《#加泰隆尼亞：草之矽谷》

#加泰隆尼亞：草之矽谷（上）

近十年，#大麻 一直高踞加泰隆尼亞檢獲非法藥物嘅榜首，單單喺2019年，當地警方就冚咗368檔種植場，其中六成半係室內營運，而且夠晒專業：肥料、生長調節劑、燈光控制、自動灑水、通風系統唔在講，仲有移動射燈增加光照範圍，以及電腦遙控操作嘅智能管理裝置。

加泰隆尼亞地區警方Mossos d’Esquadra喺2020年發表長達72頁嘅報告，指出加泰隆尼亞係歐洲非法大麻市場嘅「震央」，擔心當地開始發展出深陷社會脈絡嘅「毒品經濟」。除咗處理技術嘅 #電工、#工程師、喺屋企自己種少少搵外快嘅普通家庭 [1]，亦都有 #地產代理 專業供盤，更加唔少得警察貪污受賄，成為產業一員。去到街頭層面，合法銷售種子同肥料嘅店鋪，以及供註冊會員聯誼嘅大麻俱樂部，有啲都隱約見到有組織犯罪嘅滲透。

警方估計，七成犯罪集團有參與大麻業務，偷竊、搶劫等其他犯罪行為嘅贓款，亦有一部分重新投資喺大麻生意，以賺取更高利潤。2015至2021年之間，警察部門搗破150個大麻犯罪網絡，發現唔同嘅幫派各有各做之餘，有時甚至會合作 [2]，形成「馬賽克」式嘅市場風景。可以噉樣做，自然係得益於市場夠大，而且供求平衡，但萬一有日呢個局面無法維持，暴力就肯定無可避免。

[1] 另見〈西班牙「草經濟」初探（四）：走入尋常百姓家〉
[2] 例如〈西班牙「草經濟」初探（三）〉所載中國幫派嘅經營模式

文中外語為 #加泰隆尼亞語
如果鍾意呢篇文，請你CLS支持 🙂
逢星期三、星期日更新，敬請大大力追post :0)

====================

加泰隆尼亞：草之矽谷（下）

#巴塞羅那 大麻文化興盛，每年舉行歐洲最大嘅大麻博覽會（左圖），集學術會議、貿易展、國際交流於一身。巴塞羅那大麻價格係每克5.66歐羅左右（2020年數字），比歐洲平均價每克7至13歐羅低。2021年，市內有225間 #大麻俱樂部，佔全加泰地區總數一半左右。市政同警察部門認同俱樂部有效減少當街買賣同吸食，對市容有好處，原則上唔反對佢哋存在。

呢啲俱樂部理論上受嚴格市政附例監管。選址同裝修方面，俱樂部要距離學校及兒童遊樂場最少100米，入口必須係連續兩度門，確保出面冇辦法睇到裡面嘅情況，抽風系統亦都規定必須連接屋頂煙囪，啲煙唔可以噴落街。俱樂部要以非牟利方式經營，不得買賣大麻產品，唔可以公開招攬會員，新人必須經現有成員介紹入會，但係有心人總有辦法規避，例如安排網上或電話登記（右圖），確保「#大麻旅遊」得以蓬勃發展。

2021年盛夏，加泰隆尼亞高等法院裁決禁止大麻俱樂部推廣吸食、種植及銷售大麻，同時認為市政府冇權限規管呢啲「可能引致犯罪」嘅場所，大量俱樂部陷入取締邊緣，但市政廳只係表示會發信通知俱樂部話情況有變，隨後會加強巡查，確保安全措施同經營手法冇違規，按個別情況處理。截至2022年初喺網上查證，呢啲場所仍然照常開放。

如果鍾意呢篇文，請你CLS支持 🙂
逢星期三、星期日更新，敬請大大力追post :0)