《Ávila：最光猛城牆、阿維拉的德蘭修女》

Ávila：最光猛城牆、阿維拉的德蘭修女

由西班牙首都馬德里搭車或者揸車去 #Salamanca，途中會經過海拔1117米、全西班牙地勢最高嘅省會 #阿維拉。羅馬 #城牆、阿拉伯人城牆大家去大城市見得多，但中世紀歐洲人起嘅城牆，最具代表性嘅就喺呢度。

正如之前喺地理篇 [1] 講過，西班牙中西部、中央山脈 (Sistema Central) 以北高地一帶，係 #基督教 王國同 #穆斯林 領土之間嘅緩衝區，中世紀初幾百年嚟都係「無人之境」。到收復失地運動 (#Reconquista) 一路進展，基督教王國先至慢慢開始喺度重新植入人口，史稱 #repoblación。

#Ávila 厚重紮實嘅羅曼式城牆明顯係呢個過程嘅產物，始建於11世紀末，延綿超過2.5公里，平均高12米，有88個半圓形瞭望塔，係西班牙保存得最完整嘅同類防衛建築，1985年被聯合國教科文組織列為世界遺產。呢度亦都號稱係世界上有完全照明嘅古蹟之中佔地最大嘅，打燈打得好猛，夜景離遠都幾靚㗎（圖一）。

牆內舊城有啲咩呢？大中細教堂、修道院乜乜乜非常密集，羅曼式同哥德式教堂加埋，據講多到人均計係西班牙之最。虔誠嘅天主教徒可以追隨聖人大德蘭（Santa Teresa de Jesús，圖二 [2]）嘅足跡，參觀佢嘅舊居 #博物館、佢創立嘅 #聖若瑟 修道院 (Convento de San José)，甚至趁十月喺城內參加佢嘅 #瞻禮日 慶祝活動（其實都係乘機開派對搞下露天音樂會噉）。

嚟遊覽嘅人，鍾意買一種叫做「阿維拉蛋黃」（yemas de Ávila，圖三）、用蛋黃同砂糖做嘅甜品做手信；要正本清源嘅話，粒嘢原名「聖德肋撒蛋黃」(yemas de Santa Teresa)，不過被最初發明嘅Flor de Castilla糕餅店註冊咗做商標。講明先，我覺得唔好食嘅，因為太甜，個質感又奇奇怪怪噉，但大家唔怕伏嘅可以試下。

[1] 見〈來上一課西班牙地理（四）〉https://www.facebook.com/JudyLeeLinguist/posts/1191692411255252
[2] 17世紀西班牙畫家Francisco de #Zurbarán 所作

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)