《我坐咗時光機去2016年搵楊岳橋》

＊＊＊
話說，我有個機會坐番時光機，返左去某年某月某日香港某個夜晚。

我行左去有一班群眾聚集果一邊，佢地都好用心咁聽緊一個戴住粗框既男人好慷慨激昂咁樣發表緊佢生涯入面最重要既其中一個演說。只見佢既神情異常地嚴肅，眼神就好似會冒出火焰一樣，將世間既一切邪惡，通通全部燒燬。我望向身邊有幾個女仔，望住台上發言人果陣，幾乎充滿住心心眼。我絕對相信如果今晚呢個男人係競選緊總統，呢一班人一定會義無反顧咁投佢一票。

「香港！仲有得救，香港！仲有最後既防線，我哋仲有一個獨立既司法系統，你同我都會相信架。」

「而呢一樣野，獨立既司法系統，如果有任何人想搞佢嘅話……」

「ＯＶＥＲ　ＭＹ　ＤＥＡＤ　ＢＯＤＹ！！！」

聲音響徹雲霄。幾乎激起左一群仲係樹上棲息緊既白鴿。實在太精彩喇。實在太出類拔萃喇。

為左加強語氣，最後果句佢講果下，甚至用手指好大力咁指番住自己。佢一講完，所有人已經急不及待起哄，鼓掌，而且歡呼聲不絕。雖然呢個場面，我知道我已經睇左無數次，就好似暮蟬鳴泣既古手梨花咁，但我仍然覺得感動，我仍然覺得起晒雞皮，甚至幾乎眼睛一紅，就會即場同其他人相擁落淚。但我最終忍住左。我一路向前面擠入，終於，我搵到呢個男人，並且向佢揮手示意，啞住聲線咁同佢講：

「楊兄。。。」

「多謝支持，多謝支持，記住投我一票。想要我簽名ＯＫ？一陣先。」

「唔係，我想同你講。其實我係未來黎既。你知唔知你將會有一日同其他立法會議員一齊總辭先……」

「放心啦，唔會既。你明唔明白，我地仲有一個獨立既司法系統……」

「我明白，我真係明白，但係依家個司法系統，已經……」我悲從中來，都未講完，個男人已經疊住我膊頭，安慰我話：

「無問題，我地唔會放棄。到最後，一定係我地贏。民主會戰勝歸來。」個男人一講完，就俾其他工作人員夾走左，同其他支持者繼續影相鳥。

我又一次戇鳩鳩企左係度，慘笑。身邊響起一把女聲。

「第２千３百４十５萬次啦喎，仲想繼續？」

「我真係唔想放棄。我知道我穿越咁多次，總會令佢相信，我依家見到既野，我會改變到佢，改變到未來。我」

「我係時空女神。唔係命運女神。命運不能改變，你既然要做。好啦。不過依家帶番你番你個時代先。你都攰架啦。我地下次又再黎啦，好嗎。」

女神可能亦都見識太多次啦。佢都好心勸我。但我都係想再一次堅持。

女神嘆左一口氣。扶左就快精神崩潰既我，上番時光機。我地又再一次絕塵而去。留低既仲係一班仲覺得充滿住希望既人群，情緒繼續高漲。

（完）