《傲嬌三大入門語法（廣東話日常實用篇）》

＜一：勉為其難萬用句法＞
［原］我地行街啦。
［Ｔ］見無人陪你，同你去行街啦。
［解說］句式之一，重點在於要表達自己好似幾『委屈』，然後配合對方既行動。先『萬分不願意』，後『積極去配合』。但如果對方回覆『咁我自己一個得啦』，可以即時追加『有我同你去執到啦』連續技，強迫對方就範。其他做法如：
［變化例Ａ］真係無你辦法，我抵得諗陪你啦。［抵得諗形］
［變化例Ｂ）吓咁慘呀，咁我陪你囉。［可憐你＋囉形］
［變化例Ｃ］見你咁毒無人陪，我先做個善事陪你渣。［高高在上＋貶低＋渣結尾形，渣係為左強調其勉為其難。］
　
＜二：將所有祈使句變成反問句＞
［原］我想同你睇場戲。
［Ｔ］點解我要同你睇戲喎。
［解說］句式之二，將內心既想法變成反問句。但重點在於語氣，切忌唔可以將反問句變成疑問句，甚至係嚴厲／直斥其非地：『點解我要同你睇戲（啫）？』非好此道者，可能變左以為你真係想佢答你原因，長篇大論認真左，甚至以為你拒絕佢，就會非常失敗。最好係低調半推半就地，以『。』日語式咁代替『？』語氣低收，甚至係『點。點解我要同你睇戲喎。。。』配合省略號表達遲疑，則效果更佳。當然，係呢度記住要活用『哼』呢個傲嬌助語詞。
［變化例Ａ］邊個話我要同你睇戲喎。［邊個話形］
［變化例Ｂ］做。做咩要同你睇戲喎。［做咩＋故作遲疑形］
［變化例Ｃ］做。。做乜要同你睇戲喎哼。。。［＋哼形］
　
＜三：『先～呀～』否定句式＞
［原］我想做你老師。
［Ｔ］我先唔想做你老師呀。
［解說］句式之三，可謂用途最廣泛，傲嬌度經過日常練習幾乎零失敗可以成為必殺技既詞綴。記住呢個否定句既重點係在於『先』，係呢度係暗示左『唔係』，所以其實真正既意思ＤＯＵＢＬＥ　—ＶＥ即係『我唔係唔想』咁解。同＜二＞一樣，想再加強傲嬌語氣，一定要使用『哼』技。
［變化形Ａ］『我先唔想做你老師呀哼。』（哼形）
［變化形Ｂ］『我，我先唔想做你老師呀哼。』（＋故作遲疑形）
［變化形Ｃ］『哼，邊個話我要做你老師呀，你個蠢材～』（＋反問＋ＫＮＢＫ(このバカ!)大絕形，留意哼都可以放係前面，先字省略係較高手做法，新手勿試） — with Yuk Sing Kwan.