《從慘烈到模範：西班牙如何應對世紀疫症》
從慘烈到模範：西班牙如何應對世紀疫症（一）
如果你有留意歐洲武漢肺炎疫情，會知道新一波又殺到嚟，竟然係德國奧地利戰況最慘烈，2021年11月第三個禮拜，七日平均新個案數字係四萬幾，而西班牙新症只係德國嘅一成。簡單睇，當然可以歸功於西班牙全國高達八成、12歲以上人口近九成嘅疫苗接種率，噉點解西班牙人咁肯打針？當中其實有社會、經濟，甚至歷史嘅原因。
首先，西班牙第一波疫情基本上同意大利一樣黐線，好多人見證冇疫苗、重症多嘅情況下，醫療系統嘅負荷係點樣飽和到崩潰，老人院更加係死得人多，所以一有針打，個個都衝去打。呢樣嘢又同經濟同家庭結構有少少關係，西班牙出名年輕人失業率高，同時家庭觀念重，好多人仍然同父母、祖父母同住，所以都願意打針保護老人家。
呢個心態配合西班牙嘅公共醫療結構，可以話係事半功倍。西班牙醫療保健雖然係各個自治區自理，但係就保持公營國民保健嘅體系，唔似其他國家噉公私營系統混合、保險公司做中間人，所以當西班牙有疫苗供應，政府可以好快直接協調，安排人人打針唔使點等。
當然，如果西班牙人唔信任疫苗、唔信任個制度，根本無可能達到咁勁嘅接種率。下篇繼續從政策同歷史方面，同大家拆解西班牙嘅成功故事。
圖：歐洲各國打齊針嘅人口比例
來源：Our World in Data
================
從慘烈到模範：西班牙如何應對世紀疫症（二）
要做到西班牙全國八成、12歲以上人口九成、老人院95%以上嘅疫苗接種率，好明顯唔係 #威迫利誘 或者 #道德勒索 市民就得。
根據 #倫敦帝國學院 嘅調查，79%西班牙人信任 #武漢肺炎 疫苗，比起美國嘅62%同法國56%都高好多。社會學家分析，1950年代中期，好多國家開始為細路打 #小兒麻痹症 疫苗，佛朗哥獨裁嘅西班牙就拖咗十年；老一輩仍然記得冇疫苗引致嘅各種殘疾同死亡慘況，近年嘅左翼政府更加認證當年未獲安排接種小兒麻痹疫苗嘅病人係 #獨裁政權 嘅受害者。呢個 #集體創傷 絕對加強咗普遍西班牙人對疫苗嘅信心。
呢度嘅政治歷史故事係未完嘅。西班牙人信任國家嘅醫療體制，唔使政府迫打針，並唔係今次 #瘟疫 嘅新事。西班牙嘅民主進程相對歐洲其他國家慢，1975年 #佛朗哥 死咗先開始，到1978年確立新 #憲法，公共醫療、社會保障嘅體制喺80年代逐步發展。好多西班牙人親身見證 #民主化 同新制度同步建設，相信公營醫療系統係國家脫離保守封建、邁向真正 #現代化 嘅體現，無論理性定感情上，都對制度有足夠信心。以前疫苗同民主方面嘅慢，竟然換嚟今日嘅快，唔知算唔算 #因禍得福？
圖：世界各國打齊針嘅人口比例
來源：Our World in Data https://ourworldindata.org/coronavirus/country/spain
（待續）
==================
從慘烈到模範：西班牙如何應對世紀疫症（三）
世界各地推廣 #疫苗 嘅其中一個障礙，係錯誤資訊、#陰謀論 同政治爭拗非常多，亦都非常難處理。今次瘟疫大流行，西班牙政府喺呢方面嘅決心同反應都相當唔錯。疫苗最初推出嘅時候，好多人擔心效用同 #副作用，政府積極搵數據查證、分析利弊，同科技、醫療版記者緊密聯絡，確保正確資訊可以傳遞到市民睇到嘅地方。
呢方面仲有非常特別嘅一點，就係政府從過往研究察覺到，政客同官員好容易影響複雜 #公共衛生 議題嘅 #輿論 風向，所以呼籲各級政府人員同政治人物一人少句，將醫療科學留返畀專家自己拆，以免疫苗問題成為 #政治角力 戰場，公眾亦都冇咁容易受政治說辭或 #意識形態 之爭影響打針嘅決定。
相比之下，北面鄰居、 #法國總統 #馬克龍 一月尾牛津AstraZeneca疫苗推出嘅時候講咗句「對老人幾乎完全冇效」，固然被英國媒體撻伐，話係歐洲喺英國脫歐後嘅「疑英」表現，亦都令好多民眾對呢隻疫苗非常唔信任，即使再有研究證實效用、政府轉軚入貨，都唔係咁多人肯打。所以總括嚟講，西班牙政府 #公共傳訊、應對陰謀論同錯誤資訊嘅策略，應該係疫苗計劃成功嘅原因之一。
圖：西班牙現任首相Pedro Sanchez（粵音近「啤多囉山斜時」）
來源：CC-BY-4.0: © European Union 2019 – Source: EP
（待續）
======================
從慘烈到模範：西班牙如何應對世紀疫症（四）
當然啦，疫情一日未完（真係會完咩？），都唔可以蓋棺定論。有一個講法係，荷蘭、比利時、奧地利呢啲國家，凍得比西班牙早，呼吸道感染、飛沫傳染、怕凍唔出街、室內空氣唔流通呢啲情況都早啲出現，造成秋冬爆發，結論係西班牙第六波疫情可能唔係唔嚟，只係未嚟。
但西班牙嘅傳染病學家表示唔太擔心入冬大流行，之前醫療系統瀕臨崩潰嘅情況再發生嘅機率就更低，理由主要係2021年6月第五波疫情同而家比較嘅兩個數據：當時青少年人口大部份未完成接種，導致病毒快速傳播；同時，牛津AstraZeneca疫苗兩針相隔12個禮拜，好多60至69歲嘅人未打第二針，令到重症同入院數目顯著增加。到依家年尾，呢兩個年齡層嘅問題已經解決，全國12歲以上人口九成有疫苗護體，專家絕對有理據樂觀。
至於12歲以下嘅細路，暫時未有核准可以打嘅疫苗，喺西班牙嚟講即係500萬人，但加泰隆尼亞數據顯示，統計到嘅幼兒園同小學個案裏面，八成學生都冇傳染同學或者老師。歐盟數據亦都話無論係原先嘅病毒定係delta變種，細路都唔係特別容易感染或者傳染，所以即使有個案，都唔會造成全國大爆發。不過如果連學童都打埋針，當然可以進一步拉低感染率，同埋保護免疫力低嘅人。
圖：各國近兩週死亡數字變化百分比
來源：Our World in Data
如果鍾意呢篇文，請你CLS支持 =]
逢星期三、星期日更新，敬請大大力追post :0)
參考資料請見留言區
=================
從慘烈到模範：西班牙如何應對世紀疫症（五）
如同前幾篇所講，西班牙因為種種社會同歷史因素，疫苗接種率喺歐洲以致全球都首屈一指。2021年12月初，呢個貴為歐洲人口老化「老大哥」、平均壽命同香港日本有得揮嘅國家，耄耋老人有三分之二已經打埋第三針，政府表示根本唔使考慮強制接種疫苗。
話雖如此，西班牙仍然有超過350萬冇打到針嘅人，其中大概20萬係50歲以上嘅「中年人」，亦都係最容易因為重症而要深切治療嘅年齡層。2021年11月尾，西班牙衞生部發表統計數據，60至80歲嘅人口裏面，唔打針嘅比起打晒針嘅，感染率高八倍、入院比率高18倍、死亡率高25倍。
隨住新 #omicron 變種殺到，甚至錄得同 #南非 毫無關連、冇 #外遊 紀錄嘅本地感染，西班牙越嚟越多自治區政府向當地高等法院提請授權，要市民出示 #歐盟COVID電子證書（又稱COVID護照），證明已經打齊兩針或者病後好返，先可以進入若干公共場所或者參加大型活動。
當然啦，疫苗唔係大晒嘅，即使好似西班牙咁高嘅接種率，都阻止唔到秋冬新一輪嘅感染潮；傳染病學家亦都講明，唔好完全倚賴第三針去煞停病毒傳播 —— 戴口罩、室內通風呢啲關鍵措施仍然 #缺一不可，噉就要靠民眾自覺合作嘞。
如果鍾意呢篇文，請你CLS支持 =]
逢星期三、星期日更新，敬請大大力追post :0)
參考資料請見留言區
===============
從慘烈到模範：西班牙vs德式佛系(?)防疫（上）
近嚟喺搜集資料向大家介紹西班牙武漢肺炎概況嘅過程之中，我有時都不免會將西班牙同我比較熟嘅另一個歐洲國家 —— 德國 —— 比較，發覺德國2021年秋冬嘅慘況，其實係一連串「天時地利人和」造成嘅，當中又以各種同政治有關嘅原因為害最大。
2020年春天，瘟疫進擊歐洲，德國得益於聞名世界嘅公民質素同守規矩精神（好似係），第一輪嘅封城措施相當有效，疫情算係控制得住，醫院亦都冇西班牙、意大利嗰種崩潰嘅情況，民眾唔係咁真正感受到威脅，就有「都唔係真係咁嚴重啫」嘅感覺，年幾以嚟漸漸掉以輕心。
好多人本身諗住，總理默克爾都就快退休，唔使博表現谷民望爭選票，應該可以 #無畏無懼，積極嚴厲防疫。係嘅，佢想噉做，但係 #村民唔係噉諗。聯邦制度下各邦自理，各地政府為2021年9月大選打算，好多都冇嚴格執行「七日平均每十萬人超過50單感染就封城」 嘅政策，以免選民不滿。夏天疫情冇乜起伏嘅時候當然冇事，依家一爆起上嚟就一發不可收拾。
你以為大選塵埃落定就可以重回正軌？非也。暫時賣個關子先，下回再同大家分析。
圖：西班牙及德國每百萬人確診數字（七日移動平均數）
來源：Our World in Data
如果鍾意呢篇文，請你CLS支持 =]
逢星期三、星期日更新，敬請大大力追post :0)
==================
從慘烈到模範：西班牙vs德式佛系(?)防疫（中）
上次講到德國疫症撞着大選，各邦政客為怕得罪選民而唔肯再封城，噉你以為選完咪好地地認真抗疫囉，吖又唔係㗎喎。支持率一路只有15%左右嘅社會民主黨 (SPD) 因為執政黨揀錯人而漁翁得利，最終以25%得票勝出，就想守住民望，所以都唔敢大大聲講嚴格防疫，諗住推個波畀默克爾嘅看守政府做醜人。
阿嬸梗係唔制啦，呢啲你責任嚟，一陣我話噉做，你轉頭一接手又縮，朝三暮四朝令夕改，聯邦政府啲公信力咪畀你玩殘？於是兩邊幾乎係互相推搪，同時一味叫人打支立竿14日後先有機會見影嘅針，支持收緊政策同反對接種疫苗嘅兩邊市民就弔詭地所見略同，一齊覺得政府冇料到。之前講話西班牙盡量唔畀政治影響防疫，淨係睇科學、睇數據，噉樣一比較就高下立見。不過遇着大選年都真係冇計，唯有嘆句唔好彩。
調返轉，科學家揩到一句半句政治經濟民生嘢，又係好易出事。據相熟嘅德國人回憶，有次睇電視黃金時段啲清談節目，個專家雖然明確表示科學嚟睇一定建議打疫苗同封城隔離，但就戴晒頭盔噉話「不過我唔係政治人，權衡唔到措施嘅經濟影響」，結果就引導咗啲人順住個思路諗「係喎，真係經濟問題嚟㗎喎」。唔好以為「邊有咁易講半句就影響到」，好多人其實對好多嘢都冇乜概念，聽到咩就吸收咩，邊句前邊句後、中間用咩連接詞都會影響解讀嘅方法，你問我哋呢啲做語文嘅就知。
（待續）
圖：德國主要政黨近兩年民意走勢
來源：POLITICO
如果鍾意呢篇文，請你CLS支持 =]
逢星期三、星期日更新，敬請大大力追post :0)
====================
從慘烈到模範：#西班牙vs德式佛系(?)防疫（下）
上回話西班牙盡力保持科學政治涇渭分明，相反德國抗疫成為政客戰場，各方拉鋸之下市民完全冇受惠，只能自求多福。話口未完，我又聽到單德國政府攞科學家嚟玩嘅騎呢嘢。
話說喺大學教書做研究嘅學者，近期都等緊教育部話取消實體課堂改返網上授課；早一個禮拜終於有信到，點知原來調返轉話怕影響學生嘅學習同社交體驗，所以建議全面繼續幾十人堆埋喺間講堂度玩傳染派對。我線人就話教育部都龜縮咗咁耐，唔出聲冇人話佢啞，但一出聲就一刀捅落日日望住數據嘅科研學者度，好難唔令人對政府越嚟越唔信任。
呢單嘢都帶出咗 #德國（其他地方我更唔熟啦吓）一個問題，就係好多人似乎已經擺脫科學角度，轉而訴諸感情，一廂情願製造「正常生活」自欺欺人；未爆之前就話個人自由、保障私隱乜乜乜，綁手綁腳自絕防線，到求仁得仁社區爆發喇喎，就話「都傳染咗啦做唔到啲乜」，跌入第N波疫情嘅永續輪迴。
講咗咁多都戴返個 #頭盔 啦，歐洲地理、生活習慣同政府態度都同香港非常唔同，好難比較；西班牙同德國同屬西歐大國，先可以勉強玩下案例研究。呢個月寫咗好多同西班牙疫情有關嘅文章，真心覺得係時候告一段落，講返飲飲食食去旅行，或者研究藝術、政治史，幫大家開關之後嘅深度遊做好準備。
如果鍾意呢篇文，請你CLS支持 =]
逢星期三、星期日更新，敬請大大力追post :0)
相關文章：
從慘烈到模範：西班牙如何應對世紀疫症
（一）https://www.facebook.com/JudyLeeLinguist/posts/1393051224452702
（二）https://www.facebook.com/JudyLeeLinguist/posts/1394715180952973
（三）https://www.facebook.com/JudyLeeLinguist/posts/1397983737292784
（四）https://www.facebook.com/JudyLeeLinguist/posts/1399972387093919
（五）https://www.facebook.com/JudyLeeLinguist/posts/1402143203543504
從慘烈到模範：西班牙vs德式佛系(?)防疫
（上）https://www.facebook.com/JudyLeeLinguist/posts/1404505283307296
（中）https://www.facebook.com/JudyLeeLinguist/posts/1407081536383004