《Segovia：宏偉水導橋、燒乳豬》

Segovia（上）：宏偉水導橋、燒乳豬

啲人成日話去西班牙食 #燒乳豬 乜乜乜好興奮噉，但係正如 #西班牙 唔係度度都有靚嘅 #海鮮飯，同樣道理乳豬都唔係求其搵嗰地方都食到。

#Cochinillo（圖一）呢道名菜，正宗嘅係中部Segovia 先有，豬仔由品種、體重、屠宰週數到燒烤同上碟方式都有嚴格限制，例如：乳豬只限白種（一笑～）、唔可以超過三個禮拜大、只准母乳餵哺、豬身有特殊印記、燒製過程只可加鹽同水、菜式只限半隻或全隻上、絕對唔畀翻熱上菜，仲有其他比較難檢測嘅明文規定，涵蓋外皮顏色、肉質、香味等等，係一個品牌認證（圖二）。

逛超級市場、肉檔，有時都會見到白白淨嘅乳豬好安祥噉，微笑住瞓喺真空包裝入面，等你買返屋企自己燒……「君子遠庖廚」呢句說話係真嘅，而如果你見到之後唔忍心食，都未嘗唔係一件好事嚟嘅。

噉跟我去旅行就唔係得個「食」字咁膚淺嘅（好似係），我都實迫大家聽下歷史㗎喇。又係嗰句，#Segovia、#Ávila、#Salamanca 呢啲中西部高地，中世紀初期屬於基督教王國同阿拉伯人領地 #安達盧斯 之間緩衝帶嘅「#無人之境」(Tierra de nadie)，冇人住、冇人起樓、冇人搞破壞，所以始建於公元一世紀末左右嘅 #水導橋（圖三），堪稱西班牙現有保存得最好嘅羅馬建築，係地標式 #旅遊景點，大大座躉喺市中心，你想睇唔到都唔得。不過呢啲咁明顯嘅嘢，又使乜我講？下篇繼續同大家深度遊。

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)

=============

#Segovia（下）：教堂花窗、御花園

Segovia 市中心矗立嘅 #主教座堂（圖一），係西班牙最遲始建嘅 #哥德式教堂，因為又大又靚，被譽為「大教堂中嘅貴婦」(la Dama de las Catedrales)。教堂16世紀施工期間，哥德式建築已經逐漸過時，文藝復興藝術廣泛流傳，所以教堂內櫳都兼有 #文藝復興 特色 —— 講緊嘅係抬頭望見嘅花窗玻璃。呢啲色彩繽紛嘅作品大多數喺16同17世紀完成，描繪聖經故事場景同宗教人物，係西班牙 #花窗玻璃 藝術嘅重要遺產，大家欣賞教堂建築之餘都唔好走漏眼。

離市中心車程廿分鐘嘅San Ildefonso通稱La Granja（「農場」或「鄉郊宅第」之意，粵音近「喇關霞」），鎮內宮殿（圖二）自18世紀以嚟係西班牙國王嘅夏宮，而家開放畀遊客參觀，展出各種皇家珍藏。去過巴黎 #凡爾賽宮 嘅朋友，可能會有似曾相識嘅感覺，尤其是個巨大花園 —— 無他，起呢座夏宮嘅，根本就係個法國嚟嘅國王，而且正正係凡爾賽宮始作俑者 #路易十四 個孫，所以啲嘢都抄得好足下。

點解會有法國王族走咗嚟做西班牙國王嘅呢？是噉的，時維1700年，擁有家族招牌「鞋抽」下巴、長期體弱嘅卡洛斯二世（Carlos II，圖三）兩次婚姻均無所出，西班牙嘅 #哈布斯堡王朝 再無男嗣，宣告絕後。喺親法國嘅羣臣壓力下，卡洛斯喺病榻最後一次更改遺囑，指明家姐個孫、外甥個仔法國安茹公爵菲臘為繼承人 —— 菲臘阿爺係太陽王路易十四，阿嫲就係卡洛斯個同父異母家姐。Carlos II #英年早逝，菲臘嚟到西班牙繼位，是為菲臘五世Felipe V，係西班牙 #波旁王朝 第一個國王，亦即今日 #西班牙王室 嘅鼻祖。

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)