《警察今次最大既功德，係令市民開始重新思考咩係法治。》

警察今次最大既功德，係令市民開始重新思考咩係法治。
　
本來香港人只係顧住蛋治，都唔會諗法治。大家唔好以為唔係上面就唔駛接受洗腦。個個細個都以為法治就係我地香港市民生命財產既最大保障。雖然話就話法律面前，窮人含Ｌ，但係如果有錢的話，大家都會諗：喂條友可能係俾人冤枉，但係請既係咩資深大律師＿狀，甚至係係英國（又勾結戀殖外國勢力）請左個咩紅毛綠眼律師團，大家入去旁聽，又會覺得：仲有得打！呢個就係所講既ＷＯＭＢ［註］理論，亦一直備受泛民主派所推崇，係佢地選舉既基礎之下。總之法治，就交俾佢地守護啦——
　
所以過往先唔反對（同叫人一齊同佢反對）人大釋法，甚至係主權同本地司法權衝突，２３條立法等等。總之呢條就係咩底線黎啦，但係咁多年黎，除左見到班友間唔中出黎著晒黑衫靜默地從一個法院行去另一個法院之後，其實似乎無咩野影響到。更甚者，突然有一日天光先發現，原來自己唔好話底線，連底底都一早無埋。咁又點樣辦呢？
　
以前大家咁驚２３條，係因為呢個確立既新法律，係制度入面可以令到有一把刀行係大家個頭上面。董伯，葉太當年就係咁搞到焦頭爛額。但時至今時今日，２０１９年，大家唔單止係無２３條情況下，已經俾人無啦啦拉左，係大廈都要被迫下刑式下跪，拒捕，食果種各樣既槍彈大餐，有２３條，同無２３條，又有咩分別係依家既香港人心目中？警察打破左第一個海市蜃樓：
　
原來只要非常時期，有無２３條都無分別。
　
你仲唔信？咁行政長官係唔係緊急狀態下用緊急法禁蒙面，律政司多次係呢個時期頻頻申請臨時禁制令，然後法院全數批出，又係咩一回事？今日唔俾蒙面，聽日唔俾出夜街，後日又唔俾夜蒲，然後港鐵又日日話公眾安全理由，閂晒Ｄ車門，唔俾你地出街。你去搵法院尋求公義，睇下人地俾咩你？
　
所以警察真係係呢場運動入面功德無量。佛地麼係哈利波特入面，除左搵一堆中二病既人周圍殺無意義既人好似食左忽得外，佢最大既功勞，就係俾人知道愛就係選擇，保護親人就可以挺身而出駛出最強魔法。幾多個分靈體都唔會有用。所以法治無謂再提，以後再提，不如話警治可以保障我地好過啦。
　
（利申：以上係一個唔識法律普通市民９ＵＰ，入面無任何法學理論根據，大家睇完就算啦。。。）
　
註：唔知咩係ＷＯＭ（Ｄ）Ｂ。請快Ｄ向楊岳橋議員查詢。