《韋小寶的西班牙祖先》
韋小寶的西班牙祖先（上）：流浪漢小說初探
華人世界之中，就算唔睇武俠小說，都一定知道韋小寶呢個角色。倪匡將成套金庸武俠小說前前後後睇咗最少27次（呢幾年又可能睇多咗幾次），結論係喺登峯造極嘅《鹿鼎記》之後，「他寫不出來了」。《鹿鼎記》突破咗好多清規戒律、道德包袱，完全擺脫過往武俠小說主角英雄式正義完人嘅設定，描寫一個有血有肉、同我哋一樣會度縮、自私、淆底、蠱蠱惑惑、練精學懶嘅小人物（我唔係針對你，我係話在座咁多位……），但係韋小寶憑藉呢啲性格竟然屢建奇功，再加上絕不出賣朋友嘅少少英雄氣質，可以稱得上係一個「反英雄」人物（畀返啖砂糖大家）。
撇開「武俠小說」嘅標籤，從世界文學角度睇，應該可以將《鹿鼎記》歸類為「流浪漢小說」(novela picaresca)，或者衰啲叫做「惡棍小說」。呢一個小說形式，公認嘅鼻祖係1554年出版嘅《小癩子》（La vida de Lazarillo de Tormes y de sus fortunas y adversidades，簡稱Lazarillo de Tormes，圖一）。
小癩子原名小拉撒路Lazarillo，係古城Salamanca（圖二）一個貧困嘅細路，繼父係黑人，被指控盜竊而遭絞刑；阿媽仲要養Lazarillo嘅混血同母異父細佬，不得已請求一個盲嘅乞衣收Lazarillo為徒，阿仔從此浪蕩江湖。都未出城，第一次學到嘢，就係被老細整蠱，撼咗個頭埋羅馬橋頭隻公牛野豬石像度 [1]。
主角每換一次老細，書就會開新一章，全書總共有七章，全部以第一人稱寫成。Lazarillo嘅老細不乏貴族同教會人物，每一個都表現出封建社會同天主教制度嘅偽善腐化：神職人員極度孤寒，對Lazarillo每四日配給一個洋蔥，有次將自己食肉剩低嘅骨放喺碟度畀Lazarillo，竟然用教會聖餐儀式嘅禱文，話骨頭已經係Lazarillo嘅全個世界，話佢活得比教皇更好；鄉紳大肆炫耀財富，但係其實自己都餵唔飽，莫講話畀到做侍從嘅Lazarillo乜嘢好處；最後一章，主角接受大祭司安排嘅親事，同女傭結婚，容忍老婆同老細私通，過上安穩嘅生活。
睇到呢度，相信大家都估到呢部小說有咩意義喇啩。下篇同大家探討下。
[1] 隻嘢同埋兩師徒嘅紀念碑可以睇〈去西班牙考古：牛定豬？〉 https://www.facebook.com/JudyLeeLinguist/posts/1202604226830737
文中外語爲西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)
同系列文章：
最美廣場容不下獨裁者
https://www.facebook.com/JudyLeeLinguist/posts/1293962251028267
韋小寶的西班牙祖先（下）：《小癩子》的文化遺產
https://www.facebook.com/JudyLeeLinguist/posts/1224052361352590
承先啓後的世紀之「交」：淫媒老婦Celestina（四之一）
https://www.facebook.com/JudyLeeLinguist/posts/1225922504498909
============
韋小寶的西班牙祖先（下）：《小癩子》的文化遺產
《小癩子》時代背景係16世紀中葉西班牙「黃金年代」(Siglo de Oro)，嚟自美洲殖民地源源不絕嘅金銀財寶、農作物只係惠及上流社會，基層反而因為連年白白交稅應付國王周圍打仗、封建制度崩潰、管治不善等等嘅原因而日益貧困，初級產業漸漸衰退，無業遊民非常之多，《小癩子》主角就係其中之一。
故事主軸係佢嘅個人成長同教育，所以亦都可以算係較早期嘅教養小說（又稱成長小說，novela de formación/novela de aprendizaje，原詞為德文Bildungsroman）。故事除咗用黑色幽默表現低下階層嘅艱苦生活同悲慘命運之外，亦明顯批判社會上層嘅虛偽，極度寫實噉揭露人性陰暗面，戲謔以往歌頌英雄事蹟、宣揚宗教道德嘅作品（例如騎士文學literatura caballeresca），辛辣出位「誨淫誨盜」，好快就被宗教裁判所列為禁書。
作者可能都一早估到會有清算嘅一日，所以作品從一開始就係佚名出版。曾經有人估，故事大大力批判天主教教廷，可能係被迫害嘅猶太人寫嘅。不過書裏面表現出對個人才智嘅認可、對自由意志嘅肯定、對平凡人物嘅細緻刻畫，仲有寫實嘅風格，令學者認為作者必定係文藝復興時期嘅人文主義者。2010年，古文書學家Mercedes Agulló宣佈搵到Diego Hurtado de Mendoza嘅遺囑，裏面提到「為Lazarillo出版而做嘅修訂」，確認《小癩子》嘅作者極有可能係呢位出身名門望族嘅詩人、史學家、外交家兼軍人。
到底呢本書有幾重要呢？現代文學鉅著《唐吉訶德》裏面竟然兩次分別提到《Lazarillo de Tormes》同拉撒路，而且顯示出作者塞萬提斯 (Miguel de Cervantes) 對小說嘅內容同意義非常了解；有啲人甚至認為，《小癩子》裏面對當時社會文化嘅描述同批判、諷刺戲謔嘅表達手法、反對舊有文學形式嘅主張，成套加埋根本就係《唐吉訶德》嘅前身。
名畫《食子的塞頓》嘅作者、西班牙殿堂級畫家哥雅 (Francisco de Goya) 都曾經畫過一幅《Lazarillo de Tormes》，描繪盲人老細監硬擘開小拉撒路個口，伸個鼻去聞佢係咪偷食香腸（圖一）。時至今日，由於阿仔第一份工實在太深入民心，西班牙文裏面，導盲犬就係叫lazarillo，足證呢部作品係西班牙文字裏面幾咁有地位。如果大家真係有興趣，可以搵搵楊絳嘅中譯本。
文中外語爲西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)