《粵譯文言志怪故仔》
從前有個御前侍衞，好鍾意騎馬射獵。有一日佢喺東直門打兔仔，咁啱有個阿伯喺附近個井打緊水，侍衞匹馬一個失控就撞咗佢落井。侍衞見出咗事，就即刻返屋企扮冇嘢。當晚，呢個阿伯行入佢房鬧佢，話：「我知你係冇心嘅，但係你見我跌落井，只要叫人救我，我都仲有命，點解你要走咗去呢？」侍衞答唔到，個阿伯就開始周圍掟嘢。侍衞成家人見屋企鬧鬼，就跪晒地話同佢打堂齋，個阿伯話：「打齋冇用㗎，想我唔搞你哋，就同我刻個神主牌，每日用豬蹄供奉，當我祖先咁拜，我咪放過你哋囉。」侍衞家人應承咗，仲真係日日拜個阿伯，屋企又真係冇再鬧鬼。從此以後，侍衞路過東直門，都會運路行，唔行近個井。
後嚟，皇帝出巡，侍衞作為扈從要經過東直門，佢都仲係想運路行。侍衞總管就鬧：「如果皇上問你去咗邊，你點答？何況日光日白，又多車又多馬，你驚咩啫？」侍衞又係答唔到，惟有跟大隊行。
經過嗰口井，又見到嗰個阿伯。個阿伯都見到佢，就衝埋去，扯住個侍衞鬧：「我總算搵到你喇！你前幾年騎馬撞我落井唔救，你係唔係人嚟㗎？」仲一路鬧一路打。個侍衞見到個阿伯已經驚緊，但都答返個阿伯：「我係錯，但係阿伯你都受咗我香火幾年啦，仲當面話會原諒我，點解依家又反口？」個阿伯仲嬲；「我未死，使咩受你香火？我畀你撞落井啫，但係冇幾耐就有人聽到我嗌，拉返我上嚟啦。你做咩話我係鬼？」侍衞聽完仲驚，即刻同阿伯返自己屋企，畀佢睇下個神主牌，都唔係阿伯個名嚟。阿伯見到，一路鬧一路拎個神主牌嚟掟，又掃晒啲供品落地。侍衞屋企人見到咁嘅陣仗，錯愕之餘，又唔係好明發生咩事。呢個時候，佢哋聽到半空傳嚟一陣笑聲，越笑越遠，直到離開咗間屋……
原文：
某侍衛好馳射，逐兔東直門。有翁蹲而汲水，馬逸不止，擠翁於井。某大懼，急奔歸家。是夜，即見此翁排闥入，罵云：「爾雖無心殺我，然見我落井，喚人救我，尚有活理，何乃忍心潛逃，竟歸家耶？」某無以答。翁即毀器壞戶，作祟不已。舉家跪求，為設齋醮。鬼曰：「無益也。欲我安寧，須刻木為主，寫我姓名於上，每日以豚蹄享我，當作祖宗待我，方饒汝。」如其言，祟為之止。自此，過東直門，必紆道而避此井。
後扈從聖駕，當過東直門，仍欲紆道走。其總管斥之曰：「倘上問汝何在，將何詞以對？況青天白日，千乘馬騎，何畏鬼耶？」某不得已，仍過井所，則見老翁宛然立井邊，奔前牽衣罵曰：「我今日尋著汝矣！汝前年馬衝我而不救，何忍心耶？」且詈且毆之。某驚遽哀懇曰：「我罪何辭，但翁已在我家受祭數年，曾面許寬我，何以又改前言？」翁更怒曰：「吾未死，何需汝祭？我雖為馬所衝，失腳落井，後有過者聞我呼救，登時曳出。爾何得疑我為鬼？」某大駭，即拉翁同至其家，共觀木主所書者，非其姓名。翁攘臂罵，取木主擲之，撒所供物於地。舉家惶愕，不解其故，聞空中有聲大笑而去。
──袁枚《子不語》
----
常州西鄉有個顧先生，黃昏時走去郊遊，入夜就借宿喺附近嘅古廟。廟入面嘅和尚話：「今晚要幫人送殯，成間廟都要去，今晚冇人喺度嘅，你幫我看住間廟啦。」顧先生就答應咗，閂好咗廟門就瞓。
到半夜，有人撞門，顧先生就喝問係邊個，對方答係沈定蘭。沈定蘭係顧先生嘅朋友，不過十年前已經死咗。顧先生一聽仲驚，更加唔肯開門。點知對方話有嘢搵佢幫手，如果唔開門佢一樣可以穿門入嚟，依家敲門係念在顧先生係朋友先畀返個面。顧先生無奈開門，一開就聽到有人仆落地嘅聲，佢即刻想拎盞燈嚟，但係地下又傳嚟人聲話：「咪住！我唔係沈定蘭，係呢度啲和尚去幫手送殯嗰個，我姓李嘅。我老婆勾佬仲毒死埋我，所以惟有扮係沈定蘭，求你幫我揭發呢件事。」顧先生就答：「我又唔係官，點幫你呀？」「可以驗我條屍。」「咁條屍呢？」「點燈就見到㗎喇，但係一見燈我就講唔到嘢㗎喇。」
呢個時候，又多咗好多人敲門，開門一睇，原來係廟入面嘅和尚返晒嚟，而且個個都好似嚇親咁。佢哋話：「場法事做到一半，條屍竟然消失咗，咪返嚟先。」顧先生先同佢哋講返喺廟發生咩事，然後一齊點燈照一照地下，見到一條七孔流血嘅死屍瞓喺度。第二朝佢哋即刻報官，揭發咗呢單凶案。
原文：
常州西鄉有顧姓者，日暮郊行，借宿古廟。廟僧曰：「今晚為某家送殮，生徒盡行，廟中無人，君為我看廟。」顧允之，為閉廟門，吹燈臥。
至三鼓，有人撞門，聲甚厲。顧喝問：「何人？」外應曰：「沈定蘭也。」沈定蘭者，顧之舊交，已死十年之人也。顧大怖，不肯開。門外大呼曰：「爾無怖，我有事托君。若遲遲不開，我既為鬼，獨不能衝門而進乎？所以喚爾開門者，正以照常行事，存故人之情耳。」顧不得已為啟其鑰，砉然有聲，如人墜地。顧手忙眼顫，意欲舉燭。忽地上又大呼曰：「我非沈定蘭也。我乃東家新死李某，被奸婦毒死，故托名沈定蘭，求汝伸冤。」顧曰：「我非官府，冤何能伸？」鬼曰：「屍傷可驗。」問：「屍在何處？」曰：「燈至即見。但見燈，我便不能言矣。」
正匆遽間，外扣門者人聲甚眾，顧迎出，則群僧歸廟，各有駭色，曰：「正誦經送屍，屍隱不見，故各自罷歸。」顧告以故，同舉火照屍，有七竅流血者奄然在地。次日，同報有司，為理其冤。
──袁枚《子不語》
----
從前有姓趙、姓李兩個廣東書生，住喺廣州附近一座山上面讀書。端午節時，趙書生父母送啲酒菜嚟同佢哋慶祝，佢兩個就飲啦。飲到夜晚，聽到人敲門，原來又係一個書生，仲幾有型添。佢話佢係附近十里嘅地方住嘅，聽講有兩個有料嘅人喺度住，就嚟結識下。兩個書生見咁高興，咪拉埋佢一齊飲，傾落仲幾好傾。佢哋一開始係傾下八股文技巧，之後講到古文同詩詞嘢，呢個陌生嘅書生都講得好好，學問相當紮實，趙書生同李書生都覺得自己唔及佢。
之後，佢哋傾到神佛嘢，趙書生一向都冇咩興趣，但李書生就幾信有嘅；個陌生書生就實牙實齒咁話有，仲話想見佛即刻得。李書生聽到就話想試下，然後陌生書生疊高啲枱到五尺幾高，坐喺上面，周圍即刻起霧，再除身上一條絹綁成一個圈，同兩個書生講，圈入面就係佛地，可以見到佛。
李書生一向信有神佛，望到圈入面真係有韋陀同觀音，又有煙霧飄出嚟，就將個頭伸入個圈入面；趙書生都望咗眼，但就見到啲青面獠牙嘅長舌妖怪喺圈入面，即刻大叫出面等收嘢嘅家僕；僕人衝入房，李書生先見到圈入面係妖怪，即刻掙脫，但都勒傷咗條頸。至於個陌生書生直程消失咗。
之後兩個書生屋企都覺得坐山有邪嘢，唔啱長住讀書，就要佢哋各自返屋企；第二年，李書生中舉，下一場會試都考中，去廬江做知縣。點知好快就因為畀人彈劾，睇唔開度咗頸囉。
原文：
廣東趙、李二生，讀書番禺山中。端陽節日，趙氏父母饋酒肴為兩生慶節，兩生同飲甚樂。至二鼓，聞扣門聲，啟之，亦書生也，衣冠楚楚。自云：相離十里許，慕兩生高義，願來納交。邀入坐，言論風生。先論舉業，後及古文詞賦，元元本本，兩生自以為弗及。最後論及仙佛，趙素不樂聞而李頗信之，書生因力辨其有，且曰：「欲見佛乎？此頃刻事也。」李欣然欲試之。書生取案幾疊高五尺許，身踞其上，登時有旃檀之氣氤氳四至，隨取身上絹帶作圈，謂二生曰：「從圈入，即佛地也，可以見佛。」李信之既篤，見圈中觀音、韋馱，香煙飄渺，即欲以頭入圈；而趙望之則獠牙青面、吐舌丈餘者在圈中矣。遂大呼。家人共進，李如夢醒者，雖掙脫，而頸已有傷，書生杳然不復可見。兩生家俱以此山有邪，不可讀書，各令還家。明年，李舉孝廉，會試連捷，出授廬江知縣。卒以被劾，自縊而亡。
──袁枚《子不語》
----
杭州有個蘇先生，好鍾意講笑，尤其係笑人嗰時夭心夭肺，所以啲人唔鍾意佢。大年初一，啲人畫咗幅疫神像貼喺佢屋企門口諗住邪下佢，蘇生起身開門見到，就大大聲笑出嚟，將神像迎咗入屋，放埋喺上席一齊飲酒，然後化咗幅疫神像。
啱啱好呢一年就發生瘟疫，周圍都拜疫神祈求免疫。有個病人突然變咗個人咁講：「過年時我受過蘇生禮待，冇咩好報答佢。如果想拜我，請埋蘇生嚟陪我，我先去。」消息傳開之後，拜疫神嘅人爭住請蘇生返屋企。蘇生嗰年日日都有人請佢食大餐，忙到行唔開。佢屋企大大細細十幾個人，仲冇一個染病添。
原文：
杭州蘇耽老，性滑稽，善嘲人。人惡之，元旦，畫疫神一紙壓其門。耽老晨出開門，見而大笑，迎疫神歸，延之上座，與共飲酒而燒化之。是年大疫，四鄰病者為祀疫神。其病人輒作神語曰：「我元旦受蘇耽老禮敬，愧無以報。欲禳我者，必請蘇君陪我，我方去。」於是祀疫神者爭先請蘇，蘇逐日奔忙，困於酒食。其家大小十餘口，無一病者。
──袁枚《子不語》
----
我第三個女，本嚟同戈仙舟太僕個仔訂咗婚。佢十歲嗰年嘅夏至時夭折，當年係乾隆五十五年庚戌年。佢死之前嗰日，病情已經好危急，但我就要去方澤幫手祭地祇，阿女忽然話：「今係係初八，我聽日辰時就要走喇，都仲趕得切見到爸爸。」問佢點解會知，佢又合埋眼唔講。到初九禮成之後，我返到屋企，果然趕得切見佢最後一面。佢走嗰時，牆上面掛嘅西洋鐘啱啱好「噹、噹、噹」咗八下。真係一件奇事。
原文：
余第三女，許婚戈仙舟太僕子。年十歲，以庚戌夏至卒。先一日，病已革，時余以執事在方澤，女忽自語曰：「今日初八，吾當明日辰刻去，猶及見吾父也。」問何以知之，瞑目不言。余初九日禮成歸邸，果及見其卒。卒時壁掛洋鐘，恰琤然鳴八聲，是亦異矣。
《閱微草堂筆記·卷五·灤陽消夏錄五》
----
見塔巴講緊紀曉嵐，我都簡譯一個故仔……
田白巖話，康熙年間江南有一單徵收漕糧案，有幾個官員同胥吏都殺咗頭。幾年之後，其中一個官員嘅朋友喺屋企扶乩時請到佢，佢話依家喺冥司告緊某人。朋友驚一驚，問：「佢係好官嚟架喎，而且佢做兩江總督時喺係單案之前十幾年，點解要告佢？」乩文又寫：「呢單案唔係一日半日突然會發生架。當初出現少少問題時，革走一個官，炒幾個胥吏就可以解決咗件事。但係某人為博取個忠厚嘅美名，由得啲癌細胞自由發展，結果到病發時，我哋就成為被追究嗰班人。我哋係犯咗錯，害咗百姓同國家，唔會怪依家執法嘅人。但如果追究返禍事嘅根本，唔告佢告邊個？」之後支鸞筆就冇再喐。結果都係唔知下面點判。《金人銘》話：「涓涓不壅，終為江河；毫末不札，將尋斧柯。」古代聖人真係睇得好通透。呢隻鬼講嘅嘢，都唔係冇道理嘅。
原文：
田白巖言，康熙中江南有徵漕之案，官吏伏法者數人。數年後有一人降乩於其友人家，自言方在冥司訟某公。友人駭曰：「某公循吏，且其總督兩江，在此案前十餘年，何以無故訟之？」乩又書曰：「此案非一日之故矣。方其初萌，褫一官，竄流一二吏，即可消患於未萌。某公博忠厚之名，養癰不治，久而潰裂，吾輩遂逅其難。吾輩病民蠱國，不能仇現在之執法者也。追原禍本，不某公之訟而誰訟歟？」書訖，乩遂不動。迄不知九幽之下，定讞如何。《金人銘》曰：「涓涓不壅，終為江河；毫末不札，將尋斧柯。」古聖人所見遠矣。此鬼所言，要不為無理也。
《閱微草堂筆記·卷五·灤陽消夏錄五》
----
戈仙舟太僕同我講，乾隆十三年，河間城西門外邊嘅橋上面，有個人被雷劈死。死屍端正咁跪住，冇仆低。佢手上舉住一個紙包，畀雷劈中都冇點著，驗下入面嘅嘢，全部都係砒霜嚟，在場嘅人都唔明點解會有件咁嘅事。過咗一陣，佢老婆收到消息過咗嚟，睇到老公咁又冇喊，只係話：「早知係咁嘅下場，我仲嫌佢遲添呀。佢成日鬧阿媽，尋日忽然萌生惡念，話想買砒霜毒死佢阿媽，我喊住勸咗成晚叫佢唔好，佢都唔聽呀。」
原文：
戈太僕仙舟言，乾隆戊辰，河間西門外橋上，雷震一人死。端跪不仆，手擎一紙裹，雷火弗爇，驗之皆砒霜，莫明其故。俄其妻聞信至，見之不哭，曰：「早知有此，恨其晚矣。是嘗詬誶老母，昨忽萌惡念，欲市砒霜毒母死，吾泣諫一夜，不從也。」
《閱微草堂筆記·卷四·灤陽消夏錄四》
----
睇《閱微草堂筆記》見到個咁嘅鬼故：
南皮有個許生半夜畀燭光整醒，見到牆上伸咗個人頭出嚟，兩眼好似燭火咁。於是佢話：「啱晒，正想睇下書。」然後就借鬼眼睇咗陣書，隻鬼冇癮就走咗；另一晚佢半夜急屎，書僮舉燭台送佢去茅廁，屙到一半個鬼頭又伸出嚟，將書僮當場嚇暈咗。點知佢就話：「啱晒，冇位放燭台。」抆完屎之後仲用啲抆過屎嘅紙幫隻鬼抹嘴，之後隻鬼就冇再現過身……
----
《閱微草堂筆記》入面有個故事，具體邊一章我唔記得咗，內容大概係咁：有晚班衙差去捉賊，攻入個賊屋企，但個賊已經走咗，得返佢老婆喺度。班衙差就捉咗個賊嘅老婆返去，諗住咁逼個賊現身。返到衙門之後，班衙差起意想輪姦個個賊嘅老婆，呢個時候衙差嘅頭領喝止咗佢哋，班衙差都聽話冇再搞人老婆。
第二朝佢收工返屋企，先知之前嗰晚有賊入屋，仲打算強姦佢個女，但最後都有人喝止咗。問返個女係幾點發生，啱啱好就係佢喝止班衙差嘅時候……
----
鹽城縣小關營嘅村民孫自成，佢老婆姓謝，有年除夕生咗個仔，所以叫佢年子。年子18歲時，有一日用擔挑挑啲雞入城賣，行到一半，一陣旋風吹過，將雞籠入面啲雞吹晒出嚟，啲雞仲乘風飛走晒。年子嚇一嚇，返到屋企就病咗。病危時，咁啱佢阿媽生得，全家都去照顧緊佢阿媽，冇人理佢。之後，年子昏昏沉沉，覺得身體輕到可以畀風吹走咁，飄咗一陣，飄過咗一道紅色嘅門，然後就跌咗落一個深潭入面，但落地時又唔痛，只係覺得啲手手腳腳短咗，唔似平時咁。雙眼又好似有嘢芒住好難睜開，但佢仲聽到父母講嘢嘅聲音，以為係發緊夢，就安心咁由佢發落去。
孫自成見老婆順利生咗冇咩嘢，就趁空檔去睇下年子點，呢個時候佢先發現年子已經死咗，然後孫自成就喊咗出嚟。年子聽到喊聲，醒咗一醒，一開始都唔知發生咩事，但就聽到阿媽話：「為咗生呢灘血泡，反而搞到年子死咗。」然後又喺度喊。年子依家先明自己已經轉生做自己細佬，驚阿媽唔知會傷心，就大聲嗌：「我係年子呀，年子未死！」阿媽聽到初生嬰兒出聲講嘢，當場嚇到暈咗，過幾日仲死埋。孫自成怕細仔冇奶水，就用粥仔嚟餵細仔。呢個仔3個月就出牙、5個月就識行，個名叫再生，今年都16歲囉。呢件事係鹽城閻知縣講嘅。
原文：
鹽城東北鄉草堰口小關營村民孫自成妻謝氏，除夕生子，因名年子。年十八，挑雞入城，半途有旋風一陣，將籠內雞盡吹出，騰空飛去。年子大驚，從此回家臥病。危急中，會其母將產，舉家守生，無人看護。年子昏沉，身隨風蕩。忽從朱門之內，墜於萬丈深潭，恰無痛楚；只覺身子短小，不似平時，兩目蔽澀難開，耳中所聞，仍似父母聲音；以為夢中幻境，安心待之。其時孫見謝氏產兒安穩，偷暇趨視年子，則已死矣，不覺大哭。年子驚醒，不解其故。只聞母泣而數曰：「生此血泡，反將我成人長大的年子死了。」悲號不已。年子始知身已轉生，恐母急壞，遂大聲曰：「我即年子也，年子未死！」謝聞小兒言語，頓時驚風，數日而死。孫憂小兒無乳，哺以粥食。三月生齒，五月能履，取名「再生」，今年十六矣。此事鹽城令閻公云。
──袁枚《子不語》