《一個成語震驚七百萬人！‬「溫故知新」真係解溫書？》

今日係想講一句七百萬人解錯既成語，唔好以為呢個成語好深，其實我地日日都講，呢個成語就係「溫故知新」。
　
《論語．為政》：「溫故而知新，可以為師矣。」
平日解「溫故知新」，都係跟楊伯峻先生既解釋。佢既譯文如下。
楊譯：「在溫習舊知識時，能有新體會、新發現，就可以做老師了。」
　
呢個解法有兩個重點。
一：「溫」係解「溫習」。
二：「知新」係「溫故」既結果。
　
好可惜，係我睇完白平先生既解釋之後，發現呢兩個解釋都係錯既。
　
首先，「溫」係解「熟習」，「熟悉」，而唔係解「溫習」。《漢書·成帝紀》：「儒林之官，宜皆明於古今，溫故知新，通達國體。」顏師古注：「溫，厚也，謂厚積於故事也。」顏師古講「厚積於故事」，即係話熟識之前既事，明顯「溫」係解「熟習」，唔係「溫習」。　
　
其次，最重要既係，「溫故知新」乃係並列關係，指又熟悉古代既事，又熟悉現代既事。上引《漢書·成帝紀》，講到「明於古今」，又話「溫故知新」，明顯係並列關係。除左《漢書·成帝紀》之外，白平先生仲舉左以下例子為佐證。
　
東漢王充《論衡·謝短》：「夫知古不知今，謂之陸沉；夫知今不知古，謂之盲瞽。溫故知新，可以為師；古今不知，稱師如何？」
孔穎達《禮記正義序》：「於是博物通人，知今溫古，考先代之憲章，參當時之得失。」
　
王充認為「溫故知新」即係「知古知今」，要「知古知今」先可以做到老師。所以孔穎達話要「博物通人」，又要「考先代之憲章，參當時之得失」，要知「先代」既制度，又要知「當時」既得失。以上例證都可以證明「溫故知新」乃係並列關係，係解又熟識古代既事，又熟識當代既事，即係「博古通今」，咁先有資格做人老師。
　
所以好多時點解重視古人既解法，因為古人距離先秦時代未遠，佢地對訓詁，對語感，對古代制度好多時都熟識過今人。要知孔子講乜，除左要係熟讀《論語》，仲要知道古人點解《論語》，再加上自己既思考，先可以得到最合理既文意。
　
最後，有網友提出，認為「溫」字解「溫習」亦可，其說本何晏。《論語集解》：「溫，尋也。」《疏》既解釋如下：「言舊所學得者，溫尋使不忘，是溫故也。」但係點解我唔用呢個解釋呢？一來係按《漢書·成帝紀》顏注，「溫」字的確解「熟習」。二來「知今」之知係解知道，咁「溫」解「熟習」較為對稱。
　
另外，「溫」既本義係蘊積，所以引伸出溫習之義（因為溫習即係重覆，蘊積同重覆意思相通），又引伸出熟習（熟習即係知得多，蘊積之下就多）。所以兩個解法都持之有故，不過我認為解作「熟習」更合符文理。
　
論點參考：白平之楊伯峻《論語譯注》商榷