(beta 公測版本)
< 返回

《【學術文章】和你eat:太陽 🌞》

作者:其他
日期:2019年12月25日

🎄先祝各位聖誕快樂,聽日除咗係Boxing Day 之外,同時亦都係發生日偏食嘅日子!本身呢次日食其實係日環食嚟嘅,但係因為香港處於半影區,所以只能夠睇到日偏食-咁啫係點呢?

首先要講吓日食嘅成因:當月球行到地球同太陽之間,成為一條直線嘅時候,月球係地球上面睇就會遮住咗全個或者一部分嘅太陽。地球因應同月球唔同嘅距離,就會喺本影區發生日環食或者日全食,而地球其他落喺半影區嘅地方因角度問題會見到唔同程度嘅日偏食。

😋 正如開頭提到,今次嘅日食係日環食嚟嘅,佢嘅本影投影區落喺菲律賓、印尼、印度、中東等嘅地區,而香港因為座落喺半影區,見到嘅只係日偏食。香港見到食甚(太陽被掩蓋得最多嘅時候)係喺下晝1點55分,到時大約34%嘅太陽會被月球掩蓋。由初虧(月球個影啱啱開始掂到太陽)開始到復圓(月球影子完全離開太陽表面),整個日偏食過程總共歷時大約3個鐘。

咁我哋可以點樣觀賞日食呢?首先:絕對絕對唔可以用肉眼/只戴太陽眼鏡直視太陽!!!!!!!!!

(編按:人一生有兩次機會直視太陽🙃)

🔭 建議大家可以用專業嘅太陽濾片或者喺望遠鏡加裝濾鏡,再去觀測太陽。但記住留意要冇缺口先好用!又或者最安全嘅方法係以投影法,將太陽透過針孔裝置投射落白紙(可以喺網上搜尋投影法或者pinhole method)。

另外, 香港天文台 HKO 、 香港太空館 Hong Kong Space Museum 、 可觀自然教育中心暨天文館 Ho Koon Nature Education cum Astronomical Centre- 天文專頁 、 保良局顏寶鈴書院 同埋 香港聖公會太陽館‧度假營都會喺網上直播今次嘅日食,詳情可以留意佢哋嘅網站。

錯過咗今次嘅話,下一次喺香港見到嘅日食就要等到下年六月廿一號喇!嗰次都係日環食嚟,但同樣地香港只係見到日偏食。 希望大家都可以成功睇日食啦;)

📷 最後特別鳴謝本會會員暨第四十六屆幹事會選舉候選內閣「寂曉」學術 Nissen Lam 提供日食相片。該次日食為2017年8月21日之日全食,相片於美國俄勒岡州撒冷市(Salem)拍攝。

#不是選舉廣告

(注意返相片內嘅係日全食所以睇落好壯觀,但聽日香港見到嘅只係日偏食啊 xd)

其他圖片來源: 香港天文台 、timeanddate.com
文:現屆學術 Tiffany Pang

#中大天文 #學術文章 #日食 #日偏食 #和你eat太陽 #聽日太陽會短暫被消失 #但大家千其唔好被消失 #黑暗唔會好漫長 #光明好快就會重見天日 #願大家平安

全文 760 字 (唔計英文、空格、標點)
備註: 中大天文 CUHK Astronomy Club