(beta 公測版本)
< 返回

《主流文化之中嘅弱勢文化》

作者:仆擇
日期:2020年9月18日

備課嘅時候,咁啱要揾一啲關於 diaspora 嘅資料,其中揾咗少少朝鮮人流散各地嘅資料。有中亞嘅 Koryo-saram,有日本嘅朝鮮族,有庫頁島嘅 Sakhalin 韓人,仲有美國嘅韓裔。

佢哋堅持自己文化傳承嘅方式,我諗好多移咗民嘅家庭會覺得好慚愧。韓裔係離開咗故鄉五代、六代,都仲保留到自己嘅語言、文化。佢哋喺日本可以保留到自己嘅學校,堅持用韓文教學。喺中亞嘅 Koryo-saram (高麗人) 繼續食泡菜,保持返自己嘅禮儀。其實佢哋同周圍嘅人外觀好似,要放低自己嘅身份包袱,係隨時都可以做到。但係佢哋冇噉樣做。佢哋選擇咗堅持。

喺離散嘅環境,堅持嘅阻力好大。首先你要同其他族群分隔(separation),要有好強烈嘅身份認同,可能要用同族通婚嘅要求嚟避免溝稀,要用方式去宣示自己嘅認同;但係維持自己嘅社群分隔之餘,你又要避免邊緣化(marginalisation),要同主流族群有某程度嘅融合(integration)。分隔住嚟融合,完全係精神分裂嘅舉動。每種文化,每種身份認同,不外乎都係建基於:
 (一)信念,例如宗教觀、世界觀;
 (二)價值,例如係人道原則、善惡嘅判別、自由或者權威嘅推崇、各樣嘅審美觀;
 (三)規範,例如待人接物嘅禮儀、範式
 (四)社會行為:起居飲食嘅習慣、冠婚喪祭各種儀式。

但係每一種融合,都係以上嘅犧牲同取捨。唔講啲太深層嘅價值衝突,我有個朋友只係「鍾意食蒸魚」就已經俾人話融入唔到英國生活喇。到到你信念、價值、規範同社會行為都修正到主流族群認同得到,可能你嘅族人已經過半數俾人溶(assimilate)咗喇。話之你一二百萬人都好,兩三代之間就可以融為一體,你睇泰國嘅潮州人就知。

呢啲有本國嘅離散可能已經係比較幸福嘅例子,起碼你有個發源地可以向你提供源源不絕嘅新資源。如果一個民族嘅故鄉都未係咁發展,或者冇咗呢個文化嘅來源,你就真係同探索火星冇好大分別。移民去美國嘅 Hmong 人(「苗族」)有民族認同,有自己語言,有自己嘅服飾,有自己嘅音樂、舞蹈、慶典,有自己一套宗教觀同巫醫,仲要真係夠膽去到美國都行童婚制,搶(kidnap)新娘,一個女人生十胎。佢哋喺美國嘅洪流之下,幾十萬族人都避唔開同化嘅厄運。

睇多兩段片,感受咩叫人離鄉賤。因為無論係堅持定係放棄認同,都係好難行嘅路。假設你全個民族嘅人移民咗去美國,你點樣堅持到你自己嘅文化?如果你選擇放棄,你又會放棄啲咩?定係其實你連堅持咩、放棄咩都唔會知,因為你連自己係點都未定義到?

#愛就係選擇 #定義自己好難 #深夜廢噏

全文 827 字 (唔計英文、空格、標點)