《去西班牙考古》

去西班牙考古：小女孩發現的史前壁畫

現今西班牙境內最早發現而又保存得最好嘅舊石器時代原始藝術，係位於北岸Cantabria自治區桑坦德市 (Santander) 附近Santillana del Mar小鎮嘅阿爾塔米拉山窿 (la Cueva de Altamira) 洞穴壁畫。山窿喺1868年由獵人發現，業餘考古學家Marcelino Sanz de Sautuola 1879年帶佢八歲嘅女María去考察，阿女一支箭跑咗入山窿深處，舉頭一望，發現有圖畫！

山窿最闊嘅「大廳」(la Gran Sala) 尺寸係18米乘9米，洞頂粗糙不平，用黑色、赭色同黃色畫滿咗動物（圖一），為數最多嘅係牛，另外仲有啲野馬、野豬、鹿（圖二），最初推斷為公元前16000年左右嘅遺蹟。呢個洞穴羣嘅壁畫動物有兩個特色，第一係佢哋嘅排列非常凌亂，比例同角度參差，作畫嘅人似乎冇意欲將動物成組劃分，動物同動物之間可以話係冇關係。專家考證過，認為呢啲壁畫唔係短時間內全部畫好，製作時期可能橫跨兩萬年，所以冇劃一嘅畫工同排列次序。

第二個特色係動物像真度非常高，毛皮、犄角嘅細節精緻（圖三），光暗變化亦都一一呈現，甚至好多時利用石體表面天然嘅凹凸起伏位去表現動物嘅體態，或者話係按石頭表面嘅特色而設計動物嘅姿態（圖四）。正正因為咁高質，考古學家最初並唔相信原始人可以有咁高嘅藝術水平，壁畫亦一度被認為係偽造嘅，爭拗咗30年，先至因爲法國發現類似壁畫而確定係真跡，1985年由聯合國教科文組織列為世界遺產。

由於遊人太多，二氧化碳同水份破壞壁畫，洞穴喺1977年至1982年期間完全對外關閉，重開之後大幅限制人數，排期參觀要等三年，但最後仍然敵不過霉菌，喺2002年再次宣佈關閉，喺附近另闢新窿，由藝術家逐平方厘米重構壁畫。今日大家去到睇到嘅博物館同洞穴，就係呢啲大師級複製品。

文中外語爲西班牙文

如果鍾意呢篇文，請你CLS支持 🙂
逢星期三、星期日更新，敬請大大力追post :0)

================

去西班牙考古：搵到個「大媽」

伊比利亞嘅「古代」，粗略指公元前1000年至到公元五世紀西羅馬帝國覆滅呢段時期。呢段期間，伊比利亞半島上除咗有伊比利亞原居民部落，嚟自歐洲大陸、羅馬、中東、北非等地嘅民族受到伊比利亞半島豐富嘅天然資源吸引，亦都開始喺度落腳，其中有：

- 腓尼基人 (fenicios)：嚟自歐亞大陸新月沃土，聚居喺半島東南海岸；
- 塞爾特人 (celtas)：嚟自中歐，聚居現今西班牙中部同西北部加利西亞；
- 希臘人 (griegos)：聚居南部沿海、現今安達盧西亞境內；
- 迦太基人 (cartagineses)：嚟自北非現今突尼西亞一帶，定居伊比利亞半島南部；以及
- 羅馬人 (romanos)：散居伊比利亞半島全境。

今次要介紹嘅伊比利亞古代藝術，主要受地中海（尤其希臘）藝術影響，再融合半島近地中海同南部其他原居民文化而成，創作時期橫跨公元前六世紀至前一世紀，公元前四世紀達到巔峯。呢個地域出土嘅藝術作品，最佳代表係具有紀念意義嘅石雕，當中以Elche同Baza兩地出土嘅兩個石灰石像最有特色。

Dama de Elche（Dama唔係「大媽」，係「女士」噉解，圖一）雖然係半身像，但專家認為原先應該係全身像嚟嘅。石像額頭同兩邊輪狀髮髻 (rodete) 由三個佈滿寶石嘅珠寶環狀頭飾 (diadema) 包覆，三條大頸鏈加上無數懸垂耳環，在在證明石像真身嘅社會地位非常之高。石像出土嘅時候仍然係彩色嘅（還原圖請睇圖二），但係顏料已經隨年月消逝，只剩返嘴唇上極難分辨嘅少少紅色。我老師話，人像雖然似乎面無表情，好冷淡噉嘅樣，但眼神有穿透力、有內省嘅感覺，整體氣質神祕又難以捉摸 —— 我就唔識睇嘞，你哋幫下眼唔該～

喺度想問大家一樣嘢：點解佢背脊穿窿嘅（圖三）？

文中外語為西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)

同系列文章：
去西班牙考古：小女孩發現的史前壁畫
https://www.facebook.com/JudyLeeLinguist/posts/1195913694166457
去西班牙考古：第二個「大媽」
https://www.facebook.com/JudyLeeLinguist/posts/1200733693684457
去西班牙考古：牛定豬？
https://www.facebook.com/JudyLeeLinguist/posts/1202604226830737

=================

去西班牙考古：第二個「大媽」

Dama de Baza（圖一）同上一篇介紹嘅Dama de Elche同樣係公元前五世紀嘅產物，但出土狀況完整一啲，係一位女士嘅坐像，扶手椅椅背肩膊位置較闊，凳腳雕成動物爪嘅形狀。女士本身衣着華麗，珠寶同頭飾明顯同Dama de Elche極為相似，但係就冇輪狀嘅髮髻裝飾。石灰像原有嘅顏色保存得比較好，主要係紅、藍、白。

從呢個咁精心製作嘅石像，當然唔難睇得出人像真身嘅社會地位非常之高，可能係大富大貴人家，但係細心研究，會發現佢嘅意義不止於此 —— 按保存同展出石像嘅西班牙國立考古博物館描述，石像左手捉住嘅小飛禽，同埋椅背翼形嘅設計，都係同上天有關嘅象徵，表現咗造像嘅人認為呢位女士具有神性，因此石像真身可能係貴族家庭內公認嘅祖先娘娘。

上次提過Dama de Elche背脊有個窿，今次呢個都有窿，不過就喺側邊凳底（圖二）。由於Dama de Baza喺一個墓室出土，身邊同時發現一堆似乎係陪葬品嘅陶瓷器皿、兵器（圖三），再加上考證當地部落有火化遺體嘅習俗，專家認定兩個石像其實係骨灰盦嚟嘅，石像嘅窿位就係骨灰安置之處。

兩位女士都喺西班牙南部出土，係伊比利亞古代藝術嘅代表作，但係「伊比利亞藝術」呢個名，就噉睇其實有少少誤導，好容易以爲佢代表咗全個半島。其實半島其他地域都有自己嘅藝術特色，例如中部塞爾特伊比利亞人聚居地，就以大型野獸雕像聞名，下篇同大家睇睇。

- 文中外語爲西班牙文
- 如果鍾意呢篇文，請你CLS支持 🙂
- 逢星期三、星期日更新，敬請大大力追post

同系列文章：
去西班牙考古：小女孩發現的史前壁畫
https://www.facebook.com/JudyLeeLinguist/posts/1195913694166457
去西班牙考古：搵到個「大媽」
https://www.facebook.com/JudyLeeLinguist/posts/1197983420626151
去西班牙考古：牛定豬？
https://www.facebook.com/JudyLeeLinguist/posts/1202604226830737

===============

去西班牙考古：牛定豬？

「塞爾特伊比利亞藝術」(El Arte Celtibérico) 顧名思義，係伊比利亞半島上兩個重要文化融合嘅產物，活躍時期係公元前四世紀至前一世紀，地理上橫跨中央山脈南北高地，但主要集中喺現今Castilla y León自治區境內（圖一淺綠色處），尤其係薩拉曼卡 (Salamanca) 同阿維拉 (Ávila) 兩地，另外南至Extremadura自治區都有一啲遺蹟，最重要而又最原創嘅藝術形式係 —— 野豬 (verraco)！

其實咁講都係有少少太準確，亦都有少少唔準確嘅……呢啲動物石像多數以花崗岩雕刻而成，但係雕工極爲粗略簡約，好多時根本唔知係牛定野豬定種豬，唯一相對清楚嘅係從後睇到嘅雄性生殖器（唔好意思，冇圖）！石像姿勢通常係四腳直立，或者稍微前傾作預備攻擊狀，單獨或者幾隻一組散落喺郊野地區。造像嘅目的似乎係要保護各種家畜，亦即係當地部落嘅經濟基礎。

阿維拉省境內嘅「Guisando公牛」（Los Toros de Guisando，圖二）係四隻花崗岩造嘅四腳動物，叫公牛而唔叫野豬係因為佢哋頭上有兩個窿，應該係要嚟裝兩隻角上去嘅。公元1468年9月19日，當時仍然係長公主嘅伊莎貝拉，喺呢度同同父異母嘅阿哥、卡斯蒂利亞 (Castilla) 國王亨利四世簽訂和約 (Tratado de los Toros de Guisando)，得到Princesa de Asturias嘅儲君封號 [1]，而亨利個女、原先嘅王儲Juana，就正式失去王位繼承權。

至於薩拉曼卡古城外、Tormes河邊羅馬橋頭嘅「公牛野豬」（好明顯又係因為後人認唔到係咩啦，圖三），就喺文學界公認嘅流浪漢小說 (novela picaresca) 鼻祖Lazarillo de Tormes [2] （圖四）裏面出現過：主角拉撒路被盲人老細整蠱，成個頭撼埋牛角度痛咗三日，第一次醒覺離開咗屋企就要自己保護自己，唔好太易信人 —— 橋頭隻嘢隔籬，就有呢一老一少嘅紀念碑（圖五）。

[1] 有關儲君封號嘅由來，請睇〈來上一課西班牙地理（四）：四季如春的綠色西班牙〉https://www.facebook.com/JudyLeeLinguist/posts/1191692411255252
[2] 中譯《小癩子》（音義俱全又有中世紀特色，呢個名譯得幾好）或《托美思河的小拉撒路》，見〈韋小寶的西班牙祖先〉系列

- 文中外語爲西班牙文
- 如果鍾意呢篇文，請你CLS支持 🙂
- 逢星期三、星期日更新，敬請大大力追post :0)

去西班牙考古：小女孩發現的史前壁畫
https://www.facebook.com/JudyLeeLinguist/posts/1195913694166457
去西班牙考古：搵到個「大媽」
https://www.facebook.com/JudyLeeLinguist/posts/1197983420626151
去西班牙考古：第二個「大媽」
https://www.facebook.com/JudyLeeLinguist/posts/1200733693684457
韋小寶的西班牙祖先（上）：流浪漢小說初探
https://www.facebook.com/JudyLeeLinguist/posts/1220412295049930
韋小寶的西班牙祖先（下）：《小癩子》的文化遺產
https://www.facebook.com/JudyLeeLinguist/posts/1224052361352590