《140句 廣東話 歇後語》

==== 廣東話 歇後語 (1-20) ====

一個酸梅兩個核：今時唔同往日
七姐反宮衣：花樣隨時變
二仔底：死跟。意指基礎差，實力弱，只能跟風，難以獨當一面。源自話事啤 （沙蟹） 玩法，二仔係最細，若底牌係二仔，難有機會贏，只好跟其他對手落注，靜待機會。
側側膊：唔多覺
光棍佬教仔：便宜莫貪
兩公婆見鬼：唔係你就係我
冇掩雞籠：自出自入，比喻可以自由來去出入嘅地方
冇牙婆穿針：唔咬線；形容粵曲、粵劇嘅演唱者走音、唔食線，音準唔啱
冬前臘鴨：隻攋隻
出爐鐵：聽打／唔打唔得
切菜刀剃頭：牙煙；切茶刀咁大把，偏偏就攞嚟做剃頭呢啲咁精細嘅動作，所以有咁嘅比喻
剃刀門楣：出又刮入又刮；指商人做生意賺盡每分利益、剝削顧客
劉備借荊州：一借冇回頭
北角過啲：例遲 (麗池夜總會/麗池大廈)
十月芥菜：起心；指某人對異性產生愛意；或指春心初動嘅少女
半夜雞啼：唔知丑（醜）
半粒荔枝：把幾火，因為「一粒荔枝三把火」
反轉豬肚：就係屎。比喻兩個原本親密嘅人或團體，一反面就顯出醜陋嘅個性。豬肚指豬胃，外表洗得再乾淨，但一反面時就會見到裡頭好污糟。
和尚擔遮：無法無天
啞仔食雲吞：心中有數

==== 廣東話 歇後語 (21-40) ====

啞仔食黃蓮：有苦自己知
單料銅煲：即係「一滾就熟」，意思指容易同人增進關係，加深了解
城樓跑馬：後半句係「一味兜圈」，指人講嘢唔直接，不停轉彎抹角
塘底凸：水乾至露頭，指某個人平時平日都唔會出現，只有去到山窮水盡，想借人錢嘅時候先至露面求救
墳場發電機：電死人，形容眼神挑逗迷人
壽星公吊頸：嫌命長，指刻意製造災難，或主動冒生命危險
大笪地賣粥：整定
大良阿斗官：二世祖
大轆藕抬色：應有盡有
太公分豬肉：人人有份。鄉村習俗，每有喜慶就會用公家錢準備燒豬酬神及拜太公，儀式後每位男丁都可以分得燒肉一份。意指分派禮物或獎勵方式唔係論功行賞，亦唔係抽獎，而係見人就派，永不落空。
太監讀神學：冇撚得救
太監騎馬：冇撚得頂
姜太公釣魚：願者上釣；指心甘情願咁順住對方意思去做
密底算盤：下一句係「冇漏罅」。即係話一文錢都唔放過，算到盡。
寡母婆死仔：冇指望；「指」、「子」（仔）同音
屎坑公賣草紙：問心。以前啲人去完廁所係唔係用廁紙而係用草紙，而呢啲草紙通常唔係免費，所以「屎坑公」，即係舊時嘅廁所清潔工，會響廁所門口疊草紙隔籬擺個箱等人入錢落去。草紙同錢箱都係無人看管，入唔入錢都全憑啲人嘅自覺，所以就引申到咁嘅意思。
屎坑關刀：「文又唔得，武又唔得」；「文」係「聞」嘅諧音（指屎坑太臭，聞唔落），而「武」係「舞」嘅諧音（指屎坑、屎氹太窄，舞唔到關刀）。
山草藥：噏得就噏
差佬開槍：中晒腳
幡杆燈籠：照遠唔照近；比喻淨係照顧關係疏遠嘅人事物，親近嘅就忽視咗。

==== 廣東話 歇後語 (41-60) ====

床下底吹喇叭：低聲下氣
床下底破柴：撞板
床下底踢毽：大家都咁高
床板跳上蓆：相差無幾
廚房階磚：鹹濕
扁鼻佬戴眼鏡：「冇得頂」或者「你緊佢唔緊」
拜神唔見雞：稟神噉聲，即係嘮嘮叨叨、喋喋不休；亦有指唔見人。
搽脂粉吊頸：死要面
擔沙填海：白費工夫
新屎坑：三日香。形容一啲新出現嘅事件，會有一大班人蜂擁去嘗試；但係過咗一排，熱潮過後就冇人理
新澤西：食水深
木筲箕：滴水不漏，比喻好孤寒、一毛不拔嘅人
棺材頭燒炮仗：嚇死人
橋上倒涼茶：何苦（「何」係「河」嘅諧音）
死雞撐飯蓋：死頂；明知自己錯咗，但為咗面子都要死撐、唔認錯
殯儀館大減價：抵死；減完價會抵咗，而殯儀館提供嘅係死人服務
水溝油：溝唔埋，兩個人相處唔嚟，關係惡劣。
水瓜打狗：唔見一橛/噉橛
法國大餐：下半句係「多嚿魚」，粗口「多鳩餘」嘅諧音
泥水佬造門：過得自己過得人

==== 廣東話 歇後語 (61-80) ====

泥菩薩過江：自身難保，就好似用泥造嘅菩薩像，會喺過江嗰陣，因為遇到水而冧晒，保唔住原先個樣
深海石斑：好瘀(魚)。
潮州花燈：出雙入對
潮州音樂：後句為「自己顧自己」；源於潮州音樂中#鎖吶 嘅吹奏聲聽落好似用廣東話講「自己顧自己」
澳門朋友：麻鳩煩；來自英文直譯「Macao friend」讀音好似「麻鳩煩」
濕手巾：死扭。足球術語，形容足球員帶波時扭波過多，拖慢進攻速度。
濕水棉花：即係「冇得彈」
火麒麟：周身癮，取自「癮」同「火引」嘅「引」同音，用嚟形容人對咩事都有興趣
烏蠅摟馬尾：一拍兩散
燒壞瓦：唔入疊
牆頭草：兩邊擺。多數指一啲見風駛舵、唯利是圖嘅人，邊一邊形勢好，就幫果一邊。
牛皮燈籠：點極唔明；即係一個人蠢鈍、固執，不斷提點都唔明白問題所在
牛𡁻牡丹：「唔知花定草」或「唔知味道」；指人唔識貨，唔識欣賞靚嘢，白白浪費
狗咬呂洞賓：不識好人心
玻璃眼鏡：假晶，「假精」嘅諧音，即係懶係聰明
生仔姑娘醉酒佬：口頭話唔制，到頭嚟又係制
生草藥：噏得就噏
生骨大頭菜：縱壞，「縱」同「種」係諧音；大頭菜肉根正常係軟，如果生咗硬纖維就唔好食
番薯跌落灶：該煨
番鬼佬月餅：「月餅」英文 "mooncake" 諧音，「悶極」

==== 廣東話 歇後語 (81-100) ====

白馬黑七：烏瀡瀡
白鱔上沙灘：唔死一身潺
百斤加一：多你一個唔多，少你一個唔少
皇帝女：唔憂嫁
神台桔：陰乾
神台貓屎：神憎鬼厭
禮樂射：預輸數
秀才手巾：包書（輸）
秋蟬跌落地：冇晒聲
童子軍跳彈床：事鳩但。指事但、冇所謂；童軍英文係「Scout」，音譯「事鳩」，「彈」同「但」同音。
竹織鴨：冇心肝。指人冇良心、同情心；又或者指無記性、唔上心、唔用心記住重要事。
紙紮下巴：口輕輕，即係輕易許下承諾咁解
細佬吹喇叭：嘥鳩氣
縮沙：走人；源自中藥「縮砂仁」，後來大家都簡稱「縮砂」，衍生出歇後語「走仁（走人）」。
缸瓦船打老虎：盡地一煲
老公撥扇：淒涼；老公幫老婆撥扇，噉老婆（妻子）就會好涼爽，「妻」同「淒」同音，所以就係「淒涼」；一對嘅仲有「#老婆擔遮」(陰功)
老婆擔遮：陰功；老婆幫老公擔遮，畀老公遮蔭，就係「蔭公」；一對嘅仲有「#老公撥扇」(淒涼)
老舉埋年：算鳩數。老舉係妓女舊稱；埋年又叫「埋年結」，即年尾結帳計數
老虎借豬：有借冇還
老鼠尾生瘡：大極有限

==== 廣東話 歇後語 (101-120) ====

老鼠拉龜：無從入手。烏龜受驚時會縮埋個龜頭同手手腳腳入個殼度，老鼠想拉走佢就冇地方落手。形容冇埞埋手。
老鼠跌落天秤：自己秤（稱）自己；指自己讚自己
聾耳陳養雞：免提（啼）
船頭尺：度水(借錢)；船頭尺放喺船頭，量度船隻食水嘅深度。
茶樓搬家：另起爐灶
菠蘿雞：一味靠黐；形容專靠打關係佔人便宜嘅人（量詞：隻）
蒸生瓜：侲侲哋。指人唔熟性、大唔透、低能。
蜑家婆摸蜆：第二篩，意思係冇希望，係「第世」「下世」
蜑家雞見水：「睇得唔食得」或「得個望字」；蜑家即水上人，船上養嘅雞會綁住以免跳落水浸死，比喻可望而不可即
螃蟹過馬路：打橫行
補鑊唔見枳：形容唔知點埋手；補鑊時師傅要用蘸咗灰料嘅布團，即係「枳」嚟頂住，令補鑊嘅鐵粒平滑咁塡塞落去要補嘅窿。冇咗枳，就冇辦法補鑊。
觀奇洋服：源自同名裁縫公司，下半句係講一套做一套
豉油撈飯：整色整水；即係造作
豉油樽蓋：又鹹又濕，指人鹹濕
財到光棍手：一去冇回頭，指啲錢俾人呃咗，就唔會再拎得返
賣布唔帶尺：存心不良，「良」同「量」係諧音，形容人企圖做衰嘢
賣魚佬洗身：冇晒聲氣（腥氣）
跪地餼豬乸：睇錢份上
關公細佬：亦得，即係都可以、無問題嘅意思；同《三國演義》入面關羽義弟張飛字「翼德」同音
阿均賣大頭：好噏唔噏，即係話應該講嘅就唔講、唔應該講嘅就講；故仔係有個叫阿均嘅人賣大頭魚，啲客經過見啲魚唔郁，見唔新鮮唔買，啲客走咗，啲魚先至口噏噏。

==== 廣東話 歇後語 (121-140) ====

阿崩劏羊：咩都冇得咩，冇機會抗議
阿崩叫狗：越叫越走
阿崩咬狗蝨：唔死有排驚
阿崩買火石：𠽤過先知
阿崩養狗：轉咗性
阿茂整餅：冇嗰樣整嗰樣，指多此一舉
阿超着褲：焗住
阿駝瞓棺材：死都唔掂
阿駝行路：舂舂哋
阿駝賣蝦米：大家都唔掂
陳年中草藥：發爛渣
陳村碼頭：逢賭（渡）必啱
陳顯南賣告白：得把口。陳顯南係二十世紀二、三十年代廣州一個普通醫生，佢通街貼告白，但係佢嘅處方就冇乜效用。
陸雲廷睇相：唔衰攞嚟衰。陸雲廷（或作陸雲亭）係陸榮廷嘅音訛，陸榮廷係民國初年嘅桂系軍閥。相傳佢做緊兩廣巡閱使嗰陣，想搵個相士去睇相，但係又驚相士睇得出佢係達官貴人，所以就扮到窮人噉樣去睇相。相士見佢窮人噉款，又奚落佢，又將佢講到好衰。結果不出幾年，陸榮廷真係冇晒權勢，鬱鬱而終。
雞食放光蟲：心知肚明
電燈膽：唔通氣，夾喺情侶中間、唔識迴避、阻住對情侶談情說愛嘅人
青磚沙梨：咬唔入／咬唔入反蝕口水。比喻某人唔似外表睇咁好恰
韓信點兵：多多益善
鳩毛放紙鷂：博到盡；因為鳩毛，即係男性嘅陰毛其實好短，對比起放#紙鷂 用嘅繩嘅長度爭好遠，如果要咁做就要不斷一條駁一條咁駁長，所以係「駁到盡」，而駁同博同音，食字就變「博到盡」
黃皮樹了哥：唔熟唔食。據講了哥呢種雀精於選擇最熟最好食嘅#黃皮 去食。比喻一啲專呃熟人、家人朋友嘅衰人。