《香港需要一場『文藝復興』》

［寫一篇更長更趕客既］一直都講香港需要一場『文藝復興』［１］，呢個就係不論和理非、勇武，所有市民都應該要參與同埋藉此改變自己既生活同陋習既野。要繼續落去，必須身體力行，融入生活，咁樣先可以講所謂既短期、速食，變成長期、甚至內化 (Internalise)，變成『呼吸』［２］一部份。
　
最近負面情緒太多，你話我阿Ｑ都好，我都舉另外一Ｄ野黎平衡番，從呢一點去切入，我唔可以話已經見到曙光咁ＯＮ９，但呢個係一個俾『我仲可以點做』既人思考同行動既方向。例如今次政府同黑警前所未有既惡行，令到所有一直圍繞住佢地中心既建制環境出現雪崩式歹解。呢個我唔係講政治，因為政治係制度既不公，佢地仍然係牢不可破。但係例如罷搭港鐵、罷睇ＴＶＢ等廣告商遠離、罷食美心，都收到一Ｄ成效。
　
或者無數據只能夠９ＵＰ，或者佢地盤數仲有錢賺，但呢個係有阻嚇作用。而更可怕既可能係民眾都有既寒蟬效應：下你仲食美心？我唔同你玩ＬＵ。你信流言？你唔好同我企埋一齊。咁或者有可能令到更多人都會係一段時間唔再幫襯。當然難度好大，香港人都係善忘，但如果要徹底改變香港既生態，呢Ｄ所謂幫襯小店，建立所謂既黃色經濟圈，甚至係生活圈，就可以非常強大：
　
尤其是當黑警取笑市民食生命麵包，話自己去深圳梳乎，呢種明確分成敵我既心態，絕對有可能會拖死強國既大灣區、一小時生活圈規劃。當青年人意識到當黑警為敵，絕不能同佢地為伍（呢Ｄ就係港獨之父不斷強調既恥以為伍）既時候，出現全方位抵制，呢個就會令到本身未成形既國家戰略規劃，可以一下子完全消解於無形。所以豬隊友一樣都會發揮佢地既效用。就係佢地以為做多左就得，但短期無野，長期野無兼顧，就係佢地同大陸政治唔考慮夠周全既致命弱點。
　
從另一邊再深入講，香港精神一直係過去二三十年存在極度真空。因為獅子山精神，所謂陳健波既收成期，辛苦過就成功上岸，呢種拼博精神，完全同年青人ＣＯＮＮＥＣＴ唔到。今次林鄭成功令到全香港新一代同行，反而就係更不畏強權，以個人精神大家一齊做好自己份內事去達成保衛既核心價值。其實不外乎都係自由民主之類。不過今次真係以身體力行方式去爭取，成件事就唔同晒。
　
香港係歷史同政治原因，一直無辦法主流汲收西方耶教既果種普世大愛價值，亦無辦法以中國儒家果種封建思想行落去。而呢種真空變左咁多年只係追求經濟利益，崇尚物質享受。教育極度重視經濟金融，較為輕視文藝同埋人文精神。家長同學生一貫都視之為無前途既玩玩下科。去得讀大學，就一定要讀神科，ＬＡＷ，ＭＥＤＩＣ。但係今次可能可以提供契機改變呢個現象：
　
大家會想再研究香港應該係有Ｄ乜。精神係乜。堅持既野背後除左守護屋企既即係乜？本土即係乜？只係講廣東話即係乜？我地會唔會突然有番自己既土產？整自己既工藝？文學？音樂？繪畫？又例如：今次連儂場既畫，有咩技藝係入面？可唔可以代表到香港一Ｄ野？有咩承傳？有咩故事？有咩主義？有無本地同外國學者會一齊搜集，做資料庫，一個個研究？年青人有無機會去塑造一個屬於番自己鍾意既香港做家，然後大個可以同番其他人講，呢個先係屬於我地既＿＿精神？
　
好多人都崇尚既日本文化，係因為人地有佢地完整既一套。人地可以係概念玩到離題萬丈，但人地亦都可以整到一件野，有藝術色彩之餘，完全融合自己既生活。了解到死物同人類都可以有情感，有溝通，有玩味。然後有晒歷史背景同意義，就會有人慕名而至，之後一睇到，就即刻講得出：呢件就係＿＿派＿＿出產既一個石碗。背後可以接通番日本精神。我地香港主流依家除左恆生指數，中原指數，似乎有排都未建構到呢個內涵同底蘊。你做唔做？
　
好多人都會質疑，批評，擔心香港好亂。我絕對唔會鼓吹Ｄ乜野，只係我想同大家講，我地除左都係渺小既人有七情六欲會心痛會憤怒之外，係物理學入面亦都經常會講，亂中可能會重新得到新既秩序，粒子既運動就會產生新既化學反應。呢場運動最後點無人知，但不斷走落去可能會催生一Ｄ新既，前所未有，可以傳之後世既強大野。再講落去，就太白，或者會俾人鬧，所以點都即止，最後都係果句：
　
唔好只係建議。唔好停止思考。更加唔好停止行動。諗到咩，做啦樣。唔好再等啦。呢個所成就既氛圍，可能會成為強權最懼怕既野，都話唔埋架。但呢Ｄ野唔會只單單投一張票就會換得到。問題係能唔能夠貫徹始終。
　
如果可以為左虛無飄渺既野徹底改變自己既生活習慣。香港一定仲有得救。但如果平日繼續ＴＶＢ，淘寶，食美心，搭地鐵。得閒食下人血饅頭，ＳＨＡＲＥ下內容農場，人地講你就信，完全唔理邏輯係邊，連基本客觀事實都不顧，香港就一定無得救喇。
　
［１］究竟 Renaissance 其實係咪又係時代革命黎？留番俾大家思考下。
［２］無睇鬼滅之刃？快Ｄ去睇喇。