(beta 公測版本)
< 返回

《家長唔識得愛護子女,點可以只怪學校?》

作者:砂糖
日期:2015年12月21日

(編按:文章背景 http://manjuhk.com/2015/12/18/suicidegirl01/ http://nextplus.nextmedia.com/news/latest/20151219/319327 )

學校垃圾,教畜可恥,唔跟規矩濫用程序從來都係Ancient News,一啲都唔exciting。日前少女跳樓,人人都將矛頭直指學校,明明就搞錯晒。學校嘅作為千錯萬錯,都錯不過家長嘅不作為。

讀到新聞,糖糖諗返起十年八載之前,同學校嘅恩恩怨怨。是咁的,不如聽下糖糖十年前嘅故事先吖。

話說中一嗰年,有一日,糖糖帶咗副麻雀返學校,Lunch Time時搵埋幾個同學喺班房度打。打到半路中途,班主任兼訓導老師就行過嚟,好很兇惡咁捉晒我哋幾個人走,話我哋犯校規啦。

一早熟讀校規嘅糖糖,當然感到莫名其妙。老師叫我哋查自己犯咗啲咩校規,老師一講完糖糖就即刻答邊條校規都無犯。咁樣答得,火上加油就一定嫁喇。老師於是唔聽解釋,不由分說咁就簽咗個大過俾糖糖,據說個大過實情上包含三個原因:一,糖糖係打牌嘅首謀;二,觸犯校規嘅「不准賭博」;三,違反校規之「必須尊重老師」。

老師打電話俾糖媽媽,話有件咁嘅事。返到屋企,糖媽媽問糖糖發生咩事,糖糖如實說明:校規話不得賭博吖,我哋呢度打牌啫,都無涉及任何利益嘅交換,連一毫子牌租都無收,完全乾手淨腳,賭條鐵咩?至於尊重,我都好平心靜氣吖,無半點激動,無半句粗言穢語,不過係我熟校規過老師你,唔通咁都係唔尊重咩?

糖媽媽聽完糖糖嘅解釋,同意糖糖嘅意見,話係學校罰錯。於是呢,張記過紙唔簽就肯定嫁啦。後嚟派成績表,數conduct嘅野,發現記多咗過,所以非但唔簽名,仲攝多封家長信,話佢記過數字有誤。學校堅持唔改,於是嗰張成績表到依家都似乎未生效過。

類似嘅事,其實都發生過唔止一單,只係打牌呢次最低能最膠,罰得最錯咁話啦。

去到年尾,要決定升班留班嘅問題。張成績表嗰欄,糖糖仲好記得係一片空白,唔講升班定留班。學校叫咗糖媽媽去,話係勸籲離校,所以特登唔寫,俾我容易咁搵學校咁話喎。據說糖媽媽見老師時,仲獲贈咗中學指南一本。

糖媽媽一直知發生咩事,咁就同學校講:「無理由喎。」仲好記得當時糖媽媽同學校嘅談判不歡而散,返到屋企四點幾,糖媽媽就打去教統局report呢件事,兼且循例確認學校無得逼糖糖走。

糖糖成個暑假都唔知自己會讀邊班;而學校就週不時打去煩糖媽媽,希望說服到糖媽媽幫糖糖轉校。當時糖糖見糖媽媽俾學校煩,就提出過「不斷打電話罪」同埋「提出offer以後打電話嚟都要收費,佢聽到之後再打嚟就係接受咗offer,可以大條道理寄信去收錢」兩個方法。不過糖媽媽都無用過,反而係有諗過搵律師呢個方案,叫學校有咩同律師講喎。

到開學日我都唔知自己邊班,傻更更咁坐咗喺校務處入面成日。返去同糖媽媽講,糖媽媽打上教統局。第二日,糖糖就入到咗班房了。

故事去到呢度。嗱,是咁的,嗰位自殺嘅女仔係無辜就梗嫁喇;學校衰亦無容置疑,之不過呢,實際上推呢個女仔去死嘅,係佢嘅家長,而唔係學校。

一個人到咗十八歲,連簽名有幾大責任都唔知,好缺乏社會常識。學校玩嘢亂派conduct grade大可以同教育局嘈,封自願退學嘅信唔簽唔會死,你教個女做人唔需要正直,對邪惡同唔公義仲要卑躬屈膝,又無一個好合理嘅理由暫退一步,連自己有幾多牌喺手都唔知。人叫你簽名就簽名,係唔係人叫你俾晒成副身家佢,你就俾佢?

常言道:兼聽則明。無理由亦唔應該只信片面之詞,學校話呢樣嗰樣,講到天花龍鳳點都好,聽下自己仔女有咩解釋,點諗都係合理步驟:仔女係錯嘅都要知道原委,先有得教返啱佢嫁嘛,係咪?

糖媽媽都話,當年壓力好大嫁,如果唔係點會話考慮搵律師接手啫?學校啲人無聊、得閒,就大家都知嫁喇。見到學校打嚟就唔聽電話,叫佢有咩同教育局講,話我要講嘅就已經講晒。其實都無咩,糖媽媽有時返工真係忙都聽唔到電話,而好彩係糖媽媽未使去到呢步,問題已經解決。

唔諗是非對錯,唔理孰黑孰白,只聽偏頗至極嘅片面之詞,咁炒粉好正常嫁喎。對住啲濫權同亂嚟嘅人,當然就係要揸正嚟做,大家公公道道咁玩,咁先至係Fair Game嫁嘛。糖糖都已經唔講到面對強權一定要企弱者嗰邊先係所謂嘅公義喇,只係希望大家都守返同一套遊戲規則啫。

真心,無論再幾多次,糖糖都會話,家長嘅不作為比起學校嘅作為更加可惡,更加可恥。學校係社會嘅縮影,或者唔公義,可能有壓逼,實則上好正常合理,甚至糖糖覺得,再殘酷些少都無壞:但做父母嘅,唔教仔女判斷是非黑白,不問對錯咁對學校唯唯諾諾,卑躬屈膝,未免過份。即係咁,再強權再唔講道理都好,對住外邊,對住學校點都應該企硬。之後點樣閂埋門打仔教仔都係自己嘅家事吖嘛。唔講其他,試諗下,俾鬆手啲,一個老師對十五六個學生,同埋一個家長對頂多一個仔女,邊個可以投放到多啲嘅心機時間落去教?又諗下,一個非親非故嘅老師,有自身立場嘅老師,同埋父母對子女,邊個更無動機去害人?

唔識教仔,不如唔好生吖?生出嚟,又唔曉教,咪即係為禍人間。我認真嫁。

全文 1665 字 (唔計英文、空格、標點)