《看得見的羅馬古城Mérida》

看得見的羅馬古城Mérida

有時睇啲西班牙旅遊景點相，會見到一座爛爛地、紅灰石頭相間嘅三層拱建築，周圍乜都冇，奇奇怪怪噉。其實呢座「奇跡水導橋」（Acueducto de los Milagros，圖一，另見 [1]）已經有兩千年歷史，係聯合國世界文化遺產、梅里達 (Mérida) 考古遺址羣嘅一部分。

Mérida喺公元前25年由奧古斯都大帝建城，原名Augusta Emerita，係羅馬帝國琉息太尼亞 (Lusitania) 行省首府。呢度有齊教科書上面嘅羅馬建築遺蹟，而且保存同修復得原汁原味，幾個露天劇場同競技場兩千年前幾大，而家你見到就有幾大，直頭好似置身《賓虛》戰車決鬥嘅經典場景一樣，個氣勢勁到我覺得自己又細粒又孱弱（其實不嬲都好似係）。

呢度好有羅馬帝國嘅氣息，所有景點都大大件，座落喺城市正中心古羅馬廣場嘅Templo de Diana（圖二）更加唔例外，超過三米高嘅平台將成個花崗岩圍柱式建築托高，睇落（睇上？）更加宏偉莊嚴。雖然叫做戴安娜神殿，但唔好以為係崇拜乜嘢高貴女神嘅地方 —— 有呢個名只係考古考錯，後來發現嘅雕塑，證明呢座神廟係起嚟將皇帝當神噉拜嘅。

文靜少少嘅遊人可能會鍾意羅馬藝術博物館 (Museo Nacional de Arte Romano)，呢度特登設計到好似其他羅馬建築噉，氣勢有增無減（圖三）；配合雕像嘅擺位同燈光效果，成個環境幾乎令人望而生畏，係一個好特別嘅博物館。最搞笑嘅係落到地牢，會發現石板呀石柱呀馬賽克呀呢啲文物多到就噉躉喺度，就知道梅里達呢度兩千年前係幾咁風光。

[1] 有說奇跡水導橋係幾百年後科多巴清真寺圓拱用色嘅靈感來源，詳見〈科多巴清真寺大教堂（一）：圓柱森林〉。

文中外語爲西班牙文
如果鍾意呢篇文，請你CLS支持 
此系列逢星期三、星期日更新，敬請大大力追post :0)