(beta 公測版本)
< 返回

《「翎」、「翊」同「詡」》

日期:2020年1月13日

學中文果陣,覺得有呢幾個字我成日都撈亂同唔知點讀:
 
『翎』,用得最多就係果啲清劇啲皇帝一拿下啲亂臣賊子,貪官污吏,就會大喝一聲人黎,同我拎走佢既頂戴花翎。咁就即係烏紗不保既另一個講法。其實就係果條羽毛咁解。有邊讀邊就應該係讀『零』。
 
『翊』,呢個字更加少人用,亦唔可以有邊讀邊,因為佢唔係讀『立』。原來古代好似係通『翌』字,甚至係『翼』字。有飛下飛下,輔助,甚至係恭敬既意思。而薰華兄見到呢個字,佢就諗到明神宗朱翊鈞,即係萬曆十五年本書入面講既明朝皇帝喎。不過,我成日會將呢個字同『詡』搞錯。其實從『言』既,反而係讀『許』。
 
『詡』呢個字,除左『自詡』呢個詞(即係自吹自擂,但係好似係一個無咁串嘴既話法。當然日常使用佢以乜乜自詡,旁人大概唔知你講乜,自宮就識),要識得呢個字之外,我諗呢個字我地之所以識得,就係三國人物,亂世分析師賈詡喇。
 
至於最後既『栩』,就自然係『栩栩如生』既『栩』喇。莊子.齊物論有講到話:『昔者莊周夢為胡蝶,栩栩然胡蝶也。』形容一啲野就算明明係死物,形態逼真到好似具有生命力咁。我相信係我學到又一時RECALL到從羽字右邊既『翎翊詡栩』當中,呢個字應該算係最多人用架啦。。。
 
BTW(兜左咁大個圈),我都想去城市花園討揮春呀喂。係咪一樣都會見到春麗頭同埋旗袍/小鳳仙裝架。。。(拖走)

全文 448 字 (唔計英文、空格、標點)