《KFC 扒雞肉芝士多士》
日期：2015年2月24日
去KFC食嘢，識食梗係食扒雞肉芝士多士走沙律醬（以下簡稱雞芝多）。雖然只售十蚊雞，但絕對唔係頹包。兩塊面包夾住芝士同黑椒雞肉，簡單得嚟都可以好有心思：多士兩面都搽勻牛油，夾餡後入焗爐，牛油完美地滲入面包肌理中，造就外脆內軟嘅口感，芝士同樣成半溶狀，浸入雞肉粒。員工仲會以對角線一刀切成兩塊經典三角型嘅多士，好Highclass。吃前先手執冇芝士嗰塊包，小心將雞肉倒上有芝士嘅另一半，剩低個塊係咩？咪就係平時大家樂都要賣成十幾蚊嘅油多囉。依家你明點解要走醬，牛油同面包好比天生一對，沙律醬只會破壞油同多嘅互動，好似硬係滲一腳嘅第三者咁乞人憎。享受完油多後，剩低嘅就咁當黑椒雞肉芝士Pizza食又得，捲嚟做黑椒雞卷食又得。一雞兩吃，都係十蚊咋，真係抵到你唔信。
PS: 鐘意清淡嘅朋友可走埋黑椒
全文 293 字 (唔計英文、空格、標點)
粵典嘅開放資料政策唔包括粵典文庫嘅文章。除非特別寫明，否則以上文章嘅版權持有人保持一切版權權利。