《最美廣場容不下獨裁者》

最美廣場容不下獨裁者

西班牙大城小鎮，大都有一個Plaza Mayor，即係市中心嘅廣場。市集、展覽、旅客資訊站，甚至大家約人等人，都會喺呢度見到。Salamanca嘅巴羅克風格Plaza Mayor，號稱西班牙最靚，18世紀中期落成，同城內其他建築物一樣，通體用上省內特產Villamayor石建造，泛出柔和嘅淡黃色澤 [1]，夜晚着燈之後更加係金光閃閃，真係靚到飛起。

廣場四邊以拱廊騎樓圍繞，除咗時裝店、市政廳、雪糕店、藥房之外，仲有屹立過百年嘅城內最老咖啡店Café Novelty。呢間名店唔止係文人雅士嘅聚腳地，就連美國前總統卡特都到訪過。天冷嘅時候入去坐低嗌杯朱古力連油炸鬼churros，真係暖入心㗎（因住辣口）。

四邊騎樓總共88條支柱上，大部分刻有西班牙歷史名將、哲學家等偉人嘅圓形浮雕頭像，但係獨裁者佛朗哥躋身歷代國王一列（圖一），就有唔少人覺得唔順眼。2017年6月，工人按市政府決定，拆除圓章，結束佛朗哥喺廣場上80年嘅存在。

呢度亦都係全世界最早慶祝新年嘅地方（好似係）—— 講緊Salamanca獨有嘅「大學除夕」Nochevieja Universitaria。每年上學期尾二個禮拜四晚（通常係12月第二個星期四），呢度都會化身超級派對 (#fiesta) 場地，全場逼爆狂歡倒數「新年」，連踏正午夜要食12粒提子嘅習俗都做足。兩間大學生員眾多，但聖誕新年個個返鄉下，冇得一齊慶祝好可惜，而且年尾流流成個大學城冇厘狂野青春氣氛，都好似講唔過去，所以趁未放假提早慶祝，以假亂真。不過如果你問我呢就，又逼又嘈，老人家表示以後不鳥。

圖二：露天音樂會及夜景
圖三：好天嗰時啲人直頭喺度野餐曬太陽

[1] 見《西班牙中部的色澤》

文中外語為西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)