(beta 公測版本)
< 返回

《Social Media 本身一開始,係好美好咁,想大家朋友就算唔係身邊,都一樣可以照樣分享生活點滴》

日期:2020年11月11日

塔:諗番轉頭,Social Media 本身一開始,係好美好咁,想大家朋友就算唔係身邊,都一樣可以照樣分享生活點滴。但係依家就突然變左多左條旁證茂利係隔離,時時刻刻都睥住你同埋摘你名,似足舊時小學果啲專捉人有無係個操場度跑既風紀咁。

本來你都係想傾下閒偈唶,佢就突然之間彈出黎話:

喂唔好講呀,未經證實呀。又或者係:呢啲野有爭議呀,好講少句啦,唔係後果自負呀。如果你都仲敢繼續講,佢就會掌你咀,甚至搵牛皮膠紙痴實你個口,可能要四十八小時之後先痛快幫你撕番開咁囉。手執呢種權力同執行力既人,你都咪話唔爽歪歪。

我有時都係度諗,呢個世界依家究竟仲有咩係可以講係全無爭議既。當地球係咪圓,都有人質疑,而就算數學呢啲已經去到純學術領域,1+1 係咪等於 2 都可以拗到數學教授係 Twitter 都話要投降。更加唔好話統計既或然率以及估算究竟可唔可以 prove 到啲乜。

大膽啲講,只要多於一個人有唔同想法,就算事實話講到幾擺在眼前幾Trivial ,基本上都可以有爭議。所以任何野佢都有機會唔俾你講,睇下佢有無心去裝你咁解。令到審查變得更合理,呢個真係提供左一個好方便既理由。

寫到呢度,突然諗番起,警察查你身份證,都係為左維護法紀,伸張正義,忠誠勇毅真係唔係浪得虛名。依家話要 DQ 議員,亦係因為用左一啲方法已經驗證到佢地唔夠愛國。所以有時都唔好夾硬話分自由派就點點點專制派就點點點,其實某啲時候,大家理念會出奇地相似架哩。嘿嘿。

全文 512 字 (唔計英文、空格、標點)