嘅準備？好多犯罪集團雖然傳統上紮根南部，但係亦都識得利用擁有東岸販毒基建嘅當地組織去轉移業務、分散風險。#華倫西亞、#Murcia [1] 呢啲地方，海岸線長，港口大，遊客、外國居民眾多，係非常好嘅掩護；同時，西班牙東面呢啲城市同港口位處地中海西岸，無論對國內定歐洲其他地方，交通都夠晒方便，係運輸同散貨嘅絕佳據點。據執法部門紀錄，Murcia地區原先每年只係截到三四隻毒船，2020年就有13隻，相信就係南部踢竇踢咗去東部嘅證明。

循呢個途徑入嚟嘅毒品主要有北非 #摩洛哥 出產嘅 #大麻樹脂，以及嚟自 #拉丁美洲 嘅可卡因。前者可能由於語言嘅關係，主要由法國黑幫把持；貨物一到Murcia同Almería（中譯「阿爾梅里亞」）海灘邊，就有私家車接走，直送法國。#可卡因 就混入生果同其他產品嘅貨櫃，大批大批噉入境。2019年，華倫西亞破獲嘅可卡因總量大概係3,000公斤，但2020年6月單一次行動就已經搜到4,000公斤，收埋喺巴拿馬同 #哥倫比亞 入口嘅糖同菠蘿果肉裏面，由持有港口出入許可嘅本地貨車司機負責運輸。Murcia方面，2019年搜獲149公斤可卡因，比之前一年嘅數字上升超過六倍。

面對噉樣嘅情況，執法人員都慨嘆「道高一尺，魔高一丈」，有國民警衞人員向報館表示：「有組織犯罪一路進步，同時人手一路增加緊，但我哋就20年不變，甚至更差。」西班牙四通八達嘅地理位置，仲有陽光海灘美食嘅廉價高質生活，引嚟唔少 #跨國犯罪 組織進駐，大家估下咩人有份割據？下次開估。

[1] 中譯「梅西亞」、「莫西亞」或「莫夕亞」

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)

======================

地緣販毒學：遊客忽略的西班牙風貌（五）

上回講到，西班牙東岸係各國犯罪集團活動、走私物品集散嘅地方，法國私家車運毒黨只係其中一小部份 [1]。以東南部Alicante為例，有英國幫派專門搜購大麻，運返本國以六倍價錢賣出；立陶宛同波蘭人販運大麻嘅案件，近年亦都顯著增加。好可惜，前文介紹過以 #偷渡客 為「#大麻奴」嘅 #中国人 [2]，相信因為愛好和平嘅民族性，喺殘酷暴力嘅黑幫鬥爭之中唔夠人打，逐漸退場。

以阿爾巴尼亞同科索沃人為主嘅幫派，主要活動範圍係該省最東端嘅Marina Alta地區（地圖藍圈示），除咗走私可卡因同大麻，亦都有 #軍火 業務。塞爾維亞人同俄羅斯人喺華倫西亞同Alicante兩省落腳，充當運輸、散貨同 #洗黑錢 嘅角色 —— 警方喺一次行動中，搗破俄羅斯商人喺正當嘅地產、休閒服務生意以外，大手筆投資毒品船運，一粒白粉都唔需要經手就分到高利潤。

講咗咁耐地理，#地中海西岸 可以成為毒販聯合國，唔理乜嘢治安、成本、商業法規問題，其實仍然都係地理原因 —— 搵咁多錢，梗係要搵個氣候怡人、陽光充足、生活高質低價嘅好地方享受啦。有趣嘅係，#有組織犯罪 特別調查組嘅調查員指出，區內眾多國際學校提供學位畀外國人子弟，都係吸引嘅地方之一。諗諗下又係，好似近年香港噉，#國際學校 學額爭崩頭，我係外國專才嘅話，有得揀都揀西班牙啦。

============

地緣販毒學：遊客忽略的西班牙風貌（六）

畢加索嘅出生地馬勒加Málaga（粵音近「媽拿㗎」），全省海岸線一直向南伸延到卡迪斯省同直布羅陀 [1]，除咗係旅遊勝地「太陽海岸」(Costa del Sol) 所在，亦都係全國 #有組織犯罪 最密集嘅地方。海邊Estepona、Marbella兩個城鎮加埋山區村莊Benahavís形成嘅三角地帶，20公里嘅海岸線之內，就有超過100個幫派活動。佢哋嘅業務包括承接經 #直布羅陀灣 #Algeciras 入境嘅 #可卡因、販運 #大麻樹脂、將大麻分銷去北歐。#大麻 喺西班牙南部，一公斤價錢大概係1,700歐羅，運到德國同瑞典，分別可以賣到6,500同9,000歐羅；警方就曾經揭發德國匪徒買20噸蒜頭掩護110公斤大麻，用貨車經陸路走私。

西班牙嘅地理優勢，固然吸引到各國 #犯罪集團 喺毒品行業分一杯羹，但當然，#猛虎不及地頭蟲，全國嚟講，可卡因同大麻樹脂販運仍然係西班牙黑幫佔優，緊接嘅就係靚貨原產地哥倫比亞同摩洛哥嘅傳統熟手技工。

#內政部 數據顯示，西班牙毒品產業規模超過每年60億歐羅，達到西班牙國民生產總值（PIB, producto interior bruto，即英文GDP）嘅0.5%；據當地反恐及有組織犯罪情報中心統計，近年喺西班牙販運毒品嘅幫派有增無減，2019年開始突破500個，而且多數唔聲唔聲，行事低調而迅速。冚得一檔，即刻有人攝位填補真空，所以執法部門有時都束手無策，只能夠做盡一切去防止呢個產業系統好似喺 #墨西哥 噉，同國家制度競爭甚至取而代之，成為支配一切嘅法則。

[1] 見〈#地緣販毒學：遊客忽略的西班牙風貌（一）〉
https://www.facebook.com/JudyLeeLinguist/posts/1459223251168832

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)

相關文章
〈#地緣販毒學：遊客忽略的西班牙風貌〉系列（二）至（五）
https://www.facebook.com/JudyLeeLinguist/posts/1461979470893210
https://www.facebook.com/JudyLeeLinguist/posts/1463841997373624
https://www.facebook.com/JudyLeeLinguist/posts/1466360060455151
https://www.facebook.com/JudyLeeLinguist/posts/1468437476914076
#畢加索：藍色時期 (1901-1904)
https://www.facebook.com/JudyLeeLinguist/posts/1337569253334233
畢加索：粉紅時期 (1905-1906)
https://www.facebook.com/JudyLeeLinguist/posts/1350039798753845
畢加索：後宮佳麗
https://www.facebook.com/JudyLeeLinguist/posts/1352395928518232
El Greco畫作導賞：畢加索筆下的葬禮 https://www.facebook.com/JudyLeeLinguist/posts/1270259766731849