< 返回

《大嶼山個「嶼」字應該點讀?》



作者:白雲城主
日期:2015年12月18日

之前諗過,點解大嶼山個「嶼」字,讀「餘」,而唔係「罪」呢?有人話係例外音變,我就唔信呢個講法,因為例外音變好少見,解釋唔到先可以用。我認為點解大嶼山個「嶼」字,讀「餘」,係因為「嶼」字根本就係有兩個讀音,分別來自兩個語源。兩個語源意思上無關聯,只係咁啱撞左字形。

「嶼1」,語源一:音罪,意義為島嶼。
「嶼2」,語源二:音餘,係大嶼山個「嶼」字既專用字。

按維基百科,大嶼山最早叫大奚山,又叫做大溪山。之後又叫做大崳山、大魚山、大漁山、大庾山,呢堆字都同「餘」同音。點解唔沿用呢堆名呢?我諗原因有呢幾個。崳字唔係常用字,魚漁二字突顯唔到山既意思,庾字一般人又未必識讀。所以就造左「嶼」字出來,見到個「與」字,就知讀音係「餘」,而且意思同山有關。「嶼2」係大嶼山個「嶼」字既專用字,就同「嶼1」字撞左字形,而且「嶼1」「嶼2」讀音唔同。但係「嶼2」係專有名詞,唔會引起混亂。

而家只有一個問題,如果「嶼2」係一個形聲字,點解同「餘」字唔同音呢?有兩個解法。

解法一:「嶼2」既聲旁係「與」,「與」「餘」二字只係聲調唔同,二字音近。
解法二:「與」古代係個多音字,有「餘」音一讀。《廣韻》:「以諸切。」以諸切即係「餘」音。時代早好多既《尚書音義》咁講:「與,音餘。」可見「與」字古代係有「餘」音。

雖然現代「與」字無左「餘」音,但係讀音仲係相近,所以「嶼2」仲可以留低。最後總結一下用「嶼2」既好處。

好處一:見到隻字就識讀,「與」係個常用字,係人都識讀。唔似庾崳,因為唔係常用字。
好處二:大嶼山個「嶼」字從山字旁,無比和諧,魚漁比唔到呢個感覺。
好處三:由於「嶼2」係個專用字,意義同大嶼山有關,唔洗用啲假借字,例如魚漁庾。

全文 527 字 (唔計英文、空格、標點)