(beta 公測版本)
< 返回

《日村、香村》

作者:仆擇
日期:2020年5月21日

英村嘅村民坐船出海郊遊。到海中心,見到個島,島上山多平地少,一邊係懸崖,另一邊係密林。英人望而生畏,準備返歸。岸邊一個畫家見到,就講「我哋日村,依山而建,村入面風景秀麗,河水清澈,就喺河邊有間旅館,可以一路食烤魚,一路欣賞藝伎嘅舞蹈。你睇我呢幅畫,就係畫緊村內景色嘞。」

見到英人有啲卻步,佢繼續話嘞「山路睇落難行,但凡係有人住嘅地方,必然有出入嘅方法。森林後面係出入嘅捷徑。曾幾何時係要攀山涉水嘅,但係經過村民百年來嘅建設,而家只要跟住指示,過兩條橋,沿梯級上山,入黑之前應該就到村口。你睇畫中風景?我敢保證,入村望過,你唔會後悔。」英人覺得,難得嚟到冇理由兩手空空返歸,於是就聽畫家講,沿路入村。山路崎嶇,不過有路牌,有梯級,有欄杆,路面用石頭鋪平,中途又有涼亭可以歇腳。入村條路好長,但係有村民嘅歌聲作伴,不經不覺就到咗村口。村入面嘅景色正如畫家所講,眼望群山環巒,耳聽流水潺潺,確實係人間美景。歎完刺身烤魚,再睇埋飯後嘅歌舞,就喺温泉旅館下榻。過咗一晚心情舒暢,第二朝一行人就原路出海歸航。

英村嘅人對日村印象頗佳,過一排,又心思思想出海。今次嚟到呢個島,都算係多山,但係唔及日村咁崎嶇。岸邊有村民打魚,咁啱有個攝影師喺度。問到香村嘅風景,攝影師話:「香村嘅景色係世間一絕,入夜後燈火通明,不過你哋唔好過嚟喇,路途崎嶇,你哋邊夠腳骨力吖。」英人個個年青力壯,邊有咁易放棄呢?於是就話,「有得睇人間絕景,辛苦少少都唔怕」,仲請攝影師帶路入村。

去到山腳,岸邊嘅石路變成泥路,後來連路都冇埋。一行十人,手腳並用,又爬又行,搞咗一個鐘頭,大家已經開始喘氣。攝影師就話嘞:「入村邊有咁易吖,笪地又斜又跣,路牌又舊又生晒銹,連我哋自己人都認唔到路㗎。」英人心諗,唔係吖,上次日村個山仲高,條路仲遠啦,應該唔怕嘅。話口未完,就聽見一聲「Oh Shit!」原來雜草遮住一個捕獸器,有英人一腳踩咗落去,當場血流如注。

此時一個商人迎面而來,就話:「咁論盡㗎!等我幫你止血,再扶你落山啦。」商人止血之餘都不忘介紹:「香村條路出名難行,不如你去隔籬島吖?嗰邊叫中村,風景仲靚啲,人又多啲,又疊水啲,揾佢哋做生意,包保賺到你笑。」幾個英人聽完,決定同傷者一齊落山,順手過中村探險。今次商人帶大家行咗另一條路。原來香村嘅路好得意,落山容易上山難。周圍都係瀡滑梯,揾到入口,一坐一瀡,方便快捷。瀡幾段滑梯就返到岸邊。

剩低嘅英人就問嘞,「我哋上次去日村嗰邊,佢哋同你地形近似,鋪完路之後條路好好行㗎喎。整靚啲路牌,遊客都可以自己行上山。」攝影師好不屑,答佢:「唔同,我哋遺傳嘅腳骨力就係好啲,根本唔使鋪路。鋪路 is for the weak!」

喺樹林穿穿插插,傷嘅傷,走嘅走,嚟到村口,就得返攝影師同一個英人。
英人上到高山,都不禁讚嘆周邊嘅景色,又戥香村可惜。佢話:「你哋條村明明就好靚。如果你哋鋪好啲路,實會好多人嚟唧。」
攝影師聽到之後好嬲,一腳踢咗英人落山。「話咗你冇腳骨力㗎啦,入唔到村唔好賴地硬啦!」

講完,攝影師斯斯然行入香村嘅旅館。
今日香村旅館執笠,攝影師過嚟影返輯相留念。

全文 1076 字 (唔計英文、空格、標點)