《我對於「創作」呢件事嘅理解》

突然想講下我對於「創作」呢件事嘅理解，唔好講我有冇創作過啦，我創作過某樣嘢都唔會同你講。我接觸過（睇過/玩過）一段時間嘅作品有兩類：小說同埋遊戲。

而寫小說同埋整遊戲作為創作行為係有啲共通之處嘅。

寫小說最緊要係咩呢？如果你嘅答案係文筆，對語言嘅觸覺呢類答案，咁你就唔適合做小說家，你應該去做詩人。大家睇小說唔係為咗睇你點樣控制語言，大家最希望嘅係由打開第一頁開始，由睇第一句句子開始，就忘記自己係睇緊書，完完全全進入你嘅故事，最好喺旅途中遇上或可愛有趣或有所共鳴嘅人物甚至朋友，如果背景唔係設定喺現實，就更加希望可以探索一個全新嘅世界。

語言係要用嚟服務故事，襯托人物。為咗襯托一個有教養、甚至有啲藝術氣質嘅人物，語言就要瑰麗雅緻；相反，如果係一個粗鄙低俗嘅角色，就要直白粗俗。如果你因為諗到一句你覺得好靚嘅句子，而用劇情去遷就佢，咁你應該放棄寫小說。

而遊戲都類似嘅。唔同於電影，有啲電影擺明唔係sell劇情，係sell動作特技嘅，好似變形金剛咁，市場上一定有受眾受落。但係喺遊戲嚟講，冇玩家會單純因為畫面而買單㗎，遊戲性唔高，畫面幾靚都冇用，除非你整H game。所以如果你team人以畫面為最優先，或者你成team人應該去CG公司而唔係整game。

同樣地，最擬真嘅畫面唔係適合所有嘅遊戲嘅，有啲遊戲嘅畫面就應該卡通，有啲甚至純文字就最好。

畫面之於遊戲就如語言之於小說，兩者講嘅都係表現力，表現力講嘅就係將受眾帶入去個氣氛，沉醉於你所表現嘅故事、世界 etc.。

而咩為之好嘅小說同遊戲呢？我喺呢到唔用咩文學性又或者藝術性去講，我用體驗去釐定——令人睇到停唔到嘅就係好小說，令人玩到停唔到嘅就係好遊戲。

咁點樣做到呢樣嘢呢？其中一個必要嘅條件就係有推進。寫小說，要每一頁劇情都有所推進，令人揭落去下一頁。而遊戲，就要令玩家喺每一個活動入面都feel到自己向住某一個目標前進緊，有所進度。有啲遊戲內容睇落好豐富，但係主次不清，又或者有好多強制而沉悶嘅內容，拖慢成個節奏，咁就係冇進度。喺遊戲嚟講，所謂嘅進度就係reward，reward可以係遊戲嘅內容，升lv、攞裝備、學技能，亦可以係非遊戲嘅內容——過關時嘅成就感。

而寫小說同埋整遊戲，從來都唔係以真實為上，創作係基於真實，但係作品要脫離真實。

呢點體現喺文筆下，就係好少小說家會用正常人嘅視覺去描寫。小說家喺用「心眼」去睇佢哋筆下嘅人物嘅外表、行為、姿勢嘅時候，總係如福爾摩斯一樣觀察出一啲重點，再加以描寫。而喺描寫過程中總係會加以自己嘅解讀，去為帶出氣氛、帶出劇情、帶出人物嘅性格呢啲目的服務。如果真係真實嘅視覺，咁小說嘅描寫就會無趣而冇生氣，同普通人寫日記一樣。同時，人物嘅性格可能來自於真實嘅人物，可能係小說家嘅家人朋友同事上司愛人敵人，但係當中嘅性格可能會經過放大。當然，就算係正常人，喺認識一個人嘅時候，都會放大嗰個人某部分嘅性格。但係喺小說家筆下嘅人物，你最容易注意到嘅就係小說家放大咗嘅性格（喺佢嘅設定下最有戲劇張力嘅性格），其他嘅性格小說家可能會抹走咗。呢個都係基於真實而脫離真實嘅例子。

而喺遊戲方面，好多嘅遊戲都係嚟自於真實，又或者佢哋靈感來源本身就係嚟自於前人嘅創作，後者本身就係基於真實。

例如RDR2，佢就係畀玩家體驗做一個西部亡命之徒係咩感受。但係呢種感受係經過藝術加工嘅，將會令大家享受嘅感受放大，唔享受嘅就縮小甚至抹去。否則就變咗莎木。

藝術就所以為藝術，唔係因為真實，而係因為佢哋基於真實而令我哋感到related嘅同時帶畀我哋喺真實世界冇或者好少遇到嘅體驗。