《文藝復興在西班牙》

文藝復興在西班牙：El Greco以外的Manierismo

大家可能睇書講過，#文藝復興 時期嘅藝術家諸如 #達文西、#米高安哲羅 等，作品追求絕對嘅和諧、比例、平衡，喺自然嘅前提之下表現理想嘅古典美感。但係到咗16世紀中期，藝術家開始將呢啲特質再放大、再誇張，造出不平衡同非自然，去達到超越現實而又更理想嘅藝術感。

希臘仔El Greco喺安排人物軀體比例同姿態方面冇錯係用咗呢種 #矯飾主義（#manierismo，又叫 #風格主義）手法，但佢公認另有自成一派嘅獨特風格，如果將佢監硬歸納成芸芸manierismo藝術家嘅其中之一，就會忽略咗佢其他方面嘅創新。

#西班牙 幾乎冇可以完全歸類為呢個派別嘅藝術家，比較接近嘅應該係西班牙文藝復興最重要嘅雕塑家兼畫家Alonso #Berruguete。Alonso喺畫家老竇Pedro Berruguete死咗之後，就去咗意大利繼續學師，由1507年留到1520年先返西班牙，喺 #華拉度列 (#Valladolid) 成立工作室。

佢嘅藝術概念係戲劇性嘅，作品基礎係利用人物面容描繪激烈嘅感情，整體構圖同形態反映出暴烈嘅表現力，肢體輪廓扭曲、尖銳、憤怒。Berruguete呢種特別嘅個人風格，可以喺佢最具代表性嘅兩個作品度睇到，兩者分別描繪 #聖巴斯弟盎 (San Sebastián) 被綁喺樹上亂箭射死（圖一），同埋 #亞伯拉罕 將個仔 #以撒 #獻祭（圖二）嘅場景。

同意大利等其他地方以大理石做材料唔同，呢啲 #雕塑 係承襲西班牙藝術傳統嘅木製品。雕塑家對人體 #解剖學 有深入認識，呢層梗係基本，但再睇真啲，呢啲人物嘅身型比常人修長，姿勢亦都九曲十三彎，毫不自然，正正就係manierismo系藝術家表現功架之處。

以上兩件Berruguete作品可以喺華拉度列嘅國立雕塑博物館睇到，而兼有畫作同雕塑嘅大型祭壇裝飾屏風（圖三）就現存喺 #Salamanca 城內Colegio Arzobispo Fonseca裏面嘅 #小教堂。

文中外語為 #西班牙文
如果鍾意呢篇文，請你CLS支持 
此系列逢星期三、星期日更新，敬請大大力追post :0)

====================

文藝復興在西班牙：獨特的銀匠風格

15世紀晚期，西班牙喺短短幾十年之內，先因為卡斯提亞王國嘅 #伊沙貝拉 同阿拉貢王國費蘭度二世聯姻共治，基本將葡萄牙以外嘅基督教伊比利亞半島完全統一成為 #西班牙 王國；1492年，呢對「#天主教雙王」(Reyes Católicos) 迫使半島上最後一個穆斯林王國格拉納達 (#Granada) 酋長國投降，同時宣佈驅逐 #猶太 教徒，達到宗教大一統；同年，佢哋贊助嘅 #哥倫布 到達中南美洲，西班牙開始進一步擴大版圖成為 #日不落帝國。國王嘅形象同權力有增無減，維護統治則依靠教廷同貴族支持。16世紀由頭到尾，西班牙政治、經濟、社會都經歷緊鉅變。

西班牙嘅文藝復興藝術，就係喺呢個時代背景之下出現。為咗彰顯國力同財富，最有勢力、最有錢有面嘅階級 —— 王室、貴族、 #教廷 —— 都會起一啲巨大嘅紀念式建築，再喺器物之上極盡雕花之能事，呢個就係西班牙文藝復興第一個階段 (Primer #Renacimiento, 1500–1530) 嘅由來。

呢個時期一個比較具爭議嘅別名係「銀匠風格」 #Plateresco，有指源於藝術家將銀器 (plata) 雕刻工藝應用喺石頭表面；主要創作形式係將意大利傳入嘅 #文藝復興 風格裝飾圖案，併入前一時期嘅 #哥德式建築 主體，係西班牙領土之內獨有。有人認為佢係西班牙文藝復興藝術嘅雛形，或者哥德時期同文藝復興之間嘅過渡，亦都有人認為係獨立嘅藝術風格，講法不一而足。

銀匠風格最集中嘅地方，係中部大學城 #Salamanca。薩拉曼卡大學呢間西班牙最老、同劍橋同期成立嘅大學，本部嘅外牆就係最出名嘅Plateresco作品。下篇同大家拆解呢種風格，等大家知道有咩欣賞重點。

圖片來源：Zarateman, CC0, via Wikimedia Commons

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)

====================

文藝復興在西班牙： #密集恐懼症 慎入

西班牙 #文藝復興 第一階段 (1500–1530) 又稱 #Plateresco，最主要特色係極度繁複嘅 #裝飾 細節，密密麻麻鋪滿成個平面，呢種驚死有一絲留白嘅設計取向，拉丁文稱為horror vacui，西班牙文譯「horror al vacío」。

裝飾全部係凸出石材表面唔多嘅淺 #浮雕，圖案包括動植物、人類、神話、盾徽紋章等等，最特別嘅係稱為 #grutesco 嘅穴怪圖像：半人半獸、人身草尾、雀頭獅身之類，乜嘢配搭都有。有時浮雕裝飾沿中軸發展，兩邊幾乎完全對稱（圖一）；呢種手法源於意大利，稱為a candelieri，係意大利文「燭台」嘅意思。

#Salamanca 大學舊本部外牆係呢個時期最具代表性嘅作品，每部份燭台對稱結構明顯，衍生嘅圖案似乎亂中有序 [1]。嚟到呢度，遊客嘅指定動作係「搵青蛙」：成幅外牆隱藏咗一隻青蛙仔（其實係蟾蜍，圖二），500年嚟無數嘅莘莘學子相信，只要搵到佢，學業就會馬（蛙？）到功成。去Salamanca見到紀念品舖頭好多 #青蛙 擺設賣（圖三），直頭好似吉祥物噉，就係噉樣嘅典故。其實青蛙係雕塑嘅一部份，就唔會走咗去嘅，但有啲學生雖然一早知道隻嘢喺邊，考試之前都係會去望多眼求個心安，可能有啲似我哋去 #文武廟 拜神。

[1] 見前文〈文藝復興在西班牙：獨特的銀匠風格〉

如果鍾意呢篇文，請你CLS支持 🙂
逢星期三、星期日更新，敬請大大力追post :0)

===================

文藝復興在西班牙：大學的知識階梯

睇完 #Salamanca 大學外牆、搵完青蛙，行到入面仲有另一個必睇嘅 #Plateresco 景點：知識之階梯。樓梯一側嘅 #浮雕 同當時嘅風格一脈相承，都係咁令人眼花繚亂，但其實描繪咗一個人進學修德、淨化為基督徒騎士嘅歷程。

人喺現世嘅存在、喺地上嘅生命，係一場 #朝聖。樓梯分成三段，每段對應知識之路嘅唔同階段。朝聖者打扮嘅主角由底部壁柱開始，向上望住將要經歷嘅旅程（圖一右下角）。第一段刻畫青少年時期嘅放任生活，跳摩爾人（穆斯林外族）舞蹈，甚至出現傳統上象徵無神論、敵基督嘅小丑角色。

接住係人生嘅第二個階段：進入成熟期，人需要喺好與壞、正義與邪惡之間抉擇，浮雕亦由中間分成完全相反嘅兩部分（圖二）。好嘅一邊有勤勞嘅蜜蜂，從花卉提取到花蜜；選擇行歪路嘅人，就會好似蜘蛛噉，一生不斷製造毒液。正直謹慎嘅人，識得駕馭自己嘅激情同慾望 —— 胯下個女人就係激情同慾望嘅化身囉；相反就被啲激情慾望騎返轉頭……最後，揸錘矛嘅下等人雖然喺邪惡嘅一邊耀武揚威，但最終都係被騎士用貴族嘅武器 —— 弓箭 —— 趕走。

行到樓梯嘅最後一段，會見到一個好似 #鬥牛 噉嘅場景（圖三），唔使多講又係象徵緊人馴服原始野性（隻馬）為自己所用，擊潰橫衝直撞、毫無自制嘅野蠻行為（隻牛）。憑住騎士精神，人最終可以達到最高嘅境界、絕對嘅善、純粹嘅愛，成為完人 —— 呢個就係最後一條壁柱上刻畫嘅形象。16世紀以 #騎士精神 為最高價值，除咗表現喺視覺藝術作品，仲發展咗 #騎士文學，以後再同大家研究。

文中外語為 #西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)