《伊比利亞半島上的十字軍：托洛薩會戰》

伊比利亞半島上的十字軍：托洛薩會戰（上）

啱啱過咗嘅7月16日，係 #中世紀 #伊比利亞 歷史一個重要嘅日子。12世紀末，信奉 #伊斯蘭教、佔領南部 #安達盧斯 嘅摩哈德王朝軍隊向基督教王國步步進迫，接連取得中部城鎮，卡斯提亞國王阿方索八世 (Alfonso VIII) 退守古都Toledo，開始籌備大反擊。公元1211年，摩哈德王朝哈里發Muhammad al-Nasir御駕親征，帶領近三萬兵力由北非越過 #直布羅陀 海峽，揮軍半島內陸再度入侵，迫近Toledo。

呢個時候，半島上嘅五個 #基督教 王國，由西至東分別係 #葡萄牙 (Portugal)、利翁 (León)、卡斯提亞 (Castilla)、納花拿 (Navarra) 同阿拉貢 (Aragón)，時戰時和，仲會因為各種利益甚至國王私怨，而同南面嘅 #穆斯林 領袖建立外交關係、簽訂條約。但係今次真係搞唔掂，呢啲摩爾人（基督徒對穆斯林嘅別稱）來勢洶洶，各國都感到極大威脅，必須「擱置爭議」，聯合抵禦外敵，以免冚包散。教宗諾森三世（Inocencio III，或譯依諾增爵三世）居中協調，徵召歐洲（尤其接壤半島嘅法國）基督教志願軍，促成呢次伊比利亞半島自家嘅 #十字軍 南征。

傳說阿方索八世得到當地一個牧羊人指點，翻過Sierra Morena山嶺，突襲敵方大本營，先贏一仗。7月16日，喺Las Navas de Tolosa（今安達盧西亞自治區Jaén省北部一處）嘅會戰開始，雙方互有攻守，摩哈德大軍人多勢眾，輕易包圍基督徒戰士。阿方索八世沉着應戰，以騎兵支援側翼，穩定中路之後，決定全軍傾巢而出，重騎兵、後衛、精銳部隊毫無保留進擊，猛烈嘅攻勢令摩爾人節節敗退，哈里發敗走，翌年遇弒身亡，伊比利亞半島南部羣龍無首，軍閥紛紛自立為酋長，短暫嘅taifa時代又再來臨。

圖：公元1200年伊比利亞政治勢力圖及Las Navas de Tolosa位置

===============

#伊比利亞半島 上的 #十字軍：托洛薩會戰（中）

#基督教 盟軍喺La batalla de las Navas de Tolosa（簡稱托洛薩會戰）大勝，標誌住 #穆斯林 勢力喺伊比利亞半島嘅衰落之餘，亦係基督教王國收復失地運動 (Reconquista) 嘅轉捩點，開啓咗進一步將南部 #安達盧斯 收歸基督徒領土嘅大門。阿方索八世因而被譽為西班牙歷史上最偉大嘅國王之一，美名el de las Navas（「Las Navas嗰個」），紀念佢嘅戰功。

離戰場幾公里之遙嘅La Carolina鎮有一個紀念碑，主體係五個高大嘅石像。對 #西班牙 歷史記性好啲嘅讀者，就算完全唔熟帝王將相，都可以從長盾圖案辨認出其中三個人嘅身份：卡斯提亞國名 #Castilla 係城堡Castillo一詞演化而成，持盾人當然就係國王阿方索八世；深淺直紋相間，係半島東北面 #阿拉貢 王國嘅旗號，所以相應嘅參戰國王係佩德羅二世 (Pedro II) [1]；而鐵鍊係 #Navarra 王國嘅標誌，由此可知最右面嘅係當時在位嘅Sancho VII [2]。

剩低嘅兩個人，最左邊嘅係帶領卡斯提亞軍隊嘅名將Diego López II de Haro，旁邊嘅睇裝束就知道係教廷中人 —— #Toledo 主教Rodrigo Jiménez de Rada係呢次出征嘅靈魂人物，去 #梵蒂岡 拎教宗詔書，周遊歐洲爭取支持、招募兵士，甚至親身上陣同國王一齊打仗。而呢餅五人大石雕像前面伶伶仃仃嗰個指路嘅青銅瘦骨仙，當然就係令基督徒軍隊先拔頭籌嘅地膽 #牧羊人 啦 [3]。

[1] Pedro粵音近「啤墮羅」
[2] Sancho粵音近「山鋤」
[3] 見〈伊比利亞半島上的十字軍：托洛薩會戰（上）〉

圖：SuspirodelMoro, CC BY 3.0 <https://creativecommons.org/licenses/by/3.0>, via Wikimedia Commons

文中外語為 #西班牙文
如果鍾意呢篇文，請你CLS支持 
此系列逢星期三、星期日更新，敬請大大力追post :0)

==============

#伊比利亞半島 上的 #十字軍：托洛薩會戰（下）

有啲人去博物館睇嘢睇到審美疲勞，硬係覺得幅幅畫都一樣，行到後尾完全係水過鴨背走馬看花，自己睇咗啲咩都唔記得。相信大家都好清楚，如果對 #藝術品 嘅歷史背景同典故冇乜概念，當然唔會知自己想睇乜嘢、應該留意乜嘢，冇辦法將腦裏面嘅知識連繫眼前所見，就好難真正欣賞到 [1]。

以19世紀西班牙畫家Francisco de Paula Van Halen呢幅描繪 #托洛薩會戰 (Batalla de las Navas de Tolosa) 嘅畫為例，驟眼睇咪就係打仗場面囉，冇乜特別。但係如果你觀察到畫裏面嘅駱駝、黑人、#十字架，即使唔知道戰役嘅背景，都可以推論到係 #基督徒 軍隊同北非 #摩爾人 打仗。

進階少少嘅「鑑賞家」可以認旗幟同徽號：前排左邊單丁舉手嘅士兵胸前、國王胯下黑馬嘅披肩，都有城堡印記，自然係城堡王國Castilla一方；中後排兩支白底紅紋章嘅旗，前面嘅劍尖十字配鳶尾花係聖雅各 #騎士團（Orden de Santiago，或譯聖地亞哥騎士團）標誌，後面嘅希臘十字配百合花就代表另一個騎士團Orden de Calatrava；畫布正中靠右見到黑白底紅十字旗，係法國嘅 #聖殿騎士團；細心留意，仲會睇到紅黃相間嘅阿拉貢王國旗號，以及其他參戰貴族嘅家徽紋章。

至於同樣積極嘅「納花拿」(Navarra) 王國，點解鎖鏈標誌 [2] 冇喺畫裏面出現？原來，「山鋤七世」嘅徽號本身係紅底黑鷹（前排左邊），鎖鏈正正係呢場戰役嘅成果：傳說敵方摩哈德王朝哈里發Muhammad al-Nasir一啲近身精兵，係以鐵鍊串起，以防臨陣淆底脫逃，Sancho VII同將士勇猛擊潰呢啲連環兵，搶走鐵鍊做戰利品。傳說就唔係幾合理㗎喇，歷史學家考據戰事時序亦都認為唔係真嘅，但係搞到連國徽都改埋，可見呢場仗幾咁有歷史意義呢。

[1] 其他藝術導賞文章包括〈伊比利亞半島上的西哥德王國藝術史〉、〈古城Toledo深度遊〉及〈El Greco畫作導賞〉系列
[2] 西班牙四大基督教王國徽號，喺下列相關文章解釋過

文中外語為 #西班牙文
如果鍾意呢篇文，請你CLS支持 
此系列逢星期三、星期日更新，敬請大大力追post :0)

相關文章：
伊比利亞半島上的十字軍：托洛薩會戰（上）
https://www.facebook.com/JudyLeeLinguist/posts/1306197173138108
穆斯林治下的中世紀西班牙：#密集恐懼症 慎入、哥倫布墓
https://www.facebook.com/JudyLeeLinguist/posts/1303764540048038
穆斯林治下的中世紀西班牙：#人類總要重複犯錯
https://www.facebook.com/JudyLeeLinguist/posts/1298674193890406
穆斯林治下的中世紀西班牙：清真西維爾
https://www.facebook.com/JudyLeeLinguist/posts/1301473890277103