《華僑餐室》

響鬼佬地方，特別鍾意走上走落，試下裡面名不經傳而又有返咁上下歷史嘅中餐館食飯。一來，行入去有種穿越時空重返回歸前嘅感覺，可以懷念一個唔存在嘅過去。二來，就好似神農氏嚐百草噉，覺得自己試試下應該會試到啲大隱於市嘅驚世名菜，反正餐館食嘢最差應該不至於食到斷腸草。

同朋友去到Antwerp，大家傾緊夜晚食咩好，我就google到有間中餐館叫「華僑餐室」，1923年開業至今。門口畫咗大大對對聯：「華筳美饌十分好食，僑胞西友（？）一律歡迎」。

佢哋見到google啲相，有禮貌嘅顧左右而言其他，冇禮貌嘅就話自己見到相都飽。我轉念一諗，飲食一向難做，任何老店都一定有佢嘅秘密，唯有孤身探奇。

一坐低見到個menu有半版係炸雞（唔係講笑，佢真係寫fried chicken），仲可以配薯條，如果唔係個裝修，我真係以為自己去咗kfc。橘逾淮為枳，中餐館在外，自然要遷就當地口味。通常呢種餐單都係禾稈冚珍珠，要響最後「chef special」嗰度先至係師傅發功嘅菜式。之但係，餐廳食材一擺得耐，少則一口雪水味，大則肚屙三四日，所以要揀特色菜又唔可以揀海鮮或者鬼佬唔食嘅食材。

我就係噉天人內心交戰，最後響「butter frog leg」同「chinese roasted pork」之間徘徊。個鬼婆侍應見我咁掙扎，問咗兩次「落得單未」之後就直接棟響我面前等。結果響肚屙同獵奇之間，我都係怕響比利時入廠，揀咗「chinese roasted pork」。

比利時嘅中餐館有個特點：無論係咩菜式，都會long（唔識寫）塊加熱過/底下有蠟燭嘅鐵版響底。其他國家，佢哋想望落高檔啲或者會整塊鐵板烘下啲炒過嘅海鮮，但係響比利時，即使係一碗白飯，佢都會擺響塊鐵板上面。箇中蹺妙，如果你之點解嘅話，麻煩解惑。

上菜嗰下，果然係冇令我失望，底下真係有塊鐵板。起初我見到一碟芽菜同西芹，以為佢上錯菜，用刀叉（佢係冇筷子）掘咗幾下，終於見到埋咗響底嘅叉燒。嗰刻嘅感覺就好似南美探險嘅考古學家開山劈石終於搵到印加古蹟噉。擺入口，咬落似豬肉乾，食落就係中國汁（即係豉油+蠔油+生粉水），再加啲西芹味。我而家寫返出嚟，自己讀都覺得伏到喊，但當時食嘅時候，就唔知點解覺得有啲好味。啲人睇《The Room》會覺得so bad it’s good，我當時應該都係近乎嗰種狀態。

埋單嗰陣，陸續有客人入席，坐坐下竟然都有八九枱，清一色當地老人家。嗰一刻我終於知道佢點解可以捱過兩場世界大戰。