< 返回

《唔再做英雄嘅一拳超人》



日期:2020年1月7日

一拳超人既主角叫埼玉。佢一心想做英雄,於是瘋狂鍛鍊自己既身體,終於,佢做GYM做到變左光頭同時,佢得到超人一般既力量。大部份怪物一出現,如果佢喺現場又願意出手,佢都會一拳打爆隻怪物。

佢一心想伸張正義,世界第一打怪物,諗住點都唔會有劫數,但係遇上既卻係一個官僚主義至極,口裡說忠誠勇毅保護市民,但內部其實極多都係實力不足但尸位素餐機會主義至上既英雄協會。雖然埼玉既實力故事一開始已經定為最頂級,但佢竟然都要以C級英雄開始做起。相反,佢招式華麗既徒弟,次次都會俾人秒甚至迫到要自爆既,就已經喺最強、可稱為傳說級既S級佔一席位。呢個已經係對現實既非常強力諷刺。

其中有一幕最令我印象深刻既係,埼玉有一次照樣著住佢既黃色緊身衫紅色斗蓬,解決左敵人,救左一大班市民。但係有兩個蛋散職業英雄,眼紅埼玉會成為人民心目中既救星,甚至爬左佢地頭晉升到更高級既位置,於是即時喺現場散佈謠言,大聲指責埼玉不過係『鬼』,係用卑鄙既手段執死雞,佢先可以一拳擊倒敵人,成件事不過係一場騙局。叫市民一定要盡快同埼玉割蓆。

埼玉本來係漫畫家筆下長時間都唔講得上係靚仔(除左某幾多認真模式既SHOT),成個光頭傻仔咁企係度,睇起黎不過係個COSPLAY變態大叔。而一拳就可以打爆敵人呢件事,由於實在太過匪夷所思,於是係兩名仆街(唔駛多,叫捉鬼既,一兩個就夠)既煽動下,果然市民紛紛倒戈,厲聲譴責埼玉呢個岩岩救左佢地既人。有人甚至搵石頭去掟佢,以不齒佢啲搶光環、搶功勞既行為。

印象中記得,埼玉甚至無為自己辯護。佢甚至只係話我做英雄係為左自己,唔係為其他人,就算我真係出術咁又點。然後自己走左去。行勇武,做英雄,做救星,為公義而戰,但好多時候,當取得甜頭之後,大家都唔會領情,一係就想要更多,一係就當你係CONDOM。唔單止係香港,根本人就係咁。你問市民點會咁蠢?市民會識得判斷邊個係人邊個係鬼?

唔怪得有高人指出,埼玉最後寧願唔再做英雄,結婚生下仔然後子又有孫,同孫女玩下做下和理非就算。當然,呢個係另一個故事了。

全文 734 字 (唔計英文、空格、標點)