《穆斯林治下的中世紀西班牙》
穆斯林治下的中世紀西班牙：科多巴酋長國
由穆斯林 —— 統稱爲摩爾人(los moros) —— 統治嘅伊比利亞半島，稱爲安達盧斯 (Al-Ándalus)，亦都係今日南部省份安達盧西亞 (Andalucía) 嘅前身。
我喺介紹西班牙北部地理嘅時候 [1]，提過倭馬亞王朝八世紀初喺伊比利亞半島擴張，全盛時期覆蓋半島絕大部分土地。穆斯林統治者嘅控制手段主要有兩種，第一種係軍事勝利、接受敗者投降，另一種就係協議：同樣信奉亞伯拉罕一神宗教嘅有經者，包括基督徒同猶太人，稱爲齊米 (dimníes)，阿拉伯文意思係「受保護嘅人」，只要交付吉茲亞 (yizia) 人頭稅，就可以得到包容同埋享受相對自主，有權喺穆斯林治下地區居住並受同等保護，唔需要履行穆斯林嘅義務，但係喺產權、合約、政治方面嘅權利就受到一啲限制。
公元750年，阿拉伯半島上嘅倭馬亞王朝被推翻，倖存者阿卜杜拉赫曼逃避篡位嘅阿巴斯家族追殺，輾轉登陸伊比利亞半島，成為第一個真正踏足半島嘅倭馬亞家族成員。佢利用當地嘅部落矛盾同各地叛變造成嘅兵力真空，趁機武力統一安達盧斯，建立獨立嘅科多巴酋長國（Emirato de Córdoba，圖一）。
科多巴係穆斯林喺公元711-712年首次攻入伊比利亞半島時極速佔領嘅地方，716年成為安達盧斯首府。安達盧斯水土同天然資源豐富，地理位置優越，國內外水陸交通都非常便利，農業、工業、商業（圖二）發達，經濟實力極爲雄厚。唔單止噉，呢度仲係伊斯蘭同基督教兩種文化交匯之處，數學、天文、醫學、農業學說百家爭鳴，出產咗完成人類史上首次滑翔飛行嘅Abbás Ibn Firnás、西歐世俗思想之父伊本魯世德 (Averroes) 呢啲博學家。喺穆斯林統治者經營之下，科多巴成為地中海、歐洲、北非地區頂尖先進嘅政治、文化、教育同經濟中心，而且係歐洲最大城市，公元800年左右人口超過20萬，據講達到當時世界人口嘅0.1%，喺11世紀初更倍增至40萬。
超級城市又點少得一座宏偉嘅地標式宗教建築（圖三）呢？下篇同大家去睇。
[1] 來上一課西班牙地理（四）：四季如春的綠色西班牙 https://www.facebook.com/JudyLeeLinguist/posts/1191692411255252
文中外語爲西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
同系列文章
穆斯林治下的中世紀西班牙：#人類總要重複犯錯
https://www.facebook.com/JudyLeeLinguist/posts/1298674193890406
穆斯林治下的中世紀西班牙：#戰國時代
https://www.facebook.com/JudyLeeLinguist/posts/1296434217447737
科多巴清真寺大教堂（一）：圓柱森林
https://www.facebook.com/JudyLeeLinguist/posts/1207247349699758
科多巴清真寺大教堂（二）：橙！
https://www.facebook.com/JudyLeeLinguist/posts/1209702179454275
=====================
穆斯林治下的中世紀西班牙：#人類總要重複犯錯
#科多巴哈里發國 喺1031年覆滅之後，分裂成由唔同勢力控制嘅 #taifa「泰法」小酋長國。呢啲小國多數喺軍事方面長期積弱，需要打仗嘅時候就聘請基督徒僱傭兵，閒時就又傾又砌；半個世紀之間，taifa嘅數目由最初嘅25個，兼併到1085年剩返九個。
1085年係 #中世紀西班牙歷史 上一個極度重要嘅年份。喺呢一年，卡斯提亞 (#Castilla) 及利翁 (#León) 國王阿方索六世 (Alfonso VI) 收復中部古城 #Toledo —— 祖先嘅根據地、西哥德王國嘅首都 [1]。重奪呢個淪陷近400年嘅古都，對收復失地運動 (Reconquista) 有重要嘅象徵意義。
#阿方索六世 一直揮軍南下、步步進迫，搞到啲taifa好頭痕；既要應付左右鄰居，又要抵抗北方勢力，佢哋終於都忍唔住把心一橫，邀請北非 #摩洛哥 嘅 #穆拉比特王朝 (Almorávide) 干預，希望呢啲 #柏柏爾人 (bereberes) 可以幫手趕走基督徒軍隊，捍衛伊斯蘭土地，還佢哋「#正常生活」。噉樣做當然係 #引狼入室 啦，結果穆拉比特軍隊殲滅半島上絕大多數taifa，成功擴張到歐洲。
12世紀初，北非穆拉比特王朝步入衰亡，逐漸被 #摩哈德王朝 (Almohade) 取代；伊比利亞半島上，taifa又漸漸出現返，換嚟嘅係基督徒喺 #伊比利亞半島 上節節勝利。1147年 #葡萄牙 獨立後首任國王阿方索一世（澳門譯「殷豐素」）收復里斯本後，啲taifa又開始頂唔蒲，正所謂人類總係重複犯錯 —— 摩哈德柏柏爾人援兵入侵，#泰法時代 再度結束。
圖：中世紀伊比利亞政治勢力分佈圖
[1] 見〈伊比利亞半島上的西哥德王國藝術史〉系列及〈古城Toledo深度遊〉系列
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
======================
穆斯林治下的中世紀西班牙：#戰國時代
將 #科多巴清真寺 擴大到今日規模嘅權相Almanzor喺公元1002年死後，權力先後由兩個仔接手。1008年，細仔Sanchuelo成功迫使國王希沙姆二世 (Hisham II) 將佢立為繼承人；翌年，同屬倭馬亞家族嘅穆罕默德二世 (Muhammad II) 趁Sanchuelo北上打仗時發動政變奪位，但好快又被其他親戚推翻，科多巴哈里發國開始七國咁亂。
廿年內戰期間，幾任 #哈里發 相繼被篡又復位，有影響力嘅氏族亦都不時乘虛而入。1031年，一班科多巴貴族將希沙姆三世 (Hisham III) 下獄，#倭馬亞王朝 嘅哈里發國正式崩潰，原有喺伊比利亞半島上佔領嘅土地分裂成大大小小嘅 #taifa 王國（粵音近「呔化」，中譯「#泰法」）。
#泰法時代 嘅呢啲穆斯林小 #酋長國，各由原哈里發國唔同嘅派系，以及阿拉伯人、北非 #柏柏爾人 (bereberes)、東歐基督徒奴隸後裔 (saqalibas) 等族羣組成（圖一），雖然互相攻伐、輪替頻繁，政治同軍事上無所作為，但係仍然保留 #安達盧斯 [1] 過往幾百年嘅傳統，注重文化同藝術發展。呢個時期最具代表性嘅伊斯蘭建築係西班牙東北部 #薩拉戈薩 (#Zaragoza) 嘅 #Aljafería 宮殿（圖二、圖三）。
喺 #穆斯林 勢力化整為零嘅同時，北方嘅 #基督教 王國就乘勢步步進迫，逐步收復土地 [2]，仲衍生咗《El Cantar de mio Cid》呢類騎士史詩 [3]。以往基督教國王向穆斯林鄰居納貢，而家就調返轉，即使係比較大嘅taifa，都會委曲求全，交保護費畀卡斯提亞 (#Castilla)、利翁 (#León)、阿拉貢 (#Aragón) 等北方諸國，得到一夕安寢，直到被兼併。
（待續）
[1] #伊比利亞半島 上嘅穆斯林勢力範圍
[2] 見《來上一課西班牙地理》系列（四）及（五）
[3] 見〈最古西班牙文詩《我薛之歌》〉及〈續談El Cantar de mio Cid〉系列
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
============
穆斯林治下的中世紀西班牙：清真西維爾
#泰法時期 係一個長期積弱嘅年代，但都有少數相對強勢嘅 #taifa，國祚近100年嘅薩拉戈薩泰法 (Taifa de Zaragoza) 就係其中之一。舊城區外11世紀建成嘅Palacio de la Aljafería夏季宮殿，係呢個時代唯一留存嘅大型建築，裏面嘅裝飾元素開始用多咗幾何形狀，係以後南部 #Granada 酋長國建築藝術嘅前身。
至於1090至1146年間統治安達盧斯嘅 #穆拉比特王朝 (Almorávide)，喺伊比利亞半島上嘅活動以軍事行動為主，所以喺現今 #西班牙 境內並無遺蹟。反而，半島上嘅穆斯林、基督徒、猶太人工匠被送去北非工作，所以呢個時期嘅藝術要喺摩洛哥、阿爾及利亞、突尼西亞先睇到。
1146年到1238年間，#摩哈德王朝 (Almohade) 以 #西維爾 (Sevilla) 為伊比利亞半島上嘅政治中心，除咗清真寺之外，呢個時期最搶眼嘅建築就係 #黃金塔（Torre del Oro，左圖）。12邊形柱體嘅瞭望塔今日係軍事博物館，座落瓜達基維河 (Guadalquivir) 右岸，控制入城嘅水路，再由城牆連繫另一個瞭望塔「白銀塔」(Torre de la Plata)。呢啲以防衛為主要功能嘅堡壘同城牆，係軍事力量嘅表現，喺對抗基督教王國入侵方面非常重要。
摩哈德王朝仲喺西維爾起咗清真寺。佢哋呢個族羣，風格樸實而對宗教非常嚴謹，注重建築本身多於裝飾細節，欣賞嘅時候要記住裝飾從屬於建築結構，喺建築師同工匠嘅計劃中比較次要，同科多巴清真寺嘅擴建部份唔同 [1]。原設計喺1184至1198年間建成，禮拜殿有17道中廊同10個橫段，但15世紀起改建為 #哥德式 大教堂，清真寺特色比較明顯嘅地方就只剩出面嘅 #橙樹園（右圖），以及後來加建成教堂鐘樓嘅 #叫拜樓 (#minarete)，下篇同大家欣賞。
[1] 見〈科多巴清真寺大教堂（三）〉
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
===============
穆斯林治下的中世紀西班牙：#密集恐懼症 慎入、哥倫布墓
摩哈德時代（公元1146-1238年）裝飾風格雖然講唔上富麗堂皇，但係就出產咗西班牙伊斯蘭藝術最具代表性嘅裝飾圖案sebka（圖一）。Sebka可以話係 #科多巴清真寺 多葉拱 (arcos lobulados [1]) 嘅進化版：交叉重疊嘅拱形裝飾，尖端處再延伸出同樣波幅嘅斜向紋路，層層交織成密鋪嘅菱形圖案，菱形裏面再雕刻植物花紋，有時加上彩色有光澤嘅陶瓷裝飾。周遊西葡同北非列國嘅時候見到sebka，就知道眼前嘅文物，製作年代唔會早過12世紀。
#西維爾 清真寺大教堂嘅鐘樓（圖二），樓高104米，自中世紀以嚟都係西維爾嘅地標之一。塔尖有隻風向雞，鐘樓亦因以為名，叫La Giralda。建築前身係清真寺嘅叫拜樓 (minarete)，外牆矩形平面左右兩份以sebka裝飾，中間露台將自然光引入樓身內籠。登樓唔需要行樓梯，因為鐘樓入面全部係兜兜轉轉嘅斜路，方便運送物資。
至於教堂本身，最多人留意嘅係 #哥倫布 之墓（圖三）。抬棺嘅四個人像身披甲冑，睇得出分別代表組成西班牙嘅四大王國：
- 利翁 (León)，意即「獅子」；
- 卡斯提亞 (Castilla)，由「城堡」一詞演變而成；
- 納花拿 (Navarra)，標誌係八面交叉嘅鎖鏈；
- 阿拉貢 (Aragón)，紅黃（雕塑嘅深淺色）相間嘅旗號，近年睇加泰隆尼亞新聞經常見到。
雕塑嘅設計仲有其他象徵意義：獅子甲冑長袍袍身嘅貝殼，係西班牙主保聖人雅各嘅標誌 [2]，亦代表利翁王國所創立嘅聖雅各騎士團 (Orden de Santiago)；雕像手上長矛篤爛咗個石榴，象徵1492年，亦即「發現」新大陸嘅一年，哥倫布嘅贊助人、天主教雙王Isabel同Fernando迫使伊比利亞半島上最後一個伊斯蘭王國Granada（西班牙文意即石榴果）投降，完成持續近八個世紀嘅Reconquista大業。
[1] 見〈科多巴清真寺大教堂〉系列（三）及（四）
[2] 見〈來上一課西班牙地理〉（六）
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
=================
#穆斯林 治下的中世紀西班牙：尋常百姓家
#西班牙南部 以 #白色城鎮 聞名，加的斯 (Cádiz) 省山上嘅Zahara de la Sierra（左圖）就係其中之一。據講自從羅馬時代，已經有居民將屋身髹上白色，似乎係阻止房屋 #吸熱 嘅傳統智慧 [1]；中世紀後期至近代，政府推廣用 #石灰 髹牆，保持地方乾爽，預防疫症，所以家家戶戶都一致有白色外觀。嚟到今時今日，呢個習慣似乎係 #旅遊業 原因居多 (?)。
從高處遠望，Zahara係一個好典型嘅中世紀穆斯林鄉鎮：大、依山而建，利用山勢喺山頂起城堡，以往喺入面駐兵防禦外敵；民居黐得比較實，形成狹窄陡峭嘅街道，阻隔陽光、保持陰涼。
坐時光機返去嗰個時代嘅宅第，一定會注意到由 #噴泉 或者 #水池 灌溉嘅庭院。正如之前所講 [2]，統稱 #摩爾人 (los moros) 嘅 #北非 同 #阿拉伯 穆斯林嚟自沙漠，特別欣賞水源帶嚟嘅大自然色彩；再者，美麗嘅動植物係 #真神 嘅恩賜，值得細心珍惜呵護，所以花團錦簇、鬱鬱蔥蔥嘅花園，係屋企嘅重要建設。
住宿起居嘅地方嚴格分為兩部份：靠近正門入口、男人接待賓客嘅廳堂，以及家中婦孺生活、嚴禁外人進入嘅私人寢室，通常喺屋嘅上層。全屋必定有 #花格窗（#celosía，右圖）保護私隱，但總括嚟講向街嘅窗口非常少，所以大家到訪呢類保留中世紀穆斯林風格住家嘅村莊，會發覺建築外觀冇其他現代城市咁岩巉。
=================
#穆斯林 治下的中世紀西班牙：從農業看語言
公元八世紀，阿拉伯人喺 #伊比利亞半島 南部企穩陣腳，隨即開始利用 #安達盧斯 呢度嘅水土資源大規模發展 #農業，帶嚟好多農耕取水嘅技術同器具，包括水輪noria、水渠acequia同埋坎兒井qanat（左圖）。後者固然一望個qa而知係阿拉伯字詞（我哋比較熟知嘅西歐語言通常只有qu嘅配搭），前面兩樣亦都嚟自 #阿拉伯文，字源分別係水輪發出嘅聲音，以及「畀水」、「灌溉」嘅意思。
明明古羅馬人最叻整 #浴場、起水導橋，點解水利灌溉技術竟然要由東方人帶入嚟，仲影響埋西班牙文詞彙？據講，西羅馬帝國喺五世紀覆滅之後，取而代之嘅基督教王國紛紛拆除澡堂、公廁呢啲「犯罪」地方，又淨係掛住起城堡、互相攻伐，當然仲要應付各方穆斯林（又稱 #摩爾人）嘅侵擾啦，於是農業知識漸漸失傳，「話語權」自然落入先進嘅 #阿拉伯人 手中。
農作物方面，今日嘅西班牙文詞彙，都有相當多阿拉伯文痕跡，唔少保留阿拉伯文冠詞a或al，而且喺兩個語言嘅讀音幾乎完全一樣，包括煮 #海鮮飯 必備嘅 #arroz（米）、#aceite（油）、#azafrán（#番紅花，右上圖）、#alcachofa（薊，右下圖），另外仲有 #aceituna（#橄欖，注意呢個字同「油」aceite關係密切）、#azúcar（糖）等等嘅基本食材；名菜蜜糖茄子主角 #berenjena（茄子）、大量生產出口外銷嘅 #naranja（橙），字源亦都可以追溯返去 #梵文、#波斯語，最後經阿拉伯文傳入中世紀西班牙文流傳至今。
左圖：Samuel Bailey (sam.bailus@gmail.com), CC BY 3.0, via Wikimedia Commons
右上圖：Serpico, CC BY-SA 3.0, via Wikimedia Commons
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
=============
穆斯林治下的中世紀西班牙：社會架構
大家可能估唔到，主流歷史敘述裡面，中世紀嘅伊斯蘭西班牙（安達盧斯）係種族、文化嘅大熔爐，起碼喺最初幾百年、倭馬亞王朝治下，有相對嘅宗教包容；當然，亦都有人指出呢個講法係過於理想嘅想像，呢段時期不乏穆斯林歧視甚至迫害非穆斯林嘅案例。今次同大家介紹幾種讀中世紀西班牙歷史經常「遇到」嘅人，了解下當時嘅社會。
最簡單嘅分法當然係穆斯林同非穆斯林。穆斯林有三等，首先係阿拉伯人 (árabes) 征服者同統治者，佢哋組成政治同社會權力精英，佔據重要官職、特權同土地財產。第二種係嚟自北非嘅柏柏爾人 (bereberes)，受倭馬亞王朝征服後隨即被指派北伐伊比利亞，打完仗多數過住簡樸卑微嘅遊牧生活。最後一種叫做muladíes，係改信伊斯蘭教嘅前朝西哥特王國子民，佔安達盧斯人口大部份，完全吸收統治者嘅語言同習俗。
非穆斯林主要由莫沙拉比人（mozárabes，即「阿拉伯化」伊比利亞人）同猶太人 (judíos) 組成，前者係繼續保持基督教信仰嘅西哥特王國人口，間唔時受到迫害就北遷入返基督教王國。猶太人以工藝、商貿、醫藥同科學為事業，受到嘅待遇比喺前朝西哥特王國時期好，甚至可以身居宮廷高位。呢兩類人多數住喺城市，享有司法獨立，可以實行自己嘅律法。再下一等嘅就係各種白人奴隸，從基督教王國嗰邊拐帶返嚟，甚至東歐、北歐等地入口，填充後宮同僕役空缺。
圖：13世紀「穆斯林同基督徒捉棋圖」，作者不詳
文中外語為西班牙文
如果鍾意呢篇文，請你CLS支持
此系列逢星期三、星期日更新，敬請大大力追post :0)
相關文章
來上一課西班牙地理（四）：四季如春的綠色西班牙 https://www.facebook.com/JudyLeeLinguist/posts/1191692411255252
#西班牙文學 之源：#Jarchas
https://www.facebook.com/JudyLeeLinguist/posts/1472747439816413
穆斯林治下的中世紀西班牙：超級 #城市規劃
https://www.facebook.com/JudyLeeLinguist/posts/1313151279109364
#穆斯林 治下的中世紀西班牙：從農業看語言
https://www.facebook.com/JudyLeeLinguist/posts/1376088969482261
穆斯林治下的中世紀西班牙：尋常百姓家
https://www.facebook.com/JudyLeeLinguist/posts/1374138316343993
伊比利亞半島上的西哥特王國藝術史（公元506–711年）（共三篇）
https://www.facebook.com/JudyLeeLinguist/posts/1178635355894291
https://www.facebook.com/JudyLeeLinguist/posts/1180590295698797
https://www.facebook.com/JudyLeeLinguist/posts/1182804272144066