(beta 公測版本)
< 返回

《RE:Zero入面﹐我最鍾意嘅角色係怠惰》

作者:其他
日期:2020年9月12日

RE:Zero入面﹐我最鍾意嘅角色係怠惰。

作為反派﹐佢表現瘋狂﹐成日語無倫次。但睇呢套動畫﹐佢講嘅嘢我受益最深。佢雖然個名叫怠惰﹐但咁多個司教最勤力就係佢﹐反而佢成日用怠惰嚟鬧人。

故事入面主角精神崩潰坐咗喺度﹐司教就問佢做咩扮黐線。佢就話因為黐線嘅人係唔會理其他人目光嘅﹐佢噉樣只係博同情﹐係主角嘅怠惰殺死咗雷姆。

我鍾意怠惰﹐係因為佢鞭撻你嘅唔單止係你行動上嘅懶惰﹐而係心理上嘅懶。我舉幾個常見例子。

有啲人唔鍾意自己份工﹐覺得老細唔好﹐自己懷才不遇。有啲人覺得冇人了解自己。有啲人覺得另一半付出太少。好多時呢啲人投訴係有週期嘅﹐因為問題不斷重複發生。咁即係問題嘅源頭一直存在﹐問題可以分為兩大類:認知錯誤﹐同埋未做足。

認知錯誤﹐係你心理嘅勤力﹐你對一件事不滿﹐但你冇抽時間去process自己嘅情緒。用返上面嘅例子﹐你覺得冇人明白自己﹐咁點解你覺得他人「應該」明白你?對方有冇義務﹐你有冇努力溝通?點解冇人明白自己對你嚟講咁重要?

而第二﹐未做足﹐ 講到底﹐係「你究竟有冇盡自己嘅due diligence」。既然覺得唔開心﹐你諗咗解決辦法未?你覺得自己懷才不遇﹐表現咗自己才華未?你確保人哋睇到未?你做份工唔開心﹐但冇條件轉工﹐有冇諗過點樣make it happen?要咩技能﹐唔識嘅話google吓?唔識得點入行﹐試吓networking?

怠惰係你輕視咗勤勉嘅累積﹐覺得成功係理所當然。平日嘅勤力都係講行動層面﹐但情緒同心理上嘅勤勉係要訓練嘅。下次唔開心嘅時候﹐不妨諗多啲唔開心嘅背後有啲咩﹐咁先可以源頭減廢。😇

全文 532 字 (唔計英文、空格、標點)
備註: 作者:Charlotte