《何解網絡咁多無質素既抽水文？》

今日想講下點解網絡到咁多無質素既抽水文。
　
以我自身經驗，我自己既PAGE，多LIKE可以有一百幾十個LIKE，少則可以得十幾個LIKE，平均就有三四十LIKE。最多同最少LIKE可以相差十倍。
　
有人可能想問，LIKE真係咁重要？我會話，係呀，的確好重要。對一般小市民，網上寫嘢係無收入，唔存在廣告收益既問題。我問自己，點解要寫嘢？我寫既嘢多數同語言文字有關，係社會議題，想多多少少都可以影響到大眾。如果一開始就知道POST出來係乜人睇，我就唔想用時間去寫出來。因為我係FB寫得既嘢，多數我自己已經思想過無數次，如果唔係有人睇我根本唔洗寫出來。
　
而家推普機雷厲風行，大眾唔關心自己既語言文化，捍衛粵語又有一大班豬隊友，想改變呢個風氣唔容易。越多LIKE，代表文章受眾廣泛，影響到既人越多。除左關乎自身存在價值，成就感等個人心理因素，更加係同影響力多寡有關。
　
以上講左幾個寫抽水文呃LIKE既原因，我諗除左我自己係咁，其他人既原因都係同我相若。如果有得揀，寫文題材相似，你想有百位數LIKE，定個位數LIKE？
　
好多時，辛辛苦苦用一粒鐘打篇嘢出來，結果大家TOO LONG DIDNT READ我，個位數LIKE。求其寫幾分鐘抽下水，主題鮮明，立場堅定，可以有百位數LIKE。我本身了然於胸既嘢，好多時得個位數LIKE，仲寫來做咩，博乜？好多時見到自己既心血得個位數LIKE，就嬲到想將佢沖成符水飲撚左佢算系數。長文要多人睇，係好特殊既情況之下先可以做到，唔可以事先完全準確預測，唔係下下話有麝自然香，好文自然多人睇就做到。
　
咩情況下我唔介意幾多LIKE呢？只有一種情況，就係純學術文章，呢啲文章我寫來係自娛，多數唔POST出來，偶爾POST出來都唔期望多人睇。我電腦到仲有篇詩經既論文，不過無諗過放係網絡比人睇。訓詁音韻去到太專門既地步，就唔係大眾事，一般人亦無興趣知，我亦唔期望佢地想知。因為時間有限，一個人無時間咩都深入去學。但係社會議題唔同，越多人知越好，牽涉既亦唔係咩高深理論，自然係越多人睇到越好。