< 返回

《你有無燒好呢舊叉燒?》



作者:砂糖
日期:2016年1月25日

你有無燒好呢舊叉燒?

當然,「好」定「唔好」,真係充滿歧義。全力以赴、做妥本份,就算出到嚟效果唔得,係嘅,係做得唔好,但同時你可以話佢係「好」。

窮畢生精力,都未必做得到「效果出色」、「品質精良」嗰一種好,所以人類先會付出時間、心機,走去研究點樣可以盡善盡美:呢個最好、最善、最美,係永無止境嘅。如果真係要講,成個地球無一樣嘢係「好」的。

但努力將一件事辦妥,去到一個「對得住你啦」嘅水平,呢個嘅「好」,其實係應該要做得到嘅。我愛上咗一碟叉燒飯,但舊叉燒仲係生嘅,如果我真係好愛好愛佢,我梗係會理Q得佢,死都照食啦,方子有云:「自由意志就係開心食屎。」

現實問題係,唔係個個人都咁愛呢碟叉燒飯。當我未愛上一樣嘢之前,我始終都要食飯。見到碟叉燒飯會食死人,我又唔似得方子咁對呢碟叉燒飯咁有愛,愛到可以為咗佢犧牲自己嘅生命,嗰碟叉燒飯真係貼錢俾我都唔食。

尋晚我話,如果一間酒樓嘅食物難食過稻香、或者一間茶餐廳杯奶茶差過大家樂,又或者杯咖啡難飲過星巴巴,真係不如執咗佢好過。如果有啲舖仔嘅質素同上述食店嘅質素相若,我會稍微偏頗啲舖仔的:雖然如果覺得一直無咩長進,無咩心做都係會放棄,索性 Escape to the Country, Appreciate Koi。

如果真係想一個地方嘅文化做落去,承傳落去,多多少少需要有人紀錄、傳播、研究。

我之前話過拎住杯奶茶同拎住杯星巴巴一樣都係柒,細心諗落當時嘅提出嘅原因係錯,但我仍然覺得我句說話依然valid。星巴巴嘅咖啡豆咁深烘焙,出爐後十日八日要一定要用晒,而明顯地依家去星巴巴度買咖啡,見到部全自動機個豆箱入面啲豆,擺明已經唔得,仲要全自動機連粉都唔使temp,由原料到過程都唔得,拎在手上覺得柒,好很合理吖。至於奶茶嘅嘢,我上次提出後來覺得錯嘅原因係原料,但諗落更大問題係沖煮手法。係嘅,有好多師傅手茶係飲得下的,以咁嘅原料咁嘅價錢真係對得住你。但有更多更多係真係完全唔得,茶膽放置太耐呀、茶水比例問題呀、萃取率問題呀,好多好多啦。以偏概全係唔啱呀,但真係可以知得晒咩?

好喇,如果咁熱愛本地文化,咁中意呢杯奶茶,我哋研究落去,既可以揀承傳以往嘅做法,謹慎認真咁做好每個步驟,沖出一杯好飲嘅、見得人嘅;可以研究佢嘅原理,用新嘅方式沖出一杯一樣好飲而不離其宗嘅奶茶;可以研究佢背後嘅文化同影響,紀錄每一個細節;亦可以開班教學教人沖教人飲;又或者開舖令更多人飲到似樣嘅奶茶。呢啲情況,起碼稱得上「莊敬自強」,做好咗嘅,村民見到,多少會俾機會你做得更好。

問題嚟喇,如果你無將呢件事做好,傳遞唔到你嘅愛俾人,無咩人會俾機會你。人嘅容忍度始終有限,你呢樣嘢又唔係佢愛到願意犧牲嘅事,好自然地就會放棄你,唔理你,甚至攻擊你、打壓你。你不斷強調自己有幾愛都好,無人感受得到你嘅誠意,你嘅心思。

我愛一個人,呢份心意傳遞唔到,最多都係我自己抵死,孤獨終老。如果我愛一個社會,而呢份心意傳遞唔到,我唔知我要去青山定小欖先啱喇。

燒好咗呢舊叉燒、沖好咗呢杯奶茶、炒好咗呢碟牛河,我先有得再講其他嘅嘢:例如村民唔識欣賞啦(係呀,呢個理由我接受嫁,一個專注於技術嘅人,宣傳係會差啲,好合理一啲都唔過份,呢個係技能點分配嘅問題)。

全文 1117 字 (唔計英文、空格、標點)