《深度遊精讀》
深度遊精讀：La Alhambra王宮及花園藝術（一）
正如之前所講，#taifa（中譯泰法）係穆斯林治下嘅伊比利亞半島（亦稱安達盧斯）一個特色嚟，只要大一統嘅哈里發國沒落，安達盧斯就會迅速分裂成taifa小酋長國各自為政。摩哈德王朝（公元1146-1238年）末年宗室內鬥促成第三次泰法時代，令葡萄牙、利翁等基督教王國有機可乘，進一步收復土地。同一時間，同屬伊斯蘭教嘅Nazarí（中譯奈斯爾）王朝崛起，建立伊比利亞半島上最後一個伊斯蘭王國 —— 格拉納達 (Granada) 酋長國，靠向基督教王國納貢，得以偏安超過250年，直到1492年向西班牙基督教雙王投降為止。
呢段時期亦都係西班牙穆斯林藝術嘅最後一個階段，由於唔使打仗，農業、工業、商業促成經濟富裕，伊斯蘭藝術亦都喺呢度登峯造極，發展出極具本土性格特色嘅建築同裝飾美學；最大型、最具代表性嘅作品，毋庸置疑係Granada嘅世界遺產阿爾罕布拉宮（Alhambra，粵音近「拗堪爬拿」）同相連嘅赫內拉利費 (Generalife) 夏宮。
Alhambra宮城外圍形狀不規則，依山勢自西向東伸延。從外面見到嘅塔 (torre) 一般有防衛作用，但有部份內裏其實係功能各異嘅廳房，例如Torre de Comares入面用嚟接見外國使臣嘅王座廳，或者好似Torre de la Cautiva噉，成座係寵妃嘅宮室。嚟緊會同大家深入Alhambra，欣賞入面嘅藝術。
下圖：© OpenStreetMap contributors, CC BY-SA 2.0, via Wikimedia Commons
================
深度遊精讀：La Alhambra王宮及花園藝術（二）
#Alhambra 宮城有兩個部份，最西邊嘅係13世紀嘅軍事建築，即係 #城堡（alcazaba，左圖，一睇al字頭又知係阿拉伯文），亦都係駐軍居住嘅地方，基本上冇任何藝術價值。後面要嚟住嘅地方相比之下複雜得多，空間按用途分隔，包括國王嘅宮室同官員嘅住處。
宮城內各個宮殿嘅結構大同小異，基本上都係以一個有 #噴泉 有花園嘅矩形庭院為中心，四邊圍住大小起居室、睡房等私人同公用空間，結合成一個宮殿建築。宮廷各處都有大小泉源，通過大量水道引入主要嘅水池同明渠。Alhambra嘅阿拉伯王宮部份其中兩個最重要嘅打咭位，就係香桃木庭院Patio de los Arrayanes（又稱「水池庭院」Patio de la Alberca，右圖）同埋獅子庭院Patio de los Leones，大家去到嘅時候不妨留意下噴泉同水流嘅設計。
喺認真介紹每個廳房之前，都要講明先，Alhambra唔係全部都係伊斯蘭建築同裝飾嚟嘅，因為 #基督教雙王 費蘭度同伊莎貝拉喺接受 #格拉納達 酋長國投降之後，都搬過入嚟住，後世亦多有改建同重建；佢哋個孫神聖羅馬皇帝查理五世（西班牙稱卡洛斯一世），更曾下令喺宮城內另起一座外方內圓嘅文藝復興風格皇宮（可以睇返上一篇嘅配圖）；所以今時今日嚟到見到「西式」嘅藝術品、教堂、宮殿、美術館，其實不必訝異。
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
==================
深度遊精讀：La Alhambra王宮及花園藝術（三）
大水池香桃木庭院Patio de los Arrayanes所在嘅宮殿叫做Palacio de Comares，係國王嘅正式寢宮，但亦兼有公務用途。北面外觀係樸素嘅軍事建築Torre de Comares塔，但係正如第一篇提到，塔裏面其實係對比起嚟極震撼嘅「大使廳」（Sala de los Embajadores，或稱「王座廳」Salón del Trono），顧名思義係接見外國使臣嘅地方。
呢個樓底超過18米高嘅方形大廳當然極盡奢華之能事，唔失禮外人之餘仲要展示國力：牆身佈滿阿拉伯式花紋、經文同詩詞書法、幾何圖案等各式雕刻同陶瓷瓷磚，基本上冇一吋地方係留白嘅；天花係花式木雕，地板當年係大理石，後來先改做現有嘅泥磚地。
平面圖黃色斜斜地嘅部份係面向聖城麥加嘅祈禱室，連接一個叫Mexuar嘅房，國王同高官就係喺度開會。呢個辦公廳右側（東側）有門道通向Comares宮殿前廳「鍍金室」(Cuarto Dorado) 同相連庭院，得名於房內嘅 #mudéjar（粵音近「沒爹霞」）風格木雕金漆天花，係15世紀左右流行、混合伊斯蘭同基督教建築特色嘅伊比利亞半島獨有藝術形式，相信係天主教雙王入主後重新粉飾嘅成果。
大水池另一邊就係內廷寢宮部份，除咗睡房，仲有桑拿浴室，再連接後宮「獅子宮」，下次同大家睇。
左圖：© José Luiz Bernardes Ribeiro / CC BY-SA 3.0
右圖：Constantin Uhde, Public domain, via Wikimedia Commons
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
=================
深度遊精讀：La Alhambra王宮及花園藝術（四）
獅子宮座落Comares宮東南側，當年係外人免進嘅後宮內苑。庭院同樣係長方形，四邊中線各拉一條水道，從走廊供水處餵水畀庭院正中央嘅獅子噴泉（左圖）。12隻大理石獅子係10至11世紀之間嘅產物，圍住泉眼所在嘅水盆，各自口中亦都吐出水柱，啱啱好灑落地面嘅水道。
呢個庭院係成個宮城最出名嘅打咭位，除咗獅子之外，圍繞四邊嘅半圓拱拱廊同廳房完全覆蓋住sebka菱形花紋 [1] 同其他阿拉伯式花紋，仲有立體嘅鐘乳石狀垂吊雕刻拱頂，稱為mocárabe（右圖），真正雕樑畫棟。
寢室部份座落庭院其中一條短邊，走廊用柱分為七段，畫出梅花間竹嘅四個長方形同三個正方形空間，後者開口向住庭院，為背後嘅寢室採光。呢一系列廳房稱為國王廳 (Sala de los Reyes)，源於正中間房天花板描繪十個穆斯林聚會嘅畫作，一般認為係奈斯爾 (nazarí) 王朝嘅頭十個蘇丹。雖然衣衫畫得非常細緻，但係有指場面安排唔夠仔細同準確，加上伊斯蘭教義本來就唔准畫人像，作品應該係基督徒創作嘅，擺得喺度亦都顯示當時嘅穆斯林同基督徒互相影響甚深。左右兩間房都另有約莫公元1380年完工嘅圖畫，估計係嚟自西班牙中部古城托利多 (Toledo) 嘅基督徒畫家嘅作品。
[1] 見〈穆斯林治下的中世紀西班牙：#密集恐懼症 慎入、哥倫布墓〉
https://www.facebook.com/JudyLeeLinguist/posts/1303764540048038
（待續）
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
=============
深度遊精讀：La Alhambra王宮及花園藝術（五）
1492年基督教雙王收復全西班牙、完成基督徒近八個世紀嘅收復失地運動 (reconquista) 前夕，格拉納達酋長國係伊比利亞半島上最後一個伊斯蘭王國。統治嘅奈斯爾王朝，喺建築同裝飾藝術方面嘅成就，完全體現喺Alhambra宮城裏面。
因為獅子噴泉而得名嘅獅子宮，1391年建成，係蘇丹嘅後宮地帶。從噴泉沿水道走向庭院北側長邊，到達供水源頭，係「兩姊妹廳」(Sala de las Dos Hermanas) 所在。大家追咗咁多同伊斯蘭藝術有關嘅文可能都熟晒，「牆身佈滿密集花紋雕刻」呢啲就基本嘅；呢度最出名嘅係佈滿mocárabe（粵音近「莫鴉拿皮」）鐘乳石狀倒吊裝飾嘅拱頂，加上圍繞八邊形拱頂嘅八對採光小窗同對落一層起起伏伏嘅mocárabe外圍，入房抬頭就好似見到朵花噉（右下圖）。
喺兩姊妹廳行到最入仲有一個觀景專用房仔，窗口開得特別低，就算坐喺地下，都可以望出一個叫Daraxa嘅花園。不過相比窗前嘅mocárabe尖拱同多色石膏銘文窗框，內園景又好似失色少少（右上圖）。
出返嚟橫跨獅子噴泉，同兩姊妹廳相對嘅Sala de los Abencerrajes（最後個字粵音近「掗病射啦棄s」），格局完全抄襲對面，不過面積細少少，而拱頂就係星形。呢個空間當年係節慶宴會嘅場地，但個名就相傳嚟自喺度被殺嘅家族；有人話個廳正中心嘅大理石噴泉有笪鏽色嘅漬為證，我就冇留意到，大家去嘅時候可以幫我睇睇。
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
=============
深度遊精讀：La Alhambra王宮及花園藝術（六）
遊客嚟到Alhambra，除咗睇奈斯爾王宮 (Palacio Nazaríes) 之外，多數都唔會錯過Generalife（中譯「赫內拉利費」，地圖藍方格範圍）夏宮。有啲人以為Generalife係Alhambra王宮嘅御花園，其實不然：兩者原本互不從屬，前者始建年份甚至早過Alhambra嘅Comares宮 [1]，可以追溯到13同14世紀之交，不過Generalife作為親親大自然嘅「避暑山莊」，啲花園靚到變咗成個建築羣嘅代名詞，所以有噉嘅誤會。
Generalife住嘅地方冇Alhambra咁宏偉豪華，係一個有果園、有牧場、農家感覺嘅度假村，象徵美麗嘅天堂 #花園。遊客到訪，首先會經過現代加建嘅劇場同低層大花園，去到再高少少嘅地方先係歷史建築。
主建築嘅核心唔使講，又係水源充足嘅 #庭院，今次呢個叫「水渠庭院」（Patio de la Acequia，地圖藍方格43號，右圖），長48.7米、闊12.8米，中間水道係花園同成個Alhambra宮城嘅供水來源，實用之餘都冇忽略美學，兩邊各有數以十計嘅水柱營造立體感。庭院兩條短邊係佈滿sebka菱形花紋 [2] 嘅拱廊，通往宮殿廳房；向南嘅長邊面對Alhambra，從觀景臺可以睇到宮城同格拉納達全景。
另一個重要景點係王后柏樹庭院後面、高層花園旁邊嘅「水階梯」（Escalera del Agua，地圖藍方格45號、黑線遮住嘅地方），靚就唔係特別靚，不過設計幾有心思：三個細圓形 #噴泉 依山勢興建，中間以梯級相連，兩邊矮牆頂部係凹溝，水可以由上層一路流到下層，比起固定平整嘅花園水池又係另一種動態，足證阿拉伯人真係特別鍾意欣賞水呢個天賜恩物。
[1] 見本系列第三篇
[2] 見〈穆斯林治下的中世紀西班牙：#密集恐懼症 慎入、哥倫布墓〉
https://www.facebook.com/JudyLeeLinguist/posts/1303764540048038
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
相關文章
深度遊精讀：La Alhambra王宮及花園藝術（一）（二）（三）（四）（五）
https://www.facebook.com/JudyLeeLinguist/posts/1411812549243236
https://www.facebook.com/JudyLeeLinguist/posts/1413403005750857
https://www.facebook.com/JudyLeeLinguist/posts/1416413398783151
https://www.facebook.com/JudyLeeLinguist/posts/1418431455248012
https://www.facebook.com/JudyLeeLinguist/posts/1420807991677025
===============
深度遊精讀：文藝復興在阿拉伯宮城（上）
曾經同大家介紹過西班牙文藝復興前期 (1500–1530) 嘅獨特風格 [1]，又觀賞過晚期嘅矯飾主義同希臘仔畫作 [2]，今次藉住帶大家遊Alhambra嘅機會，講下兩者中間稱為古典派 (Renacimiento clasicista) 或純粹派 (Renacimiento purista) 嘅文藝復興建築藝術。
有別於前期抄啲唔抄啲、淨係抄手工嘅做法，1530至1575年係建築藝術嘅輝煌時期，得益於意大利建築書籍流傳、意大利建築師嚟到西班牙做嘢、西班牙建築師赴意學藝三大因素，基本上將意大利文藝復興建築完美噉照辦煮碗複製，主要特徵有：
1. 橫向發展：同13至15世紀嘅哥德式高聳教堂唔同，文藝復興中期建築要求夠大夠橫，屋頂平整；由於唔需要向上發展，竟然可以復古用返11、12世紀羅曼式同更前期 [3] 常用嘅滾筒拱頂、半圓拱，造出厚重莊嚴嘅感覺。
2. 牆身相比前一階段嘅「銀匠」(Plateresco) 風格，少咗細緻密集嘅裝飾，換上相對巨型嘅圖案，而且只會安排喺建築物具體、重要嘅地方出現，唔係周圍都走去雕花，因而有樸素嚴肅嘅氣氛。
3. 承襲文藝復興古典主義對比例、對稱、規律嘅追求，最常用嘅裝飾係幾何圖案，回歸簡潔嘅古典美學。
格拉納達Alhambra宮城 [4] 裏面嘅查理五世皇宮 (Palacio de Carlos V)，就係呢個時期最具代表性嘅西班牙建築之一，由天主教雙王個孫、神聖羅馬皇帝查理五世（西班牙稱卡洛斯一世）明令興建，下篇同大家深入研究。
================
深度遊精讀：文藝復興在阿拉伯宮城（下）
Alhambra阿拉伯宮城遺址裏面嘅查理五世皇宮 (Palacio de Carlos V) 係西班牙文藝復興中期嘅重要作品，由留學意大利嘅建築師Pedro Machuca規劃。1527年動工嘅時候，國內仍未擺脫「銀匠」時期嘅花巧做法同埋高聳 #哥德式建築 嘅美學標準 [1]，呢個皇宮矮得得、實而不華嘅設計將當時嘅藝術習慣全部顛覆，算係非常前衛。
屋頂完全平坦、邊長63米嘅正方形外圍，入面係圓形嘅露天中庭；宮內全部房間都係矩形，只有東北角嘅小教堂係八角形。呢種經過仔細量度、精心安排比例嘅幾何圖形格局，係 #古典主義建築 嘅一大特徵。注意面對中庭嘅上下兩層柱廊，支柱設計唔一樣，下層採用多立克柱式 (órden dórico)，柱頂上方下圓；樓上採用愛奧尼柱式 (órden jónico)，柱頭有一對向下嘅渦卷裝飾。正如一路所講，古典主義唔興整啲大件花巧嘢，大家參觀之前做足功課，先會知道要留意乜嘢細節。
建築外牆亦承襲同樣原則，連石材都切割成工整嘅方塊。窗檐形狀係長方形、三角形同半圓形交替，製造建築嘅節奏感。裝飾圖案同樣素淨莊嚴，只出現喺特定位置，而且具有象徵意義 —— 講緊嘅係門面有關和平（左下圖）、歷史、聲望嘅託寓 (alegoría) 雕刻作品，寓意君主政府嘅使命同成就；權力同藝術有明顯關聯，其實亦都係文藝復興嘅關鍵概念之一。查理五世個仔青出於藍，叫人起咗個更大嘅宮殿兼修道院，就係名畫家「希臘仔」El Greco念念不忘但 #冇份 嘅馬德里El Escorial [2]，下次同大家睇。
[1] 見〈文藝復興在西班牙：獨特的銀匠風格〉
https://www.facebook.com/JudyLeeLinguist/posts/1317817035309455
[2] 見〈El Greco畫作導賞〉系列
九頭身誇張比例
https://www.facebook.com/JudyLeeLinguist/posts/1250625388695287
聖人殉道圖（兩篇）
https://www.facebook.com/JudyLeeLinguist/posts/1253967211694438
https://www.facebook.com/JudyLeeLinguist/posts/1255887858169040