《來上一課 #西班牙地理》

來上一課 #西班牙地理（一）：陽光海灘、白色小屋

好多人一聽到西班牙，就覺得係陽光與海灘，或者以爲擁有地中海氣候嘅西班牙就係熱熱熱，啲女仔個個着比基尼行出行入咁，其實呢個只係長年冇太陽曬嘅英國、德國同北歐遊客帶畀大家嘅刻板印象。位處伊比利亞半島嘅西班牙本土，擁有歐洲最多種多樣嘅氣候，連同鄰近外島，可以簡單分成五種氣候（圖一）；如果加埋北緯28度亞熱帶嘅加那利亞群島 (Las Islas Canarias)，算係有六種。熱辣辣嘅陽光與海灘主要係地中海西岸、本土東北部巴塞羅那、東部華倫西亞嘅夏日旅遊特色，冬天就好似香港咁十幾度，着比堅尼係會冷親㗎。

比較內陸啲嘅地方由於冇海洋調節氣候嘅作用，雖然同樣係夏天乾、冬天落少少雨嘅地中海氣候，但係全年溫差比較大，日夜溫差亦都非常明顯，有大陸性氣候嘅特色。以我住過嘅中西部高地爲例，夏天晏晝超過30度，但係一早一晚得十幾度，冬天會落少少雪。至於我哋聽過嘅四五十度高溫，就係呢個情況嘅「加10度」版，熱到崩潰，仲要冇海灘畀你去 —— 西班牙最熱嘅部份係南部安達盧西亞 (Andalucía) 自治區內陸，夏天日頭長期處於攝氏35度以上，Montoro市（圖二）2017年更錄得47.3度嘅歷史高溫。

有冇發覺圖裏面啲屋都係白色嘅？呢層當然同天氣有關啦！白色吸熱慢，喺酷熱嘅天氣下，可以防止屋裏面過度升溫，所以係南部建築嘅特色之一。另一個值得觀察嘅地方係，屋同屋之間嘅街道非常狹窄，Andalucía首府西維爾 (Sevilla) 嘅聖十字 (Santa Cruz) 區就係最典型嘅例子。裏面好似迷宮咁，最窄嘅街道叫Calle Reinoso（圖三），細到極處只有106厘米闊，兩間屋嘅露台近到可以畀鄰居攬攬錫錫（打招呼啫，冇事嘅），所以佢更廣爲人知嘅街名係「錫錫街」(calle de los besos)。咁樣起樓嘅原因，當然又係避免熱親啦。樓房之間近啲、街道窄啲，可以將太陽直接照射到地面嘅機會減到最細。香港市區翳熱，原因之一係濕氣蒸上嚟又走唔到，但西班牙天氣乾，冇呢個問題，日照就成爲社區微氣候嘅最大影響因素。喺Santa Cruz嘅橫街窄巷裏面散步，又真係出乎意料地清爽㗎噃。

但係到底點解西班牙南部會咁熱？下次我會準備好地圖同大家認真解釋 😎

如果鍾意呢篇文，請你CLS支持 🙂 同系列文章請見留言區
此系列逢星期三、星期日更新，敬請大大力追post :0)

註：括號內外語爲西班牙文

================

來上一課 #西班牙地理（二）：科學解釋炎熱的GOT場景

點解西班牙南部會咁熱？解釋氣候又點可以唔考慮地形同地勢呢？除咗因爲地處內陸，缺乏巨大水體調節氣溫，西班牙西南部夏天亦都受源自北非嘅乾熱南風影響，氣溫容易升高。而從當地地勢分析，西班牙西南部內陸地區喺較平坦嘅Guadalquivir河谷地帶（圖一），唔似高地咁「高處不勝寒」，而且日曬嘅熱力受制於三面山坡，冇辦法逃走，夏天嘅時候自然好似個焗爐咁，全部人困獸鬥。

西班牙東南部嘅半乾旱地區（圖二大片深橙色部份）情況亦都差唔多。嚟自非洲撒哈拉沙漠嘅Lebeche乾熱風，夏季影響範圍北至華倫西亞自治區Alicante省Cabo de la Nao海角，南至安達盧西亞自治區Almería省Cabo de Gata海角（圖二兩個桃紅細圈處）。同時，地勢極爲不平嘅Almería，非常受焚風（viento föhn, 個föhn字其實係德文嚟）影響：山嘅迎風面空氣上升，喺高處形成降雨，剩低冷卻咗而又失去水分嘅空氣，喺山嘅背風面一路下沉一路隨氣壓增加而升溫。呢啲乾空氣升溫時冇水分吸收潛熱去緩和升溫速率，所以會熱過原先喺迎風面帶有水分嘅空氣（圖三）。一如大家喺地形圖（圖一）所見，西班牙東南部山巒起伏，焚風嘅作用有機會重複，以致當地普遍長期又熱又乾。而面積只有280平方公里（大概係北區同元朗區加埋咁上下）嘅歐洲唯一沙漠Tabernas（圖四），除咗受高山包圍，東南面嘅Sierra Alhamilla山脈更將僅有嘅春季地中海濕潤海風都阻隔埋（圖五），所以沙漠唔同範圍雖然地勢有差異，但基本都係半乾旱至沙漠氣候。

Tabernas地貌同美國西南部嘅沙漠非常相似，1960年代盛產稱爲Spaghetti Western嘅歐式西部片，亦係好多電影沙漠場景嘅拍攝場地，包括伊莉莎伯泰萊主演嘅《埃及妖后》、Indiana Jones《奪寶奇兵》系列第三集《聖戰奇兵》、《龍紋身的女孩》、《出埃及記：神王帝國》，電視劇就有Doctor Who第七季第三集、Black Mirror第六季第四集，而近年最爲人津津樂道嘅就係Game of Thrones（西班牙文係Juego de Tronos），裏面嘅Dothraki Sea有一部分就係喺Tabernas拍攝嘅；第六季第三集Daenerys雙腳行入Dothraki首都（影片請睇註一），嗰度就係離沙漠20分鐘車程嘅Pechina。Tabernas喺電影業具有舉足輕重嘅地位，一度擁有「歐洲迷你荷里活」嘅美譽，2020年被歐洲電影學院評選爲「歐洲電影文化寶地」。

註一：https://youtu.be/XT00hHnOedw

文中外語爲西班牙文
如果鍾意呢篇文，請你CLS支持 🙂
此系列逢星期三、星期日更新，敬請大大力追post :0)

同系列文章：
來上一課西班牙地理（一）：陽光海灘、白色小屋 https://www.facebook.com/JudyLeeLinguist/posts/1184520248639135
來上一課西班牙地理（三）：薩拉戈薩避暑景點
https://www.facebook.com/JudyLeeLinguist/posts/1189005428190617
來上一課西班牙地理（四）：四季如春的綠色西班牙
https://www.facebook.com/JudyLeeLinguist/posts/1191692411255252

===============

來上一課 #西班牙地理（三）：薩拉戈薩避暑景點

西班牙另一個出名嘅乾熱地帶係東北部嘅薩拉戈薩 (Zaragoza)，睇地形圖（圖一）一目了然，同上次所解釋嘅西班牙南部一樣，幾面環山嘅河谷地帶，熱力受困，高山促成焚風效應同時阻隔濕潤海風，再加上cierzo乾北風影響，造成薩拉戈薩嘅半乾旱氣候。流經當地嘅埃布羅河 (Río Ebro)（圖二）係繼尼羅河之後，流入地中海嘅第二大河流，亦都係伊比利亞半島上長度同流量排次席嘅大河，不過好似對降溫完全冇幫助。

我曾經喺夏天去過薩拉戈薩。你只要被陽光照到少少，都會覺得啲皮膚想裂開然後着火，全日只會諗住點樣避開個太陽。咁有咩地方又有得涼冷氣又可以開開心心睇嘢呢？今日就同大家介紹個好去處 —— 薩拉戈薩河流水族館。

薩拉戈薩水族館係歐洲最大嘅河流水族館，介紹埃布羅河流域生態以外，仲引入咗尼羅河、湄公河、亞馬遜河同澳洲墨累河、大令河流域嘅生物，畀參觀者一次過飽覽世界大河景觀同學習水文知識。呢度令我印象最深刻嘅嘢，竟然係昏暗嘅魚缸之間、遊人通道上嘅一隻龜（請去下一頁睇片）！發現佢嘅時候，成個水族館我已經行咗一小半，但係因爲覺得太奇怪，又有少少擔心隻龜，所以就原路行返去入口度同職員講。職員同我哋行返去發現烏龜嘅地方，跟住話「哦，佢應該蕩失路，好小事啫！」然後若無其事噉捩手執起隻龜，行前幾步去到一個突然好光猛嘅地方，放返佢落水。

原來前面就係一個開放式嘅模擬叢林空間，基本上就係一個超大嘅淺水池塘，入面有龜有魚，上面修咗一啲棧道畀人穿過（圖三），而視線水平就係養住蛇呀變色龍呀嘅玻璃櫃；沿住棧道可以上上落落，從唔同角度欣賞叢林各層嘅風貌。遊人會覺得置身喺一個相對真實嘅生態環境之中，同動物呼吸同一樣嘅空氣，眼睛接收同一樣嘅光線，仲可能見到龜喺腳邊經過（圖四），或者被佢哋落水時濺起嘅水花彈到！水族館仲有好多互動設計，畀遊人同動物建立關係，例如唔封實嘅魚缸同魚塘，同埋限量魚糧扭蛋機畀人扭蛋餵錦鯉（圖五），令我大開眼界，明白到去啲乜館物館唔一定得個睇字。不過我就諗，呢啲設計真係只有喺文明、人道、愛護動物嘅國度先會成功喇。

叢林場景實地影片：https://www.youtube.com/watch?v=3JenK6bqmXI

如果鍾意呢篇文，請你CLS支持 🙂

文中外語爲西班牙文
此系列逢星期三、星期日更新，敬請大大力追post :0)

同系列文章請見留言區

================

來上一課 #西班牙地理（四）：四季如春的綠色西班牙

西班牙中西部內陸地勢較高，係相對苦寒之地，加上作爲抵禦阿拉伯人入侵嘅緩衝區，中世紀前期被稱爲「無人之境」(tierra de nadie)（圖一）。搭車經過，沿路只會見到又矮又黃嘅乾草，可以話係冇乜風景，非常之無趣。呢度乾旱，係因爲北面山脈完全阻隔咗嚟自大西洋嘅濕潤海風。換句話講，雨雲被山峯攔途截劫，所有降雨發生喺山嘅北面，造成西班牙北岸長期潮濕。同時，北部山脈幾乎同海岸線對齊，海邊嘅山勢非常陡峭，有啲地方山腳下面就已經係海灘，令到大量降雨完全集中喺狹窄嘅雨帶（圖二），而廣袤嘅西班牙其他地方，落雨都唔多，所以「The rain in Spain falls mainly on the plain」呢句說話其實係錯嘅。

當你喺旅程中睇厭咗草木稀疏嘅西班牙，不妨提醒自己，向北翻過山嶺離開無人之境，就會開始被綠色嘅高山包圍，放眼就係一片鮮明茂密嘅綠，綠到幾乎刺眼嘅綠（圖三、圖四）。好多住慣中部嘅西班牙人，喺國內旅行嘅時候都非常鍾意北上去阿斯圖里亞斯 (Asturias)，就係因爲氣候同風景同平時見慣嘅完全唔同，係好特別嘅享受。

你可能未聽過Asturias，但係呢個地方喺西班牙歷史上極爲重要。公元711年，嚟自北非同阿拉伯嘅穆斯林入侵西哥德王國治下嘅伊比利亞半島，擴張倭馬亞王朝，全盛時期一度去到現今法國東南部（圖五）。被滅國嘅西哥德貴族之中有個人叫Pelayo，公元718年（一說722年）領軍喺科瓦東加 (Covadonga) 首次擊敗倭馬亞軍隊，建立Asturias王國，確立基督徒喺伊比利亞半島北部嘅據點，開始長達近八個世紀、以趕走穆斯林爲目標嘅修復失地運動 (La Reconquista)。所以，歷史上一般認爲天主教西班牙源自Asturias。呢個地區直到今日，正式名稱仍然係「阿斯圖里亞斯親王國」(Principado de Asturias)，而西班牙王儲嘅封號自中世紀以來，一直都係「阿斯圖里亞斯親王」(Príncipe de Asturias) 或「阿斯圖里亞斯女親王」(Princesa de Asturias)。

下篇話畀大家聽呢個咁緊要嘅地方同附近有咩好睇 😛

文中外語爲西班牙文
如果鍾意呢篇文，請你CLS支持 
此系列逢星期三、星期日更新，敬請大大力追post :0)

===============

來上一課 #西班牙地理（五）：捐山窿學歷史同地質科學

上次講到翻越西班牙西北部嘅山脈，就會見到風光明媚、綠草如茵嘅Asturias —— 天主教西班牙嘅發源地，以及標誌收復失地運動開始嘅科瓦東加戰役 (Batalla de Covadonga) 所在。

Covadonga現時屬於歐羅巴山（los Picos de Europa，直譯爲「歐洲之巔」）國家公園一部分，最顯眼嘅係爲紀念戰役而修建嘅教堂（圖一），出面有打贏場仗嘅Pelayo嘅雕像（圖二）。而起喺山窿裏面嘅聖所、小教堂同相連嘅甬道（圖三、圖四），除咗供奉聖母之外，亦都係Don Pelayo（Don：尊稱「先生」）同家人嘅陵寢所在。距離Covadonga 15分鐘車程左右，係Asturias王國最初嘅首都Cangas de Onís，城內嘅小教堂Santa Cruz始建於公元737年，相信係伊比利亞半島受穆斯林佔領以來嘅第一座基督教建築，不過經歷兩次完全重建，原裝嘅建築只有奠基石得以保存。教堂地基下面係公元前三世紀左右建造嘅石棚墓，1936年西班牙內戰後，當地政府喺重建時決定令佢重見天日，成爲另一考古景點。

鍾意地理同地質學嘅朋友可以反其道而行，深入國家公園行下山。呢度主要由石灰岩構造，係典型嘅喀斯特地形。雨水向下溶蝕岩石，造成山體表面千溝萬壑，而地貌下面就真正「別有洞天」—— 長期喀斯特作用構成溶洞（圖五），所以歐洲之巔呢度其實仲埋藏咗幾個歐洲最深、甚至世界最深嘅山窿。兩個湖Lago Enol（圖六）同Lago la Ercina係當地山區少有嘅大片表面水體，可惜我去嘅時候大霧到莫講話湖，連路都睇唔到，雙程山路上直頭有警衛指揮交通以免撞車，於是無奈小心翼翼盲摸摸踏石而歸。呢個故事教訓我哋呢個地方要晴天先至好去。

文中外語爲西班牙文
如果鍾意呢篇文，請你CLS支持  同系列文章請見留言區。
此系列逢星期三、星期日更新，敬請大大力追post :0)

=============

來上一課西班牙地理（六）：充滿美食的宗教聖地

一講 #西班牙，多數人都會諗到 #地中海。不過唔好忘記，西班牙北部同西北部其實係大西洋海邊嚟㗎。西北部 #加利西亞 自治區 (#Galicia) 係西班牙地圖左上角凸出嚟嘅一塊，南面同 #葡萄牙 北部接壤（圖一）。

同 #西班牙文 並列為官方語言嘅加利西亞語（#gallego，粵音近「架yeah個」）同 #葡文 極為相似，兩種語言嘅使用者基本互相聽得明。西班牙文冇sh音，但喺gallego同葡文就經常聽到；西班牙文用j字母嘅地方，gallego同葡文好多時同樣用x；因此，亦都有人主張應該將加利西亞語併入葡語系，視為葡語方言。順帶一提，#南美 嘅 #阿根廷 人講西班牙文經常帶有sh音，據講就係受鄰國 #巴西 嘅 #葡萄牙語 口音所影響。

#大西洋 海岸嘅地理位置、溫和嘅 #海洋性氣候，令加利西亞同其他北部地區一樣綠樹繚繞、四季如春 [1]，夏天一般20度左右，旅行完全唔辛苦。呢度 #海鮮 多就梗係唔使講啦，最出名嘅食物就係 #pulpo，即係八爪魚 #觸手，呀講錯，係 #觸鬚。名菜pulpo a la gallega（圖二）就係將觸鬚烚稔，加 #橄欖油、鹽、紅椒粉調味，有時下面會墊住軟熟嘅 #薯仔 粒粒；煮得好嘅pulpo稔身唔實，帶少少咬口，類似意粉al dente嘅感覺。

多數人嚟Galicia，都係想去首府 #Santiago de Compostela嘅 #大教堂，耶教徒尤甚。Santiago，其實就係西班牙文「#聖雅各」—— 西庇太之子、#耶穌 #十二門徒 之一、西班牙主保聖人。相傳 #雅各 遺骨安葬喺呢度，所以每年都有好多教徒嚟呢度 #朝聖。大家周遊 #歐洲 列國嘅時候，可能成日見到一個藍底黃貝殼嘅標誌（圖三），佢就係 #世界文化遺產「聖雅各之路」El Camino de Santiago朝聖古道嘅現代記認。

[1] 有關北部Asturias自治區，請見本系列〈四〉及〈五〉。

如果鍾意呢篇文，請你CLS支持 😃
此系列逢星期三、星期日更新，敬請大大力追post :0)

=============

來上一課西班牙地理（七）：#火山爆發

#加那利羣島 係西班牙最南嘅國土，位於北緯28度，非洲 #摩洛哥 以西100公里，採用 #格林尼治 標準時間，比 #西班牙 本土慢一個鐘，所以喺西班牙睇電視、聽收音機都會聽到報時或者介紹節目嗰陣，會特別提到加那利時間。曾經有人提出要全國統一時區以求方便，但加那利政府自己唔制，因為長期有人提住個名，其實都係一種唔錯嘅宣傳。

怡人嘅亞熱帶氣候、火山島嘅優美風景，令羣島長期位列旅遊勝地，最大島Tenerife每年接待超過800萬旅客，第二大島「大加那利島」Gran #Canaria 每年遊客人次則達到650萬。但係2021年夏秋之交，西邊嘅La #Palma（粵音近「喇包麻」）竟然脫穎而出，成為名副其實嘅「熱點」。島上嘅「舊峯」(Cumbre Vieja) 火山自1971年以嚟首次爆發，熔岩以每小時四至五米嘅速度緩慢前進，影響範圍近300公頃，超過6,000人疏散。

噉人呢就，趁熱鬧最叻嘅。前往La Palma嘅飛機船隻塞滿咗好奇嘅背包客、火山迷、攝影發燒友，原本唔使60歐嘅內陸機票，價錢飆升到500歐都有人買，而島上嘅道路就大塞車，多數人客嚟自加那利其他島嶼。#國民警衞軍 同旅遊業者都不約而同表示，而家並唔係搞旅遊嘅時間，島上只有17,000個持牌旅館牀位，如果被遊客佔用，就會令搜救隊伍、保安部隊冇容身之所。

火山爆發由9月19號開始，到今日9月26號已經持續一個禮拜，專家表示可能長達24到84日。大家有興趣嘅可以追蹤各大媒體報導，甚至開住live睇，又或者搜尋 #無人機 拍到嘅俯瞰景象，多角度見證呢個「盛事」。

圖：Google Maps截圖

如果鍾意呢篇文，請你CLS支持 
此系列逢星期三、星期日更新，敬請大大力追post :0)

=============

來上一課西班牙地理（八）：火山繼續爆發

位於北緯28度嘅 #加那利羣島，#亞熱帶氣候 有東北信風同加那利洋流調節。東北 #信風 相對潮濕，係降雨嘅主要來源；因應個別島嶼嘅位置，雨量當然有差異，籠統嚟講，東面Fuerteventura同Lanzarote兩島 #降雨 極少，島嘅位置越向西，降雨就多少少（圖），但係一如西班牙本土東南部，風勢同地勢結合促成 #焚風 效應 [1]，形成羣島全年大致 #乾旱。

氣溫方面，羣島長期溫暖而不至炎熱，全年平均氣溫18至20度左右，夏天最熱嘅時候亦好少超過30度，原因係影響附近水域嘅加那利 #洋流 係一道涼流，有助緩和高溫。不過，從非洲撒哈拉地區西來嘅乾熱風，不時形成 #熱浪 侵襲加那利羣島，造成35度高溫。

當然啦，高溫乾熱好多地方都有，#海灘 又係好多地方都有，但火山就唔係好多地方有。更特別嘅係，加那利羣島同夏威夷一樣，並唔係處於板塊邊緣，而係嚟自一個「熱點」：熔岩由非洲板塊本身嘅裂縫溢出，形成新嘅陸地。隨住板塊移動而熱點不變，新造嘅島嶼越嚟越多，成為島鏈；地質歷史越新近，#火山 活動就通常較強。

2021年9月呢次火山爆發，距離上次50年，一啲老人家記憶猶新。今次爆發初期， #旅遊 部長仲話島仍然開放畀旅客欣賞「奇觀」，表示要好好利用呢個旅遊業「機遇」，當然被人鬧到阿媽都唔認得啦。一個禮拜光景，火山灰瀰漫空中，同時鋪滿機場跑道，引致航空交通癱瘓，旅客要搭船疏散到鄰近嘅羣島首府兼最大島 #Tenerife，體驗不可謂不難忘。現階段嘅主要憂慮，係熔岩流到海邊 [2]，同海水結合產生有毒氣體；當局已指令沿岸居民禁足。

[1] 詳見〈來上一課西班牙地理〉（二）
[2] 見留言區

如果鍾意呢篇文，請你CLS支持 
此系列逢星期三、星期日更新，敬請大大力追post :0)

=============

西班牙中部的色澤

如果話每個地方都有一種顏色，噉西班牙南部安達盧西亞應該係白色 [1]。至於中西部Castilla y León自治區，就係一種好柔和而間中有少少啡嘅淡金黃。去到大學城Salamanca，會發現周圍嘅建築物，無論係大學（圖一）、教堂（圖二）定係民居，顏色幾乎完全一樣，成個城好有一種和諧舒服嘅美感 [2]。

幾百年嚟，呢個地區嘅人都係用呢種叫Villamayor嘅石頭嚟起樓。佢本身係一種黏土沉積岩，啱啱開採出嚟嘅時候係蒼白嘅黃色，隨住鐵質氧化會出現較為深色嘅紋路，所以從建築物嘅外牆色澤，可以判斷佢係新樓定舊樓。由於平滑嘅石質唔算極度實淨，起樓好多時會先用花崗岩打底加固，形成呢區建築物基層同牆身兩截色、兩種質感嘅特徵（圖三）。

至於離Salamanca市中心車程大約15分鐘、石礦所在嘅Villamayor鎮，自從2008年地產泡沫爆破之後，石礦開採量相對減少咗，但仍然喺修復建築文物方面有非常重要嘅角色，市政府亦都好用心宣傳 [3]。而家Villamayor另外兩個特色地方，係大學研究、初創公司、科技企業共冶一爐嘅科技園，其中嘅激光實驗系統躋身世界十大；以及西班牙最大型度假區之一，內有哥爾夫球會同埋集會議、水療按摩、度假功能於一身嘅四星級酒店。

[1] 見《來上一課西班牙地理（一）》
[2] 見https://youtu.be/Z4qr3GrrRi0
[3] https://www.villamayor.es/villa.../piedra-de-villamayor.html 有好多片淨係介紹啲石

文中外語為西班牙文
如果鍾意呢篇文，請你CLS支持 🙂
逢星期三、星期日更新，敬請大大力追post :0)