《科多巴清真寺大教堂》
科多巴清真寺大教堂（一）：圓柱森林
公元756年，阿卜杜拉赫曼一世 (Abderramán I) 喺安達盧斯建立科多巴酋長國，企穩陣腳後，784年開始修建科多巴清真寺。有啲導遊會話畀你聽清真寺原址係教堂，劈開兩半分別服務基督徒同穆斯林，後尾由阿卜杜拉赫曼一世買起云云；但有學者考證現址地底結構同文物、早期文獻、穆斯林統治者同基督徒民眾嘅協議同慣例，以及西班牙境內其他清真寺嘅歷史，提出當時並無拆教堂起清真寺嘅做法，認為呢個講法應該係幾百年嚟誤傳，甚至係教會勢力篡改歷史而成。
原裝八世紀建造嘅禮拜正殿 (sala de oración)，按圓柱平整對稱嘅間隔，打直可以數到11道中廊，打橫就有12段（圖一黃色螢光筆方格內）。呢啲分隔中廊嘅圓柱形成一個「圓柱森林」（圖二），喺清真寺多次擴建後總共有1300碌，係呢個景點嘅招牌打咭位。先講最搶眼嘅雙圓拱，上面嘅係半圓 (arco de medio punto)，下面嘅係馬蹄形 (arco de herradura)，紅磚白石相間砌成嘅外觀係咪好獨特呢？靈感相信嚟自現今西班牙西部、羅馬時期重鎮梅里達 (Mérida) 嘅水導橋（Acueducto de los Milagros，圖三），亦都有人話圓柱加條狀紋路嘅設計，睇落好似棕櫚樹，除咗係天堂嘅樹種之外，亦都可能係阿拉伯人潛意識思鄉噉話。
由下而上睇，圓柱對上、同下拱交接嘅位置使用古典羅馬柱式（圖四藍箭咀），成爲冠飾（cimacio，圖四紅箭咀）嘅基座，冠飾再對上係底部以卷狀托飾 (modillones de rollos) 裝飾嘅方柱（圖四8號位置），方柱盡頭生出上層圓拱，承托天花重量。為咗避免橫向移位，同時加強內聚力，就加埋下層圓拱做支架，固定兩邊方柱。所以話，雙圓拱嘅設計本身，其實係力學考慮：清真寺要達到特定高度嘅話，支柱就需要加粗，但噉又會影響信眾望向禮拜方向 (quibla) 嘅視線；用兩層圓拱加強結構，就可以兩全其美。
下篇繼續順住擴建歷史，同大家仔細欣賞呢座世界文化遺產。
文中外語爲西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)
同系列文章
穆斯林治下的中世紀西班牙：科多巴酋長國
https://www.facebook.com/JudyLeeLinguist/posts/1205173613240465
科多巴清真寺大教堂（二）：橙！
https://www.facebook.com/JudyLeeLinguist/posts/1209702179454275
科多巴清真寺大教堂（三）：裝飾、裝飾、裝飾
https://www.facebook.com/JudyLeeLinguist/posts/1211797432578083
科多巴清真寺大教堂（四）：今日的規模
https://www.facebook.com/JudyLeeLinguist/posts/1213858925705267
=================
科多巴清真寺大教堂（二）：橙！
公元840年，阿卜杜拉赫曼二世 (Abderramán II) 將清真寺向南擴建，加多八個橫段 (tramos)。十世紀中期，已經自立為哈里發（Califa，伊斯蘭世界最高宗教同政治領袖）嘅阿卜杜拉赫曼三世 (Abderramán III) 將正殿外嘅院落擴建近一倍，並且起咗新嘅叫拜樓 (minarete/alminar)。基督徒重奪科多巴後，叫拜樓改建成鐘樓（圖一），樓高54米，係全城最高嘅建築物（香港人表示一笑～）。
穆斯林禮拜前需要洗小淨，淨禮範圍包括手腳、口鼻、頭同膊頭，所以水源可以話係清真寺必備嘅配套。科多巴清真寺庭院除咗噴泉、水池之外，地面仲有縱橫交錯嘅水槽，確保每一個角落雨露均沾。仲有一個講法係，嚟自沙漠嘅北非同阿拉伯人，物以罕爲貴，認為水係帶來生命嘅美好事物，特別識得欣賞同珍惜水嘅美態。於是當佢哋嚟到水源相對充足嘅伊比利亞半島，就無論起乜嘢都要有好多好多水以供賞玩，位於Granada嘅Generalife花園就係最好例子，以後再同大家介紹。
今時今日嘅庭院又名「橙樹園」（Patio de los Naranjos，圖二），種咗排列整齊嘅橙樹、柏樹同棕櫚樹，就好似將殿內嘅圓柱森林延續到室外一樣。橙樹係西班牙同葡萄牙南部隨處可見嘅植物，有啲人屋企前門或者後院都會種，不過如果你諗住周圍摘或者執嚟食，就應該冇乜着數 —— 我聽學校團嘅領隊話，試過有個學生貪得意摘咗搣開食，一咬，面容扭曲！佢冇死，不過就苦口苦面噉囉。呢啲橙只係普通街邊植物，絕對唔似特登培植嘅農產品咁甜，所以想食橙都係去超級市場或者蔬果店買啦，幾公斤幾公斤咁買（圖三），計返港紙都唔使十蚊一公斤，仲有分榨汁橙同食嘅橙，好講究㗎。離題講多句，喺西班牙食早餐，主食同咖啡以外通常仲有另加鮮榨橙汁嘅選擇（係呀，又飲咖啡又飲橙汁），幾乎每間餐廳或者酒吧都有自動榨汁機，啲橙隊晒上去，機器就會自動將啲橙開邊、榨汁，另一邊嘔返啲皮出嚟，幾得意 [1]，鍾意純純粹粹、赤裸裸連纖維草青味鮮橙汁嘅朋友唔好錯過。
[1] 呢條片加埋個配樂好搞笑 https://www.youtube.com/watch?v=z08NMpS_Z_w
文中外語爲西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
==============
科多巴清真寺大教堂（三）：裝飾、裝飾、裝飾
阿卜杜拉赫曼三世個仔哈卡姆二世 (Alhakén II) 公元961–976年在位期間，再向南擴建科多巴清真寺，正殿原有11道中廊 (naves) 不變，但就用12個新橫段 (tramos) 加長咗，盡頭就係現有嘅半圓形壁龕（mihrab，中文音近「米哈拉布」，又叫「凹壁」），用嚟指示禮拜方向（quibla，中文音近「基卜拉」），而且重劃咗哈里發禮拜專用空間 （macsura，中文音近「麥格蘇拉」）[1]。從藝術角度睇，呢次擴建係最重要嘅一次，全部用貴重物料，例如柱身嘅粉紅同綠色嘅大理石，仲整色整水極盡花巧之能事。
新嘅macsura喺mihrab正前方，佔地三道中廊咁闊，三段各有一個典型嘅伊斯蘭式傘形穹頂，肋架縱橫交錯，交織出嘅中空地方就係穹頂頂端（圖一），當中又以中間嘅一個最特別，以金碧輝煌嘅拜占庭式馬賽克同金屬色澤嘅陶瓷裝飾（圖二）。呢邊嘅半圓拱支架，由以往嘅馬蹄形進化成交叉重疊嘅葉形拱 (arcos lobulados)，形成飽滿密集嘅結構，拱石 (dovelas) 飾以阿拉伯花紋 (ataurique) 淺浮雕。葉形拱可以係三葉或者五葉，但噉樣搞法其實冇乜特別力學意義，裝飾用途大於一切。拱與拱之間嘅方柱，竟然再加咗圓柱仔裝飾（圖三），大圓柱柱頭完全採用伊斯蘭風格。
科多巴清真寺嘅mihrab（圖四）相當特別，據講係第一個大到獨立成室嘅壁龕，而唔係喺幅牆度挖個凹位出嚟咁簡單。壁龕所在嘅牆身可以分為兩部份，上面係由葉形拱組成嘅盲拱廊，全個表面以阿拉伯式花紋覆蓋，主要係花卉圖案；下部壁龕入口係一個巨大嘅馬蹄形圓拱，座落喺兩對大理石細柱之上，包圍拱門外側嘅長方形面板叫做alfiz，呢度有內外兩層，同樣飾以阿拉伯式花紋，仲有庫法體伊斯蘭書法 (escritura cúfica)。根據伊斯蘭教義，表現人或動物嘅肖像係真主阿拉獨有嘅特權，所以伊斯蘭建築完全禁止具像藝術，全部採用連續嘅花卉藤蔓、幾何紋理同文字做裝飾，大家欣賞伊斯蘭藝術嘅時候都會一再見到。
[1] 平面圖請睇上一篇嘅插圖，今次講緊粉紅色螢光筆方格：https://www.facebook.com/JudyLeeLinguist/posts/1207815489642944
文中外語爲西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
==============
科多巴清真寺大教堂（四）：今日規模
將科多巴清真寺整到美輪美奐嘅哈卡姆二世 (Alhakén II) 死後，阿仔希沙姆二世 (Hisham II) 以11歲稚齡繼位，大權旁落至權相Almanzor手中。佢希望喺清真寺留低自己嘅印記，決定展開史上第三次、亦係最後一次嘅正殿擴建。好可惜可能因為工匠技術問題，呢一次擴建以量代質，得個大字，全部沿用舊有設計，藝術上無甚可觀。
之前嘅擴建已經令南面禮拜方向嘅quibla牆身相當貼近河流，建築冇辦法再向南伸延，所以選擇喺側面向東擴展，正殿加多八道中廊，成為現有嘅19行結構；庭院亦都相應擴闊，整體擴建嘅部份幾乎等於原有嘅面積，成個建築佔地幾乎大咗一倍。指示禮拜正向嘅mihrab壁龕並冇相應東移，所以今日見到嘅mihrab並唔係喺中線之上（圖一）。
清真寺嘅外圍有好多大門通往庭院同正殿，最常見嘅設計係成幅門牆分為三份，兩邊稍窄，中間最闊最高，門口位置係伊斯蘭式馬蹄形圓拱 [1]，用方形門框 (alfiz) 框住，對上係馬蹄形圓拱或多葉拱構成嘅盲拱廊。門牆兩邊有窗，但係用幾何圖案格仔窗花封住，窗對上係大加裝飾嘅盲拱（圖二）。
公元1236年，基督徒重奪科多巴，清真寺迅即改為教堂用途，裏面陸續劃出小教堂，最後喺16世紀，科多巴大主教決定喺清真寺裏面起返一個大教堂（圖三），所以今時今日大家去參觀嘅時候，都會見到好多平時見慣嘅西方教堂特色（圖四）。
[1] 有關伊斯蘭同西哥德式圓拱嘅分別，請睇〈伊比利亞半島上的西哥德王國藝術史（公元506–711年）（三之一）：建築篇 〉https://www.facebook.com/JudyLeeLinguist/posts/1178635355894291
文中外語爲西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)