《尖尖鬍鬚達利：消失的十字架》

尖尖鬍鬚達利：消失的十字架

周遊列國參觀教堂同博物館，見得最多嘅肯定係 #中世紀 同 #文藝復興 時期嘅宗教畫作。但係唔好忘記，近代藝術都有唔少以宗教為主題嘅作品，創意同想像力都肯定超出以前嘅規限。

#加泰隆尼亞 畫家 #達利 (Salvador #Dalí) 後生時屬於叛逆嘅超現實派，但係中年時又返到天主教嘅懷抱，同時信服神祕主義思想。#梵蒂岡 博物館現存兩幅達利嘅傳統宗教主題試作，係佢後期更大作品嘅構思同草稿。

〈耶穌釘十架〉(1954) 嘅主角充滿 #古典主義 美感，簡約而比例勻稱，完全冇受難嘅痕跡，似乎代表一種超越肉身痛苦嘅精神理想，幅畫甚至連貴為宗教象徵嘅 #十字架 都欠奉，不過後來嘅正式作品Crucifixion（或稱Corpus Hypercubus）裏面，耶穌身後係有一個立方體十字架嘅。畫家保留慣用嘅空曠背景，唯獨有兩個人物，分別係將權杖放入耶穌手中加以嘲笑嘅士兵，以及用長矛拮穿 #耶穌 心口確定佢受刑而死嘅百夫長朗基努斯。

達利呢幅〈聖母領報〉又名〈三位一體試作〉，係1960年大作The Ecumenical Council嘅前身。上半部份嘅裸體男人，既可能係上帝本人（神？），亦可能係耶穌，講法不一而足；而下面嘅兩個人像，右邊嘅固然係聖母瑪利亞無誤，但左邊嘅就同樣眾說紛紜。如果按梵蒂岡博物館嘅講法，叫呢幅畫做〈聖母領報〉（西班牙文係La #Anunciación），噉左邊嘅模糊形象就應該係告知 #瑪利亞 即將懷孕生子嘅天使 #加百利；如果認為幅畫係 #三位一體，將左邊人像解讀為手執十架嘅耶穌就比較合理。唔知大家又睇到啲咩呢？

如果鍾意呢篇文，請你CLS支持 
此系列逢星期三、星期日更新，敬請大大力追post :0)